მიკვირს, პენალტს ასე როგორ ვასრულებ... გიორგი კუხიანიძე ოქროს მატჩის იმედადაა

18 ნოემბერს ქუთაისის "ტორპედოს" საჩხერის "ჩიხურასთან" გასვლით შეხვედრაში ქულის დაკარგვის უფლება არ აქვს. სხვაგვარად, თბილისის "დინამოს" დაწევას და ჩემპიონობისთვის ბრძოლას ვეღარ მოახერხებს.

გუნდის ერთ-ერთი ლიდერი გიორგი კუხიანიძე "ლელოსთან" ინტერვიუში ამბობს, რომ "ჩიხურასთან" მატჩი გუნდისთვის ბევრს ნიშნავს...

- ჩვენთვის დარჩენილი სამივე შეხვედრა მნიშვნელოვანია და ერთი ქულის დაკარგვის უფლებაც არ გვაქვს. ამიტომ, ყველა ეს თამაში გადამწყვეტი იქნება.

- "დინამო" 4 ქულით გისწრებთ და გულახდილად თქვით - საკუთარი გუნდის იმედი გაქვთ თუ თბილისელთა ჩავარდნის?
- მეც პირდაპირ გეტყვით, რომ ორივეს იმედი გვაქვს. სამწუხარო ის არის, რომ მხოლოდ საკუთარ თავზე არ ვართ დამოკიდებულები. ჩვენ შემდეგი ორი თამაში უნდა მოვიგოთ, ხოლო "დინამომ" "შუქურასთან" ან "საბურთალოსთან" ქულა დაკარგოს, ბოლო ტურში ჩვენს შეხვედრას აზრი რომ ჰქონდეს.

- რას ფიქრობთ, რომელს შეუძლია, "დინამოს" ქულა წაართვას - "შუქურას" თუ "საბურთალოს"?
- ამ ჩემპიონატში ეს უკვე ორივემ მოახერხა და იმედია, ახლაც შეძლებენ. თუმცა, იმასაც ვიტყვი, რომ დარჩენილ ტურებში ჩვენ უფრო რთული მოწინააღმდეგეები გვყავს. "ჩიხურა" ჩვენთვის ძალიან უხერხული მეტოქეა, "დინამოზე" რომ არაფერი ვთქვათ. ბათუმის "დინამოს" კი გასავარდნად აქვს საქმე და ბოლომდე იომებს. მაგრამ ახლა გუნდში ისეთი მოტივაციაა, როგორიც "ტორპედოში" არასოდეს ყოფილა. სეზონი არასტაბილურად კი ჩავატარეთ, თუმცა ბოლო ეტაპზე მოვუმატეთ და გულში ხინჯად დაგვრჩება, ტიტული რომ ვერ მოვიგოთ - ჩემპიონობასაც ვგულისხმობ და თასსაც.

- მაგრამ ერთი მნიშვნელოვანი მომენტია - ჩემპიონატში თბილისის "დინამოს" ერთხელაც ვერ მოუგეთ...
- გულის სიღრმეში მაინც მჯერა, რომ ჩემპიონობის შანსი გვაქვს. ოქროს მედლის მფლობელი ბოლო ტურში უშუალო კონკურენტების მატჩში რომ გაირკვევა, ეს ჩემპიონატს ძალიან მოუხდება.

- წინასწარ მხოლოდ იმის თქმა შეიძლება, რომ თასის ფინალში შარშანდელზე ბევრად მძიმე თამაში გელით...
- ამისთვის ყველა მზად ვართ. ჩვენ ტიტულის გარეშე დარჩენას ვერ შევეგუებით, ხოლო საჩხერელები - ევროპის ლიგაზე ვერმოხვედრას. ყველაფერს რომ თავი დავანებოთ, ორივეს ამ მომქანცველი სეზონის წარმატებით დასრულება გვსურს.

- ძალიან მომქანცველი იყო სეზონი?
- ძალიან. ქართველი ფეხბურთელები ასეთ ხანგრძლივ სეზონს და ამდენ თამაშს ფიზიკურად შეუჩვევლები ვიყავით და ყველა გადაღლას ვგრძნობთ. მიმაჩნია, რომ გორში "დილასთან" წაგების მიზეზიც სწორედ გადაღლა იყო. "დილამდე", ქუთაისში უმძიმესი თამაში გვქონდა "ლოკომოტივთან", რომელსაც 4:2 მოვუგეთ. ამ თამაშმა დიდი ძალები წაგვართვა.

ხანგრძლივი სეზონის გამოცდილება რომ გვქონოდა, შესაძლოა, ძალები გადაგვენაწილებინა. ადრე 30 თამაშს ვატარებდით, ახლა კალენდრით 36 მატჩი გვიწევს და... ეს საკმაოდ დიდი ციფრია.

- კარგია ეს თუ ცუდი?
- კარგია. ასეთი ფორმატი რომ გაგრძელდეს, 2-3 წელიწადში შევეჩვევით და, შესაძლოა, დონემ ოდნავ მაინც აიწიოს. ცნობილი ამბავია, რომ ერთ თამაშს, თავისი ფსიქოლოგიური და სხვა ათასგვარი დატვირთვით, ერთი კვირის ვარჯიშიც ვერ გაუტოლდება. ფეხბურთელი თამაშებით იზრდება, წლევანდელი ჩემპიონატი კი წინა პირველობებისგან გამორჩეული იყო.

- ფინალის გორში ჩატარებაზე რას იტყვით?
- იდეა მომეწონა. გორში კარგი სტადიონი და მოედანია, იქ განათებაზე თამაში სასიამოვნო იყო. იმედი მაქვს, თასის ფინალში ტრიბუნები შეივსება და საფეხბურთო ატმოსფერო იქნება.

- წლეულს 6 პენალტი დაარტყით და ექვსივე გამოიყენეთ. ამაზე საგანგებოდ ვარჯიშობთ?
- 7 პენალტი დავარტყი, თბილისის "დინამოსთან" თასის ნახევარფინალში 11-მეტრიანების სერიასაც თუ ჩავთვლით... (იცინის) იცით, რა მიკვირს? პენალტებზე საგანგებოდ არასოდეს მივარჯიშია და თავადაც ვერ ვხვდები, ასე კარგად როგორ ვასრულებ.

- აბა, საიდან ასე კარგი პენალტები?
- ინტერნეტში პენალტების საუკეთესო შემსრულებლებს ვაკვირდები, ფეხის რა ნაწილით და როგორ ურტყამენ. გამეორებაზე ისეთი დეტალები ჩანს, რასაც ბევრი ყურადღებას არ აქცევს. არადა, ესაა ყველაზე საინტერესო...

ყოველდღიური სპორტული გაზეთი "ლელო"
1372
მკითხველის კომენტარები / 1 /
edika
0
gasagebia gorshi ganatebaze rom kargi iyo tamashi magram finali rom shadgeze 3 saatzea ))))
elene
0
ramnishvneloba aqvs. mtavaria mattvis komportuli adgili airchion rom kargad itamashon! :D
12:45 2017.11.23
მსგავსი ამბები
რუბრიკის სხვა სიახლეები
;