მილტონ ჰეიგი: არც ჩემს გადადგომას გამოვრიცხავდი

* რაგბის კავშირმა "ბორჯღალოსნების" ორი ავსტრალიელი მწვრთნელი გაუშვა
* მილტონ ჰეიგის თქმით, ნაკრებმა ფიჯის რეალური ძალა დაუმალა
* რაგბის კავშირი ადასტურებს, რომ ევროპის ჩემპიონატზე ლაპარაკი მიმდინარეობს

საქართველოს ნაკრების ივნისის ტესტებზე წარუმატებელ ასპარეზობას ორი ავსტრალიელი მწვრთნელი რიჩი გრემი და ბრედ ჰარისი "შეეწირა".

რაგბის კავშირის ხელმძღვანელობამ, "ბორჯღალოსნების" მთავარ მწვრთნელთან კონსულტაციის შემდეგ და გამგეობის თანხმობით, ავსტრალიელი მწვრთნელები თანამდებობიდან გაათავისუფლა. შეგახსენებთ, რომ გრემს უკანა ხაზის, ხოლო ჰარისს შერკინების გაწვრთნა ევალებოდათ და შესაბამისად პასუხსაც შესაბამისი რგოლების გამართულად თამაშზე აგებდნენ.

ივნისის ტესტებზე ტონგასთან გამარჯვების შემდეგ "ბორჯღალოსნებმა" ჯერ ფიჯის ეროვნულ გუნდთან წააგეს - 15:37, ხოლო მერე იაპონიაში მასპინძლებთან მშრალი ანგარიშით დამარცხდნენ 0:28. ამ შეხვედრებში საქართველოს ნაკრებმა მიჯრით 120 წუთის განმავლობაში ქულების მოპოვება ვერ შეძლო.

მშრალი ანგარიშით კი, ისტორიაში მეორედ დამარცხდა. ერთი სიტყვით, საქართველოს ნაკრებს ადრეც წაუგია და მომავალშიც, ცხადია, არაერთხელ წააგებს, მაგრამ წაგებაც არის და წაგებაც. მსოფლიოს რაგბის გველეშაპებთან, ინგლისთან და ახალ ზელანდიასთან გვითამაშია და მშრალად მათთანაც კი არ დავმარცხებულვართ. მეტიც, თამაშის ხარისხით იმდენად კმაყოფილი ვიყავით, რომ ჩვენი გუნდით სამართლიანად ვამაყობდით. ახლა, ივნისის ტესტებზე ასე არ მოხდა. რაგბის კავშირიც დაფიქრდა და გადაწყვიტა დროულად რეაგირება.

პრესკონფერენციაზე, რომელიც რაგბის კავშირის ოფისში გაიმართა, მედიის წინაშე რაგბის კავშირის პრეზიდენტი გოჩა სვანიძე და ეროვნული ნაკრების თავკაცი მილტონ ჰეიგი წარსდგნენ.

გოჩა სვანიძე, საქართველოს რაგბის კავშირის პრეზიდენტი:

"ივნისის ტესტებზე საქართველოს ნაკრების ტურნეს წარმატებულს ვერაფრით დავარქმევთ. ცხადია, უკმაყოფილო არა მარტო შედეგით, არამედ თამაშის ხარისხითაც ვართ.

შედეგად, საქართველოს ნაკრების მთავარ მწვრთნელთან, მილტონ ჰეიგთან, კონსულტაციის შედეგად და რაგბის კავშირის გამგეობის გადაწყვეტილებით, ნაკრების შემადგენლობა ორმა ავსტრალიელმა მწვრთნელმა - ბრედ ჰარისმა და რიჩარდ გრემმა - დატოვა.

ცხადია, ამ გადაწყვეტილების მიღება არ იყო მარტივი. იმის გამო, რომ თავიდან აგვეცილებინა უარესი შედეგი, გადავწყვიტეთ, მათთან კონტრაქტი გაგვეწყვიტა. ისინი ამის შესახებ ინფორმირებულნი არიან. პიროვნულად მათ არაფერს ვერჩით. ორივე მათგანი ღირსეული ადამიანია. ვადასტურებ, რომ რიჩი გრემი მაღალი დონის სპეციალისტია, მაგრამ სამწუხაროდ, მან და ჰარისმა ვერ შეძლეს სათანადო კომუნიკაციის დამყარება მოთამაშეებთან.

