მილანი, ოთხწლიანი იგუაინს... და დიდი ცვლილებების მოლოდინი

"მილანი" შეტევის გაძლიერებას აპირებს. "როსონერის" სამიზნეზე "იუვენტუსის" არგენტინელი შემტევი გონსალო იგუაინია. გავრცელებული ინფორმაციით, "მილანი" 30 წლის ფორვარდს 4-წლიან კონტრაქტს და წლიური ანაზღაურების სახით 4,5 მილიონ ევროს სთავაზობს.

მას შემდეგ, რაც "იუვენტუსში" კრიშტიანო რონალდო მივიდა, იგუაინის პერსპექტივები ბუნდოვანი გახდა. მას "ჩელსიც" ეპატიჟება და მოლაპარაკებებიც მიმდინარეობს. ლონდონელთა ახალი დამრიგებელი მაურიციო სარი არგენტინელს საკუთარი ხუთი თითივით იცნობს "ნაპოლის" დროიდან.

რაც შეეხება ცვლილებებს "მილანის" მმართველობაში. გუშინ ვწერდით, რომ კლუბის ახალმა დირექტორთა საბჭომ დროებით თავმჯდომარედ აირჩია პაოლო სკარონი. თუმცა 71 წლის ბიზნესმენის როლი, შეიძლება, იმაზე ხანმოკლე აღმოჩნდეს, ვიდრე ეს მოსალოდნელი იყო. "გაძეტა დელო სპორტის" ცნობით, "მილანის" ახალი მეპატრონე, კომპანია "ელიოტ მენეჯმენტი", კლუბის მმართველობაშიც უმნიშვნელოვანეს ცვლილებებს გეგმავს.

ცნობილია, რომ ჩინელი პატრონის წასვლის კვალდაკვალ პოსტი დაატოვებინეს მარკო ფასონესაც. "მილანის" ახალი გენერალური მენეჯერი კლუბის ყოფილი ფეხბურთელი და მწვრთნელი, ბრაზილიელი ლეონარდო იქნება, ფასონეს ადგილზე კი, აღმასრულებელ დირექტორად, მოდის ივან გაძიდისი - "არსენალის" ერთ-ერთი აქციონერი და მმართველი საბჭოს თავმჯდომარე.

სამხრეთ აფრიკაში დაბადებული გაძიდისი, ვინც ერთ დროს MLშ-ის ბიზნესდირექტორი გახლდათ, მზად არის, შეეჭიდოს "მილანისთვის" ძველი დიდების დაბრუნების პროექტს და ამის ნიშნები უკვე გამოჩნდა. ცოტა ხნის წინ მან "არსენალში" მიიყვანა "თავისი" ხალხი - კევინ მისლიტანტი "დორტმუნდიდან", რომელიც უნაი ემერის სელექციაში დაეხმარება, და საფეხბურთო ურთიერთობათა დირექტორი რაულ სანლეჰი.

ასე რომ, გაძიდისს შეუძლია, "არსენალზე" ბევრი აღარ ინერვიულოს, "მეთოფეები" საიმედო ხელში არიან და ახლა შესაძლებელია, "მილანსაც" მიხედოს...

ამასობაში ცნობილი ხდება, რომ "მილანი" ყველაფერს გააკეთებს "ჩელსის" ესპანელი ფორვარდის, ალვარო მორატას გადასაბირებლად. გავრცელებული ინფორმაციით, ის ვერ ჯდება "არისტოკრატთა" ახალი თავკაცის, მაურიციო სარის გეგმებში.

ყოველდღიური სპორტული გაზეთი "ლელო"
952
მკითხველის კომენტარები / 0 /
მსგავსი ამბები
რუბრიკის სხვა სიახლეები