მილტონ ჰეიგი: დროა შევქმნათ ქართული რაგბის ისტორია

საქართველოს ნაკრები ნოემბრის ტესტების პირველ მატჩს 11 ნოემბერს, თბილისში ეროვნულ სტადიონზე კანადის ნაკრების წინააღმდეგ გამართავს.

"ბორჯღალოსნები" უკვე "შევარდენის სანაკრებო ბაზაზე" არიან და მომავალი მატჩისთვის ემზადებიან. მილტონ ჰეიგმა იმ 34 მორაგბიდან, რომლებიც საფრანგეთში სამდღიან შეკრებაზე იახლა, ორი, შერკინების კვაჭი ბადრი ალხაზაშვილი (ტულონი) და მეორეხაზელი ვახტანგ მაისურაძე (ვანი) აღარ გამოიძახა. ტრავმის გამო შერკინების ბურჯ დავით ქუბრიაშვილის (მონპელიე) ნაცვლად მწვრთნელებმა ლაშა ტაბიძეს (ბორდო), ხოლო მესამეხაზელი ოთარ გიორგაძის (კლერმონი) ნაცვლად გიორგი ცუცქირიძეს (ბრივი) უხმეს.

მილტონ ჰეიგი: "ჩემთვის დიდი პატივია დავასახელო "ბორჯღალოსნების" შემადგენლობა 2017 წლის ნოემბრის ტესტებზე, "თიბისი რაგბის სერიებისთვის". მიგვაჩნია, რომ 2-3 მორაგბის გარდა, რომლებიც ტრავმების გამო მოვისაკლისეთ, საკმაოდ გამოცდილ გუნდს მოვუყარეთ თავი.

ყოველი წლის ნოემბრის ტესტები განსაკუთრებულად რთულია, რადგან მეტოქეებად ძლიერი გუნდები გვყავს. მიუხედავად იმისა, რომ ივნისში კანადა და ამერიკა სტუმრად დავამარცხეთ, გამონაკლისი არც ეს ნოემბერი იქნება. ვიცით, რომ ისინი საქართველოში უდიდესი მოტივაციით და რევანშის წყურვილით ჩამოდიან.

ეს ჩვენთვის ძალიან კარგი გამოწვევაა. თუ ზედმეტად თავდაჯერებულები ვიქნებით, არაფერი გამოგვივა. ჩვენი მიზანია, რომ ივნისში ნაჩვენები თამაშის ხარისხი გავაუმჯობესოთ და ისეთი შემტევი რაგბი ვაჩვენოთ, რომლითაც ქომაგი იამაყებს.

უელსთან თამაში მნიშვნელოვანია არა მხოლოდ მათთვის, ვინც მოედანზე გავა, არამედ მთელი ქვეყნისა და ქართული რაგბისთვის. უელსი ლეგენდარული გუნდია და ლეგენდარულ სტადიონზე გვიმასპინძლებს. "პრინსიპალიტი სთედიუმზე" ბოლოს 2015 წლის მსოფლიოს თასზე, მსოფლიოს საუკეთესო გუნდს, "ოლ ბლექსს" ვეთამაშეთ. იმ მატჩში ძალიან კარგად გავისარჯეთ და წელს გვინდა მთელ სამყაროს ვანახოთ, რომ მსოფლიოს საუკეთესო გუნდების წინააღმდეგ უკეთ თამაშიც შეგვიძლია.

უელსთან თამაში მნიშვნელოვანია არა მხოლოდ მათთვის, ვინც მოედანზე გავა, არამედ მთელი ქვეყნისა და ქართული რაგბისთვის

ჩვენ მზად ვართ შევქმნათ რაღაც განსაკუთრებული. ბევრი ვიშრომეთ იმაზე, რომ მოთამაშეები სწორ გარემოში მოხვდნენ, რაც მათ ხელს შეუწყობს მოედანზე სრული პოტენციალის გამოვლენაში. დროა დავიჯეროთ, რომ ჩვენ ყველაფერი შეგვიძლია. დროა გავიდეთ მოედანზე და შევქმნათ ქართული რაგბის ისტორია."

შეგახსენებთ, რომ კანადის ნაკრებმა გასულ უქმეებზე ვანკუვერში ახალზელანდიელ მაორებს უმასპინძლა და 9:51 დამარცხდა.

თბილისში შეხვედრა შაბათს, ეროვნულ სტადიონზე 18 საათზე დაიწყება.

საქართველოს ნაკრები
პირველი ხაზი: მიხეილ ნარიაშვილი (მონპელიე), კარლენ ასეიშვილი (ბრივი), ზურაბ ჟვანია (სტად ფრანსე), ჯაბა ბრეგვაძე (კრასნი იარი), შალვა მამუკაშვილი (კარკასონი), ლევან ჩილაჩავა (ტულონი), სოსო ბეკოშვილი (ბრივი), ლაშა ტაბიძე (ბორდო);
მეორე ხაზი: გიორგი ნემსაძე (ბრისტოლი), გიორგი ჩხაიძე (დომონი), კონსტანტინე მიქაუტაძე (მონპელიე);
მესამე ხაზი: ვიქტორ კოლელიშვილი (კლერმონი), შალვა სუთიაშვილი (ანგულემი), გიორგი თხილაიშვილი (ბათუმი), ლაშა ლომიძე (ლონდონ აირიში), ბექა ბიწაძე (ნარბონი), გიორგი ცუცქირიძე (ბრივი);
#9: ვასილ ლობჟანიძე (ბრივი), გიორგი ბეგაძე (ლოკომოტივი), გელა აფრასიძე (მონპელიე);
#10: ლაშა ხმალაძე (ბათუმი), ლაშა მალაღურაძე (კრასნი იარი), რეზო ჯინჭველაშვილი (არმაზი);
#12-13: დავით კაჭარავა (ენისეი), მერაბ შარიქაძე (ორიაკი), გიორგი კოშაძე (ხარები);
#11-14: ალექსანდრე თოდუა (ლელო), სოსო მათიაშვილი (აკადემია), გიორგი კვესელაძე (არმაზი);
#15: მერაბ კვირიკაშვილი (ლელო), მირიან მოდებაძე (აია), ბექა წიკლაური (ლოკომოტივი).

(იბეჭდება მცირე ცვლილებით)
ყოველდღიური სპორტული გაზეთი "ლელო"
1629
მკითხველის კომენტარები / 1 /
ნიკა
0
მაგარია
მსგავსი ამბები
რუბრიკის სხვა სიახლეები
;