ეს გადაწყვეტილება მარტო ივნისის ტესტების გამო არ მიგვიღია. პირდაპირ შეიძლება ითქვას, რომ ბოლო ერთი წლის განმავლობაში ნაკრების თამაშის ხარისხი უკეთესის სურვილს ტოვებდა."

მილტონ ჰეიგი, საქართველოს ნაკრების მთავარი მწვრთნელი:

"ივნისის ტესტებზე განცდილი მარცხის შემდეგ მწვრთნელების პასუხისმგებლობის საკითხი დადგა. შედეგი არის ის, რომ მწვრთნელებს მოუწიათ თანამდებობის დატოვებამ. შესაძლებელი იყო, რომ პოსტი მეც დამეტოვებინა.

ჩვენი ნაკრების მორაგბეების, მწვრთნელებისა და რაგბის კავშირის ყოველდღიური საქმიანობა მიმართულია იქითკენ, რომ წარმატებით ვიასპარეზოთ იაპონიაში გასამართავ მსოფლიოს თასზე. ამ მიზნის მისაღწევად ყველაფერი უნდა გავაკეთოთ. უმნიშვნელოვანესი თამაში გვაქვს წლეულს იტალიის ნაკრებთან. ეს მატჩი აუცილებლად უნდა მოვიგოთ და ნოემბრის ტესტებზეც ზოგადად წარმატებით უნდა ვიასპარეზოთ.

ბოლო ოთხი კვირის განმავლობაში გრემთან და ჰარისთან მუდმივი კომუნიკაცია გვქონდა. ცხადია, სასიამოვნო არ არის, როცა სამსახურს კარგავ. ივნისის ტესტებზე წარუმატებელი თამაში, ცხადია, მხოლოდ მათი ბრალი არ არის. როცა ვიგებთ, ყველა, მთელი გუნდი ვიგებთ და ასეა წაგების შემთხვევაშიც. ყველა ინაწილებს თავის წილ პასუხისმგებლობას.

ვინ შეცვლის მათ ჯერ ცნობილი არ არის. მთავარია, თვითონ როგორი დონის სპეციალისტები იქნებიან. მნიშვნელოვანია, თვითონ რას ფიქრობენ, როგორ უნდა განვითარდეს საქართველოს ნაკრები. ვფიქრობ, განვითარების გენერალური გეგმა არ შეიცვლება, თუმცა კორექტივების გაკეთება გამორიცხული არ არის. ჩვენი გუნდი ის აღარ არის, რაც რვა წლის წინათ იყო და ეს ამ გეგმის მუშაობის დამსახურებაა.

ფიჯის ნაკრებთან მეორე ტაიმში რამდენიმე უხეში შეცდომა დავუშვით. კარგად ვიცოდით, რომ მათთვის ბურთი არ უნდა მიგვეცა, მაგრამ სამწუხაროდ ასე მოხდა. ამას დაერთო ინდივიდუალური შეცდომები.

იაპონიაში კი, სიმართლე უნდა ითქვას, რომ ასეთ ცუდ ბუნებრივ პირობებში არასდროს გვითამაშია. მერე ჩვენი მიზანი იყო რაკში და ძალისმიერ თამაშში დაგვეჯაბნა მეტოქე. მოხდა პირიქით, იაპონელებმა გვაჯობეს და ეს ერთგვარი შოკი იყო გუნდისთვის. ამ მდგომარეობიდან გამოსვლა და თამაშის გადაწყობა გაგვიჭირდა.

გასათვალისწინებელია, რომ იაპონიის ნაკრების წევრების უმრავლესობა ზე რაგბის გათამაშებაში ასპარეზობს. სად თამაშობენ ჩვენები, კარგად ვიცით. ამას თავის გასამართლებლად არ ვამბობ. ეს ფაქტია.

ფიზიკურ კონდიციებს კიდევ ეშველება, ამას გამოვასწორებთ, მაგრამ აი, დანარჩენის გაუმჯობესებას ძალიან დიდი შრომა დასჭირდება.
ტურნეში ნომონალური რვა ნომრის გარეშე მოგვიწია გამგზავრებამ. ბექა ბიწაძე და ლაშა ლომიძე არასათანადო სპორტულ ფორმაში იყვნენ. ეს პოზიცია ოთარ გიორგაძეს ვანდეთ. ერთი მხრივ, ცხადია, ეს ცუდია, მაგრამ, ხომ შეიძლება მსოფლიოს თასზე იმავე სიტუაციაში აღმოვჩნდეთ. ამიტომ, საამისოდ მზად უნდა ვიყოთ და, ვფიქრობ, კარგი გაკვეთილი, სასარგებლო გამოცდილება მივიღეთ.

