მილტონ ჰეიგი BBC SPORT- თან: ჩვენი განვითარებისთვის საჭიროა, რომ მომდევნო ნაბიჯი იყოს ფრანჩაიზის შექმნა

პოპულარულმა ბრიტანულმა გამოცემამ BBC SPORT-მა საქართველოს ნაკრების ინგლისში ყოფნით ისარგებლა და „ბორჯღალოსნების“ მთავარ მწვრთნელს მილტონ ჰეიგს მომავლის გეგმებზე ჰკითხა.

ჩვენი ნაკრების თავკაცმა გაამხილა, რომ საქართველოს რაგბის კავშირი კელტთა ლიგის ანუ PRO-14 ხელმძღვანელებთან მოლაპარაკებას აწარმოებს.
გთავაზობთ ამონარიდს ამ პუბლიკაციიდან:

„საქართველოს ნაკრები მეორე დონის ქვეყნებს შორის ნამდვილად ერთ-ერთი საუკეთესო გუნდია. მას საშუალება არ ეძლევა რეგულარულად ითამაშოს უფრო მაღალი დონის გუნდებთან. თუმცა, ქართველთა თავკაცმა ჩვენთან საუბრისას თქვა, რომ უკვე მიდის მოლაპარაკებები რომელიმე მაღალი დონის ტურნირზე ქართული ფრანჩაიზის ჩართვის თაობაზე.

ჩვენ რეალურად ვაწარმოებდით მოლაპარაკებებს სხვადასხვა შეჯიბრებების ორგანიზატორებთან. PRO-14 რეგულარულად აცხადებდა თავისი რიგების გაზრდის თაობაზე. ვფიქრობ, მომდევნო ორი წლის განმავლობაში ეს შესაძლებელი იქნება.

ჩვენი განვითარებისთვის საჭიროა, რომ მომდევნო ნაბიჯი იყოს ფრანჩაიზის შექმნა და რომელიმე ტურნირზე ასპარაზობაა. ეს შეიძლება იყოს ქარის თასი, ზე რაგბი, ან PRO-14. ისე როგორც სხვა ქვეყნებს, კიდევ უფრო წინსვლისთვის, ერთგვარი ტრამპლინი გვჭირდება. სასურველია, რომ ეს ტრამპლინი იყოს ევროპული.“ - თქვა მილტონ ჰეიგმა.

მიუხედავად იმისა, რომ საქართველო მსოფლიოს კლასიფიკაციაში მე-12 ადგილზეა, ექვსი ერის აღმასრულებელმა დირექტორმა ბენ მორელმა კატეგორიულად გამორიცხა ტურნირის ფორმატში რაიმე ცვლილების განხორციელება უახლოეს მომავალში.

„რა თქმა უნდა, გულდასაწყვეტია, რადგან გვაქვს იმედი, რომ ისინი უფრო მეტ რისკზე წავლენ და ერთ დღეს ტურნირის კარს გახსნიან. მესმის, რომ სუფთა ბიზნესის კუთხით, ეს შესაძლოა საინტერესო არ იყოს. მაგრამ ჩვენ ვეცდებით, ყოველ ჯერზე, ყოველ ტესტზე რეპუტაცია გავიმყაროთ და ვნახოთ, მომავალში რა მოხდება.

ახლა, უკვე მეორედ ინგლისის ნაკრებთან ერთობლივ ვარჯიშებს ვმართავთ. რისთვისაც დიდ მადლობას ვუხდით ედი ჯოუნზს და ინგლისური რაგბის მესვეურებს. ეს ჩვენთვის ძალიან სასარგებლოა“. - დასძინა მილტონ ჰეიგმა.

ყოველდღიური სპორტული გაზეთი "ლელო"
1046
მკითხველის კომენტარები / 0 /
მსგავსი ამბები
რუბრიკის სხვა სიახლეები
;