მილტონ ჰეიგი: ჩვენი მიზანია, გავიდეთ და მოვიგოთ!

24 ნოემბერს, საქართველოს მორაგბეთა ეროვნული ნაკრების მთავარმა მწვრთნელმა მილტონ ჰეიგმა და კაპიტანმა მერაბ შარიქაძემ, აშშ-ის ნაკრებთან ნოემბრის ტესტ-მატჩის წინ პრესკონფერენცია გამართეს.

თამაში ხვალ მიხეილ მესხის სახელობის სტადიონზე 18:00 საათზე დაიწყება.

- შემადგენლობაში ხუთი ცვლილებაა, რითი არის ეს განპირობებული?
- დატვირთული ორი კვირა გვქონდა, ამ თამაშებს ახლდა მგზავრობა. ახალი ბიჭებით მეტ ენერგიას შემოვიტანთ, გუნდი ცოტათი განახლდება და ამ მორაგბეებსაც მიეცემათ თამაშის საშუალება. ბუნებრივია, ეს ცვლილებები ამით არის განპირობებული.

- ერთით მეტი მორკინალი გვყავს განაცხადში, რატომ?
- მორკინალებს საკმაოდ დიდი შრომის გაწევა მოუწიათ გასულ თამაშებში. იმის გათვალისწინებით, რომ აშშ-ის ნაკრები ფიზიკურად ძლიერი გუნდია, შემადგენლობა გავაძლიერეთ.

განსაკუთრებული ამბავია - ბოლო თვის განმავლობაში სამი ცენტურიონი გვეყოლება... ამ ჯგუფს გიორგი ჩხაიძეც შეუერთდება. მსოფლიო რაგბიში ბევრი არაა ასეთი მორაგბე.

- როგორი გუნდია აშშ-ის ნაკრები?
- ფიზიკურად საკმაოდ ძლიერი გუნდია, უყვართ ბურთის განზე გატანა. მეორე და მესამე ხაზში ჰყავთ კარგი მორაგბეები. საკმაოდ კარგი და სწრაფი უკანახაზელები ჰყავთ, განსაკუთრებით გამოსაყოფი ფრთის მოთამაშეები არიან.

- უელსთან "დინამოზე" რომ გვეთამაშა, იმ ლელოს დადებას შევძლებდით?
- შინ თამაში ყოველთვის ჯობია. ყოველთვის უფრო მეტ ენერგიას ვიღებთ, როცა საქართველოში ვთამაშობთ.

- გვყავს თუ არა ოპტიმალური შემადგენლობა საიმისოდ, რათა ხვალინდელი თამაში მოვიგოთ?
- მნიშვნელობა არა აქვს, ვის ვეთამაშებით, მოცემული სიტუაციიდან ყოველთვის საუკეთესო გუნდს ვარჩევთ. ჩვენი მიზანია მოედანზე გავიდეთ და მოვიგოთ.

მერაბ შარიქაძე:

"ყველაზე დიდი ზეწოლა მოდის ხვალინდელ თამაშზე. ყველას აინტერესებს, უელსთან თამაში გამოგვივიდა, თუ ეს არ იყო შემთხვევით და მართლა ასეთი კარგი გუნდი ვართ. ჩვენ უნდა დავამტკიცოთ ჩვენი შესაძლებობები".

მომზადებულია SPORTALL.GE-ს მიხედვით

1295
მკითხველის კომენტარები / 0 /
მსგავსი ამბები
რუბრიკის სხვა სიახლეები
;