მილიკენის 42 და თსუ-ჰიუნდაიმ დინამოს გაუთანაბრა

სუპერლიგის პირველივე მეოთხედფინალურ წყვილში ანგარიში გათანაბრდა. "თსუ-ჰიუნდაიმ", რომელმაც წინა დღისით სოლიდური უპირატესობა გაანიავა და "დინამოსთან" წააგო, რევანში აიღო და 87:73 გამარჯვებით სერიაში ანგარიში 1:1 გახადა. ნიკოლოზ ჩერქეზიშვილის გუნდმა სამაგალითოდ ჩაატარა მატჩის მეორე ნახევარი, რომლის დასაწყისშიც 13 ქულით აგებდა და საბოლოოდ იმდენი მოახერხა, რომ 14 ქულით იმარჯვა.

რა თქმა უნდა, თსუ-ჰიუნდაელებმა გუნდური თამაშის წყალობით მოიგეს, თუმცა განსაკუთრებით აღსანიშნავია მათი ამერიკელი ლეგიონერის, ჯეიმს მილიკენის დიდებული გარჯა, რომელმაც 42 ქულა მოაგროვა და მატჩის გმირი გახდა.
არადა, თამაშის სცენარი დასაწყისში "თსუ-ჰიუნდაისთვის" არასახარბიელოდ განვითარდა. ნიკოლოზ ჩერქეზიშვილის გაწვრთნილი გუნდი 10:0 დაწინაურდა, თუმცა დინამოელთა პასუხი სწრაფი და ზუსტი იყო. ირაკლი ხოშტარიას გუნდმა პირველივე პერიოდში მოახერხა გალიდერება, ხოლო მეორე პერიოდში თავად ასცდა 10-ქულიან სხვაობას.

დიდი შესვენებისთვის "დინამო" 49:38 იგებდა, თუმცა გასახდელიდან დაბრუნებული თსუ-ჰიუნდაელები, განსაკუთრებით კი მათი ამერიკელი ლეგიონერი ზეშედეგიანად ათამაშდნენ. ჯეიმს მილიკენმა ბურთი ბურთზე ჩააგდო, არც პასებს ივიწყებდა, მას თანაგუნდელებიც რომ აჰყვნენ, "თსუ-ჰიუნდაიმ" 11-ქულიანი ჩამორჩენა მე-3 პერიოდშივე აქცია ლიდერობად და ბოლო ათწუთეულის წინ 65:60 დაწინაურდა.

თამაშის ბედიც აქ გაირკვა. მესამე პერიოდის შემდეგ "დინამომ" ვეღარ მოახერხა კალაპოტში ჩაგდგომა, "თსუ-ჰიუნდაიმ" კი თამაშის ბოლომდე ლიდერობა კიდევ უფრო გაიმყარა და დამჯერებელი სხვაობით იმარჯვა.

თსუ-ჰიუნდაელებს 42 ქულით მილიკენმა ულიდერა. 12 ქულა მარკუს პოზლიმ, ხოლო 11 – გიორგი კორსანტიამ მიითვალეს. "დინამოში" 18 ქულით ბომბარდირი გახდა რეჯერ დოუელი, ხოლო დემაგოი ბუბალომ 15 ქულა და 10 მოხსნა მიითვალა.

მეოთხედფინალური სერია 3 მოგებამდეა. სერიაში ანგარიში 1:1-ია, მომდევნო მატჩი კი 5 მაისს გაიმართება.

***

ლექსო ლაფანაშვილის გაწვრთნილმა "დელტამ" სუპერლიგის მეოთხედფინალური სერიის მეორე მატჩიც მოუგო "ოლიმპს" და ნახევარფინალს 1 ნაბიჯით მიუახლოვდა. 2 მაისის შეხვედრა წინამორბედს ძალიან ჰგავდა. "დელტა" მთელი თამაშის მანძილზე იგებდა, შუაწლში უფრო დამაჯერებლად, "ოლიმპი" კი ჩამორჩენის გაბათილებას ცდილობდა. დიმიტრი ჟაკობოვის გაწვრთნილმა გუნდმა ბოლო წუთებზე მოახერხა ჩამორჩენის იმდენად შემცირება, რომ მოგების შანსი გაუჩნდა, თუმცა გადამწყვეტ წუთებში "დელტამ" იყოჩაღა, მეტოქეს თამაშის შემობრუნების შანსი არ მისცა და 74:69 გაიმარჯვა.

პირველი პერიოდი დელტელებმა 22:14 მოიგეს, დიდი შესვენებისთვის კი ლიდერობა 12 ქულამდე გაზარდეს. მესამე ათწუთეულში "ოლიმპმა" თამაში გამოასწორა. დაცვისა და სწრაფი შეტევების ხარჯზე ჩამორჩენის გაბათილება იწყო და დასკვნითი მეოთხედის წინ მეტოქეს 7 ქულით მიუახლოვდა – 54:60. ბოლო პერიოდში ოლიმპელებმა თამაში კიდევ უფრო დაძაბეს. შეხვედრის დასრულებამდე 3 წუთით ადრე დეფიციტი 3 ქულამდე შეამცირეს, თუმცა ბექა ბექაურის შედეგიანობით "დელტამ" სირენამდე 1 წუთით ადრე 8-ქულიანი ჰანდიკაპი მოიპოვა.

მიუხედავად გამოუვალი მდგომარეობისა, "ოლიმპმა" რეალური შანსი მოიპოვა: რეზო როგავამ 3-ქულიანი ჩააგდო, ფარქვეშიდან შემოტანილი ბურთი კი ოლიმპელმა ჩარლზ ბენეტმა ერიკ ნოთიჯს ჩაუჭრა, ხოლო როგავამ ზუსტი ორქულიანით დასრულებამდე 24 წამით ადრე ჩამორჩენა 3 ქულამდე შეამცირა. "ოლიმპის" პრესინგმა გაამართლა და "დელტამ" ბურთი დაკარგა. 3 ქულით ჩამორჩენილ "ოლიმპს" 17 წამი ჰქონდა, მაგრამ რეზო როგავას გამთანაბრებელი სამქულიანი კალათში არ ჩაეშვა, "დელტამ" საჯარიმოები მიითვალა და თამაშის ბედიც აქ გადაწყდა.

გამარჯვებულთაგან 22 ქულით და 10 მოხსნით საუკეთესო იყო ბექა ბექაური. 13 ქულა და 9 მოხსნა ერიკ ნოთიჯის ანგარიშზე დაგროვდა, საბა ლობჯანიძემ და არტიომ შვეცმა 12-12 ქულა მოაგროვეს. "ოლიმპში" 14-14 ქულით რეზო როგავა, ნიკა დარბაიძე და მარკ ოგდენი გამოირჩნენ.

სერის მომდევნო მატჩი 5 მაისს, 18:00 საათზე გაიმართება.

ყოველდღიური სპორტული გაზეთი "ლელო"
326
მკითხველის კომენტარები / 0 /
მსგავსი ამბები
რუბრიკის სხვა სიახლეები
;