მილანმა ჯენარო გატუზოს შესაცვლელად 4 კანდიდატურა შეარჩია

თითქმის გადაწყვეტილია, რომ სეზონის ბოლოს "მილანის" მთავარი მწვრთნელი შეიცვლება და ასევე დიდი ალბათობით, ჯენარო გატუზოს მომავალი აღარ იქნება დამოკიდებული იმაზე, შეძლებს თუ არა "როსონერი" ჩემპიონთა ლიგის საგზურის მოპოვებას.

"გაძეტა დელო სპორტის" ინფორმაციით, "მილანს" გატუზოს სანაცვლოდ 4 კანდიდატურა ჰყავს შერჩეული: "რომას" ექსთავკაცი ეუსებიო დი ფრანჩესკო და "ატალანტას" დამრიგებელი ჯან პიერო გასპერინი, რომელიც 2011 წელს მცირე ხნით მეორე მილანური გრანდის, "ინტერის" მწვრთნელიც იყო, მაგრამ ხელი მოეცარა.

"გაძეტა" ამტკიცებს, რომ ეს ორი კანდიდატი მთავარია. გაფართოებულ სიაში არიან ასევე ლეონარდო ჟარდიმი ("მონაკო") და მარკო ჯამპაოლო ("სამპდორია"). სიიდან ამოვარდა "ჩელსის" დამრიგებელი მაურიციო სარი, ვისაც სეზონის ბოლოს იტალიაში დაბრუნებას უწინასწარმეტყველებენ. 

გავრცელებული ინფორმაციით, სარიმ "მილანს" უარი შეუთვალა - ლონდონიდან აბარგებას არ ვაპირებო. თუმცა ერთია, რას აპირებს სარი და მეორე - რა გადაწყვეტილებას მიიღებს რომან აბრამოვიჩი, რომელსაც მწვრთნელების ხშირ ცვლა ნამდვილად არ ესწავლება.

ყოველდღიური სპორტული გაზეთი "ლელო"
934
მკითხველის კომენტარები / 0 /
მსგავსი ამბები
რუბრიკის სხვა სიახლეები
;