მილტონ ჰეიგი: სამი მოგება გვქონდა დაგეგმილი

საქართველოს ნაკრების მთავარი მწვრთნელი მილტონ ჰეიგი აშშ-სთან მატჩის შემდეგ კმაყოფილი ჩანდა.

25 ნოემბერს, "ბორჯღალოსნებმა" წლის ბოლო, ნოემბრის ტესტ-სერიის მესამე შეხვედრა აშშ-ის ნაკრებთან გამართა და უაღრესად დაძაბულ ბრძოლაში, ანგარიშით 21:20 გაიმარჯვა.

- ბორჯღალოსნებმა 2017 წელი აშშ-ის ნაკრების ძლევით დაასრულეს

"პირველ ტაიმში იყო რამდენიმე მომენტი, როცა შეიძლებოდა ანგარიში გაგვეზარდა. ეს რომ გაგვეკეთებინა, მეორე ნახევარს კომფორტიული სხვაობით შევხვდებოდით და იმ წნეხსაც ავერიდებოდით, რაც მეორე ტაიმში განვიცადეთ. სამწუხაროდ, ეს ვერ მოვახერხეთ და ამიტომაც იყო, ბოლო წუთები დაძაბული რომ გამოვიდა.

კმაყოფილი ვარ კვესელაძით, რომელიც პირველად იყო სასტარტო შემადგენლობაში და დაკისრებულ საქმეს კარგად გაართვა თავი. ასევე ბრწყინვალე იყო აფრასიძე, სათადარიგოთა სკამიდან კარგად ჩაერთო თამაშში.

ნოემბრის ტესტების წინ სამი მოგება გვქონდა დაგეგმილი, ორში გავიმარჯვეთ, ხოლო უელსთან ბოლომდე ვინარჩუნებდით წარმატების მიღწევის შანსს. თუმცა უნდა გავითვალისწინოთ, რომ ეს რაგბია, შენს წინააღმდეგ შენნაირი 15 მორაგბე დგას და მათაც შენნაირად სურთ გამარჯვება.

საერთო ჯამში, კმაყოფილი ვარ. ამ ტესტების შედეგად აღმოვაჩინეთ რამდნიმე ახალგაზრდა, რომლებსაც შეგვიძლია მსოფლიოს თასზე დავეყრდნოთ".

პრესკონფერენციაზე "ბორჯღალოსნების" კაპიტანმა მერაბ შარიქაძემაც ისაუბრა:

"ამერიკასთან ყოველთვის თანაბრად ვთამაშობთ. არც ამჯერად ყოფილა გამარჯვება იოლი. ეს გუნდი იმ ნაკრებთა კატეგორიიდანაა, რომლებიც უხერხულ მეტოქეებად ყალიბდებიან.

ჩვენ კი მუდმივად უნდა განვვითარდეთ და უხერხულ მეტოქეებს ისე უნდა ვაჯობოთ, რომ საქმე ბოლო წამებამდე საორჭოფოდ არ მივიყვანოთ.

სხვათა შორის, ერთ დროს კანადაც იყო უხერხული მოწინააღმდეგე, მაგრამ ორი კვირის წინ დიდი სხვაობით მოვიგეთ. მადლობა ბიჭებს, მთავარია გავიმარჯვეთ".

3681
მკითხველის კომენტარები / 0 /
მსგავსი ამბები
რუბრიკის სხვა სიახლეები
;