ფიჯისთან მატჩში მათი შერკინების კარგი თამაში არ გაგვკვირვებია. 2014 წელს მათთან ერთობლივი ვარჯიში გავმართეთ და მაშინაც სერიოზული წინააღმდეგობა გაგვიწიეს. 2016 წელს ფიჯიში დამაჯერებლად მოვუგეთ. აქედან მოყოლებული, ორი წლის განმავლობაში ფიჯელები რევანშის ასაღებად ემზადებოდნენ და ისინი უფრო მოტივირებულნი აღმოჩნდნენ, ვიდრე ჩვენ. ფიჯისთვის მნიშვნელოვანი იყო, რომ ჩვენთვის მოეგო. ჩვენთვის მნიშვნელოვანი კი, იაპონიაში მათი დამარცხებაა და ბანქოც ბოლომდე არ გაგვიხსნია.

ახალგაზრდულმა ნაკრებმა მსოფლიოს ჩემპიონატზე შესანიშნავად იასპარეზა. ამ გუნდის ერთი წევრი გელა აფრასიძე სულაც ეროვნული ნაკრების მოთამაშეა. მან ბრწყინვალედ იასპარეზა.

აღსანიშნავია, ასევე მგეზავ თედო აბჟანდაძის თამაში. მან ეროვნულ გუნდთან ერთად რამდენჯერმე ივარჯიშა, მაგრამ თამაშმა არ მოუწია. ისინი გუნდის ლიდერები და ამ ჩემპიონატზე გამორჩეულები იყვნენ. არიან ასევე სხვა მორაგბეებიც, რომლებმაც თავი ძალიან კარგად წარმოაჩინეს.

საგულისხმოა, რომ 20-წლამდელთა დონეზე ვარსკვლავური თამაში გარანტია არ არის საიმისოდ, რომ ეროვნულ ნაკრებში სათანადოდ თამაში შეძლო. ერთი სიტყვით, ჩვენ ყველას ვაკვირდებით და ყველას ექნება შანსი, ეროვნულ ნაკრებში დაიმკვიდროს ადგილი."

პრესკონფერენციის ბოლოს რაგბის კავშირის პრეზიდენტმა ეროვნული ნაკრების რომელიმე სერიოზულ ტურნირზე ჩართვის ალბათობაზეც ისაუბრა:

"ჩვენ საქმე ასარჩევად არ გვაქვს. რომელ ტურნირშიც მიგვიღებენ, იქ ვითამაშებთ. ეს ჩვენი ნაკრებისთვის და ზოგადად ქართული რაგბის განვითარებისთვის სასიცოცხლოდ მნიშვნელოვანია.

ჩვენ მზად ვართ არა მარტო კელტთა ლიგაში, ანუ ევროპაში, არამედ სამხრეთ ნახევარსფეროს უმაღლესი დონის ტურნირში, ზე რაგბის გათამაშებაში მივიღოთ მონაწილეობა. საქმე ისაა, რომ ეს ყველაფერი ჯერ მხოლოდ ლაპარაკია. შარშან ამ თემაზე უფრო აქტიურად გვქონდა მოლაპარაკებები. ვნახოთ, რა იქნება. ვფიქრობ, ჩვენი ქვეყნის მთავრობა, ზოგადად სახელმწიფო, გვერდში დაგვიდგება და საერთაშორისო სპონსორის მოძებნაც არ გაგვიჭირდება.

ლაპარაკია ევროპის ჩემპიონატის გამართვის შესახებაც. ჩვენთვის მნიშვნელობა არა აქვს რა ფორმატი იქნება. რაც უნდათ, ის დაარქვან. ჩვენ წელიწადში 4-5 მაღალი დონის ტესტი გვჭირდება და ვნახავთ, რომ უფრო მეტი და სწრაფი წინსვლა გვექნება, ვიდრე იმ ქვეყნებს, რომლებსაც ჩვენზე უკეთესი ფინანსური მდგომარეობა აქვთ."

ყოველდღიური სპორტული გაზეთი "ლელო"
1754
მკითხველის კომენტარები / 0 /
მსგავსი ამბები
რუბრიკის სხვა სიახლეები
;