მილტონ ჰეიგმა შემადგენლობა დაასახელა - ოთხი დებიუტანტით

საქართველოს ნაკრებმა ნოემბრის ტესტებისთვის მზადება დაიწყო. ჩვენი ეროვნული გუნდის ის წევრები, რომლებიც ქართულ კლუბებში თამაშობენ "შევარდენის სანაკრებო ბაზაზე" შეიკრიბნენ და გეზი საფრანგეთისკენ აიღეს, სადაც საწვრთნელ შეკრებას გაივლიან.

საქართველოს ნაკრების ახალზელანდიელმა მწვრთნელმა მილტონ ჰეიგმა ნოემბრის ტესტებისთვის 34 მორაგბეს უხმო, რომელთა შორის ოთხი დებიუტანტია. ესენია: მგეზავი თედო აბჟანდაძე (აია), მეორეხაზელი გრიგორ ქერდიყოშვილი (ლელო), და შერკინების ბურჯები გურამ გოგიჩაშვილი (რასინგი) და ბექა გიგაშვილი (გრენობლი).

ტრავმები მოირჩინეს და საკმაოდ დიდი პერიოდის გაცდენის შემდეგ ნაკრებს დაუბრუნდნენ გიორგი კოშაძე (ხარები), დავით ქუბრიაშვილი (გრენობლი), ბექა გორგაძე (ბორდო), ბექა ბიწაძე (ნარბონი) და გიორგი აფციაური (ლოკომოტივი).

ნაკრებს ტრავმების გამო საკმაოდ სერიოზული დანაკლისი აქვს. ესენია: პირველი ხაზი - ანტონ ფეიქრიშვილი (კარდიფი), კარლენ ასიეშვილი (ბრივი), მეორე ხაზი - გიორგი ნემსაძე (ოსფრიზი), კონსტანტინე მიქაუტაძე (მონპელიე), მესამე ხაზი - გიორგი თხილაიშვილი (ბათუმი), ვიქტორ კოლელიშვილი (კლერმონი), უკანა ხაზი - დავით კაჭარავა (ენისეი), მერაბ კვირიკაშვილი (ლელო), მირიან მოდებაძე (აია).

მილტონ ჰეიგმა ამჯერად ნაკრებში არ გამოიძახა გიორგი ფრუიძე (კრასნი იარი), მიხეილ გაჩეჩილაძე (ენისეი) და გიორგი ჩხაიძე (კანი).
მილტონ ჰეიგი, საქართველოს ნაკრების მთავარი მწვრთნელი:

"ძალიან რთულ სიტუაციაში ვართ, რადგან ტრავმების გამო ბევრი გამოცდილი მოთამაშე გვაკლია. სხვა მხრივ, ესაა უნიკალური შესაძლებლობა მათთვის, ვინც ნაკრებში ტრავმირებულების ადგილს დაიკავებენ. მათ ექნებათ შესაძლებლობა, დაგვანახონ, რა შეუძლიათ.

მიუხედავად სირთულეებისა, გუნდში გვყავს გამოცდილ მოთამაშეთა ბირთვი, რომლებსაც კარგად ესმით ჩვენი სათამაშო სისტემები. მათ ეროვნულ გუნდში თავი არაერთხელ გამოუჩენიათ და ველი, რომ გუნდს ახლაც წინ გაუძღვებიან. ასევე გვყავს ახალგაზრდა მოთამაშეები, რომლებიც საქართველოსა თუ საფრანგეთში, თავიანთ კლუბებში შესანიშნავად გამოიყურებიან და მათგან ბევრ სიკეთეს ველით".

"ბორჯღალოსნები" იტალიასთან მატჩისთვის, რომელიც 10 ნოემბერს ფლორენციაში გაიმართება, საფრანგეთში მოემზადებიან. "სკუადრა აძურასთან" მატჩის შემდეგ კი, თბილისში დაბრუნდებიან და ორ მატჩს გამართავენ. 17 ნოემბერს სამოას ვუმასპინძლებთ "ავჭალის სარაგბო სტადიონზე". 24 ნოემბერს კი, ვაკეში ტონგას ეროვნულ გუნდს დავუხვდებით.

საქართველოს ნაკრები
პირველი ხაზი: მიხეილ ნარიაშვილი (მონპელიე), ზურაბ ჟვანია (ვოსფსი), გურამ გოგიჩაშვილი (რასინგი), ჯაბა ბრეგვაძე (სანვულვზი), შალვა მამუკაშვილი (ენისეი), ბადრი ალხაზაშვილი (ტულონი), ლევან ჩილაჩავა (მონპელიე), დავით ქუბრიაშვილი (გრენობლი), ბექა გიგაშვილი (გრენობლი)
მეორე ხაზი: ნოდარ ჭეიშვილი (კორნიშ პირატუსი), ლაშა ლომიძე (ორიაკი), გრიგორ ქერდიყოშვილი (ლელო)
მესამე ხაზი: შალვა სუთიაშვილი (ანგულემი), ოთარ გიორგაძე (ბრივი), საბა შუბითიძე (ბათუმი), გიორგი ცუცქირიძე (ორიაკი), ბექა გორგაძე (ბორდო), ბექა ბიწაძე (ნარბონი)

#9: ვასილ ლობჟანიძე (ბრივი), გიორგი ბეგაძე (ლოკომოტივი), გელა აფრასიძე (მონპელიე)
#10: ლაშა ხმალაძე (ბათუმი), თედო აბჟანდაძე (აია)
#12-13: მერაბ შარიქაძე (ორიაკი), გიორგი კვესელაძე (არმაზი), თამაზ მჭედლიძე (აჟენი), ლაშა მალაღურაძე (კრასნი იარი), ზურაბ ძნელაძე (ლოკომოტივი).
#11-14: ალექსანდრე თოდუა (ბათუმი), ანზორ სიჭინავა (ბათუმი), გიორგი კოშაძე (ხარები), გიორგი აფციაური (ლოკომოტივი)
#15: სოსო მათიაშვილი (ლელო)

ტესტები

10 ნოემბერი
იტალია-საქართველო

17 ნოემბერი
საქართველო-სამოა

24 ნოემბერი
საქართველო-ტონგა

ყოველდღიური სპორტული გაზეთი "ლელო"
1274
მკითხველის კომენტარები / 0 /
მსგავსი ამბები
რუბრიკის სხვა სიახლეები
;