მითი, რომელიც გაქარწყლდა!.. ქართველი ქომაგები შეზღუდვებს არ ეგუებიან...

ქუთაისში ეროვნული ლიგა 28 ივნისს, III ტურის მატჩით დაბრუნდა. "რამაზ შენგელია არენაზე" "ტორპედომ" საჩხერის "ჩიხურას" უმასპინძლა. გუნდებმა თრილერის მაგვარი სანახაობა შემოგვთავაზეს - საინტერესო მატჩი 2:2 დასრულდა.

ამ შეხვედრაში კარგი ის იყო, რომ ქუთაისელმა გულშემატკივრებმა საყვარელი გუნდი არც ამჯერად მიატოვეს და შეზღუდვების პირობებშიც უქომაგეს. მიუხედავად იმისა, რომ ეროვნული ლიგის მონაწილე ათივე კლუბის არც ერთ წარმომადგენელს, მატჩების მომსახურე ოფიციალურ პირებსა და მსაჯებს Covid 19-ის ერთი შემთხვევაც არ დაუფიქსირდათ, ჯერჯერობით ტრიბუნაზე ხალხს არ უშვებენ.

ამის გამო, ქუთაისელი გულშემატკივრები "პიონერთა პარკში" შეიკრიბნენ და ერთად დაგეგმეს, რა ფორმით ექომაგათ საკუთარი გუნდისთვის, რომელიც 3-თვიანი პაუზის შემდეგ პირველად თამაშობდა.

მატჩამდე კი ფანები "ტორპედოს" ფეხბურთელებს, რომლებიც საღორიას ბაზიდან ავტობუსით მიდიოდნენ, რამაზ შენგელიას სახელობის სტადიონის შესასვლელთან ფოიერვერკებით დახვდნენ...

გუნდის ერთგულების მაგალითი აჩვენეს ბათუმელმა ქომაგებმაც, რომლებიც სტადიონის გარშემო მესერიდან უყურებდნენ "დინამოსა" და "თელავის" მატჩს.

ბათუმელი "პირატები" სტადიონზე


თბილისის "დინამოს" გულშემატკივრებმა კი ტრიბუნების გარედანაც მოახერხეს ისეთივე აქტიურ რეჟიმში გუნდის მხარდაჭერა, რასაც ისინი პანდემიამდე აკეთებდნენ. "საბურთალოსთან" მოგებული (3:0) მატჩის დროს, "დინამოს" მხარდამჭერებმა გამოსავალი ნახეს და ტრიბუნის გასასვლელებიდან მოედანზე მიმდინარე მოვლენებს მაინც უყურებდნენ, შესაბამისად, გოლსა და მომენტებზე რეაგირებდნენ. მათი ხმა მოედნამდე აღწევდა და ამ ემოციებით თამაში უდავოდ გაალამაზეს.

გორის "დილასა" და "სამტრედიას" მატჩზე გორელმა გულშემატკვარმა ადგილი სპეციალურ კონსტრუქციაზე მოძებნა, რათა არც კანონი დაერღვია და არც გუნდი დაეტოვებინა მარტო...

გორელი გულშემატკივრები


იმედოვნებენ, ცხოვრება ჩვეულ რეჟიმს მალე დაუბრუნდება და ტრიბუნებზე გულშემატკივრები გამოჩნდებიან. მითი, რომ ხალხს ქართული ფეხბურთი მაინც არ აინტერესებს და რა აზრი ჰქონდა შეზღუდვების დაწესებას,  არაერთხელ გაბათილებულა. ამის მაგალითი ეს ხალხია - ვისაც უყვარს ქართული ფეხბურთი და ვისთვისაც შეზღუდვა პირობითია. კორონა ფეხბურთის სიყვარულს ვერ მოკლავს!..

1006
მკითხველის კომენტარები / 0 /
მსგავსი ამბები
რუბრიკის სხვა სიახლეები
;