მილანი: კრიზისი, რომელიც უნდა დამთავრდეს!..

საერთოდ, ამ ქვეყანაზე დასასრული ყველაფერს აქვს. "მილანის" გულშემატკივართა უმრავლესობა კი, ალბათ, უკვე ცოტა სხვანაირად ფიქრობს. დრო მიდის, მათი საყვარელი კლუბის გაჭირვებას კი ბოლო არ უჩანს. "მილანში" სადღეისოდ განვითარებული მოვლენები იძლევა იმის იმედს, რომ შუქი გვირაბის ბოლოს აუცილებლად გამოჩნდება. ბოლოს და ბოლოს, ეს ხომ "როსონერია" - მილიონების საყვარელი "შავ-წითელი" კლუბი...

რატომ არის მწვრთნელი განტევების ვაცი?

ვინ მოთვლის, ბოლო დროს რამდენი მწვრთნელი გამოიცვალა "მილანმა". შედეგი კი არა და არ ჩანს. რა თქმა უნდა, მიმდინარეობს წარუმატებლობის მიზეზის ძიება. ძალიან ხშირად თუნდაც კლუბის ხელმძღვანელობის მხრიდან "განტევების ვაცად" რატომღაც სწორედ მწვრთნელს ვხედავთ ხოლმე.

სხვათა შორის, იტალიური პრესაც ძალიან ხშირად წერს "როსონერის" დამრიგებლების დაბალი კვალიფიკაციის შესახებ, მაგრამ, ჩვენი აზრით, კლუბის ამ დღეში ყოფნა ცოტა სხვა ფაქტორებით არის გამოწვეული.

სტეფანო პიოლი ახლახან მივიდა კლუბში. რა თქმა უნდა, მან ვერ შეძლო ვითარების კარდინალურად გამოსწორება და ამაში გასაკვირი არაფერია. მარტივად რომ ვთქვათ, მწვრთნელი თვითონ ვერ გავა მინდორზე და თამაშს ვერ მოიგებს. საქმე არასწორ მენეჯმენტში, არასწორად შერჩეულ შემადგენლობაში უნდა იყოს.

მენეჯმენტი

იყო პერიოდი, როცა სერია A-ს ძალიან გაუჭირდა, მაგრამ ეს დრო უკვე ისტორიის კუთვნილებაა. მაშინ თვით იტალიურ გრანდებშიც კი აღარ იდებოდა დიდი ფული და გასაგებია, რომ "მილანიც" დაიცალა ვარსკვლავებისაგან.

მერე იყო რყევები კლუბის ხელმძღვანელობაში. როცა სილვიო ბერლუსკონი მიდის, ეს უსათუოდ არის კონკრეტული რყევების მაჩვენებელი. აქედან გამომდინარე, "მილანი" დროში უნდა დალაგებულიყო და ამას საშველი არა და არ ადგება.

"როსონერის" ამერიკელმა ხელმძღვანელებმა "მილანის" ლეგენდების კლუბში დაბრუნება დაიწყეს, მაგრამ თუ დიდი ფინანსური ხელშეწობა არ იქნება, ისე ძალიან ძნელია რაიმე ღირებული შედეგის მიღწევა.

მიუხედავად ახალი ხელმძღვანელობის მისვლისა, პერმანენტულად ისმის ხმები "მილანში" არსებული ფინანსური კრიზისისა და იმის შესახებაც, რომ სახელგანთქმული და ტიტულოვანი კლუბი სესხებით გადის ფონს...

შემადგენლობა

ცნობილი და ძველი ჭეშმარიტებაა: როგორც ფეხბურთში, ისე ცხოვრებაში ყველაფერს კადრები წყვეტენ. "მილანს" ნამდვილად არ ჰყავს ისეთი შემადგენლობა, რომ "იუვენტუსს" დაეტოლოს. ამას არც არავინ ითხოვს.

გემოვნებაზე არ დავობენ, მაგრამ ბევრი იტალიელი ექსპერტის აზრით "მილანი" შემადგენლობით ჩამორჩება არა მხოლოდ "ბებერ ქალბატონს", არამედ "ინტერსაც", "ნაპოლისაც", "რომასაც" და "ლაციოსაც" კი. ალბათ, ამ მსჯელობაში არის სიმართლის მარცვალი.

რაც მთავარია, კლუბში აღარ არიან ისეთი ფეხბურთელები, რომლებმაც იციან დიდი გამარჯვებების გემო. სხვათა შორის, რაც პიოლი მივიდა კლუბში, "მილანი" ყველა შეხვედრაში ბოლომდე იბრძვის. მაგალითად, ასე იყო თუნდაც "იუვენტუსთან" შეხვედრაში, მაგრამ მარტო ბრძოლა დიდი ვერაფერი ბედენაა. სასურველი შედეგის მიღწევას კლასი სჭირდება, მეგობრებო, კლასი!

მაშველი რგოლები

რა თქმა უნდა, ყველა თანხმდება იმაზე, რომ "მილანს" სჭირდება გამორჩეული ვარსკვლავები და ისეთი მწვრთნელი, რომელსაც აქვს გრანდში მუშაობის გამოცდილება.

დიდი შანსია, მალე "როსონერიში" კარლო ანჩელოტი და ზლატან იბრაჰიმოვიჩი ვიხილოთ. "პაპა კარლო" მილანელთა დიდი გამარჯვებების შემოქმედი გახლავთ, ზლატანს კი დღესაც შეუძლია ტოპფორვარდობა.

ვნახოთ, იქნებ სწორედ ეს გახდეს "მილანის" ახალი აღმავლობის დასაწყისი. ყოველ შემთხვევაში, ანჩელოტი და ზლატანი რიგით მიზნებს ნამდვილად არ დაისახავენ...

672
მკითხველის კომენტარები / 0 /
მსგავსი ამბები
რუბრიკის სხვა სიახლეები
;