[მიმოხილვა, VIDEO] ეროვნული ლიგა. IV ტური. სუსხიანი თამაშები

ეროვნული ლიგ საინტერესოდ დაიწყო და საინტერესოდვე გრძელდება, რომ აღარაფერი ვთქვათ, საქართველოს ჩემპიონატისთავის ლამის საფირმო ნიშნად ქცეულ ტენდენციაზე: ისევე, როგორც წინა სეზონში, წლეულსაც მრავლად არის არაპროგნოზირებადი მატჩები.

თუნდაც, გასული ტური ავიღოთ, სადაც ერთიმეორეზე საინტრიგო ორი დაპირისპირება იყო და ძნელად თუ წარმოდგენდა ვინმე იყო, რომ თითოეულ ამ მატჩ კონკრეტული გუნდი დიდი ანგარიშით მოგებდა.

განსაკუთრებით მოულოდნელი, რა თქმა უნდა, "საბურთალოსა" და "ტორპედოს" მატჩის შედეგი იყო, რომელშიც მოქმედმა ჩემპიონმა თამაშის ბედი, ფაქტობრივად, საწყის ნახევარ საათში გადაწყვიტა - თასის მფლობელს დროის ამ მონაკვეთში 3 უპასუხო გოლი გაუტანა.

იყო არაერთი დასამახსოვრებელი ფაქტიც. ეტყობა, ჩვენმა არბიტრებმა პრინციპული ბრძოლა გამოუცხადეს ფეხბურთელების სიმულაციას; აქა-იქ ვნახეთ გაწევ-გამოწევაც, ხოლო სულ მცირე 3 მატჩი ურთულეს კლიმატურ პირობებში ჩატარდა...

ამ ტურის შემდეგ ეროვნულ ლიგაში ორკვირიანი პაუზა იქნება...

ჩემპიონს რომ შეეფერება...

ჩინებული სტარტი აიღო ქვეყნის მოქმედმა ჩემპიონმა "საბურთალომ" - 4 მატჩი, 4 ოგება! თანაც, წინა 3 თამაშისგან განსხვავებით, "საბურთალომ" ამჯერად ისეთი ფეხბურთი აჩვენა, ჩემპიონს რომ შეეფერება.

ცალკე საუბრის თემაა გუნდის მთავარი მწვრთნელის მიერ განხორციელებული ეფექტიანი როტაციაც - გიორგი ჭიაბრიშვილმა, წინა მატჩების მსგავსად, ამჯერადაც რამდენიმე გადაადგილება მოახდინა შემადგენლობაში და ეს ამჯერადაც სასურველი შედეგის მომტანი აღმოჩნდა.

მაგალითად, ძირითად შემადგენლობას დაუბრუნდნენ გუნდის საკვანძო ფეხბურთელები - გიორგი კოხრეიძე და ლუკა ლაკვეხელიანი. ამ ორი, უდავოდ პერსპექტიული ახალგაზრდა მოთამაშის გარდა, მოედანზე ვიხილეთ "საბურთალოს" შარშანდელი ტრიუმფის კიდევ ერთი შემომქმედი - ვაგნერ გონსალვეში, რომელიც შეცვლაზე შევიდა.

სამაგიეროდ, პირველად გამოჩნდა ძირითადში "საბურთალოს" ახალწვეული, ოგნიენ როლოვიჩი, რომელიც წინა სამ მატჩში შეცვლაზე შევიდა და მეტოქეთა კარში გადამწყვეტი გოლებიც გაიტანა.

ჩერნოგორიელ ამჯერად არ გაუტანია, სამაგიეროდ, იმ ორმა ფეხბურთელმა გამოიჩინა თავი, წინა მატჩებშიც ასევე ჩინებულად რომ გამოიყურებოდა - ლაშა შინდაგორიძემ გოლიც გაიტანა და დანარჩენ ორ გოლშიც აქტიური მონაწილეობა მიიღო, ხოლო ეროვნული ლიგის (ალბათ) ყველაზე ტექნიკურმა ნახევარმცველმა გეგა დიასამიძემ სულაც დუბლი შეასრულა.

სხვათა შორის, წლევანდელ სეზონში ყველაზე მეტი (9) გოლი "საბურთალოს" აქვს გატანილი და ეს 9 გოლი სამ ფეხბურთელს - ოგნიენ როლოვიჩ (4), ლაშა შინდაგორიძესა (3) და გეგა დიასამიძე (2) აქვს გადანაწილებული.

...სეზონის სტარტზე ზედიზედ 2 მარცხი ნამდვილად არ უნდა ნიშნავდეს კრიზისს, თუმცა ისიც ფაქტია, რომ ზედიზედ წაგებულ ამ მატჩებში "ტორპედოს" ფეხბურთელთა თითქმის აბსოლუტურ უმრავლესობას დაკარგული ჰქონდა ბრძოლის სურვილი...

იმედს ვიტოვებთ, "ტორპედოში" არსებული პრობლემები (რაზეც კულუარებში სეზონის დასაწყისიდანვე ბევრს ლაპარაკობენ) რაც შეიძლება მალე მოგვარდება და ბოლო წლების ერთ-ერთი საუკეთესო ქართული კლუბი ტიტულებისთვის ბრძოლას გააგრძელებს...

სტატისტიკისთვის - ეროვნულ ლიგაში "ტორპედომ" სამბურთიანი სხვაობით უკანასკნელად 2016 წლის აგვისტოში ("ჩიხურასთან") წააგო.

სულ სხვა დინამო

ზემოთაც აღვნიშნეთ, რომ მოულოდნელი იყო დედაქალაქურ დერბიში დაფიქსირებული ანგარიში, მით უფრო, რომ წინა ტურში "ლოკომოტივმა" გასვლით მატჩში "ტორპედო" დაამარცხა (2:0), მანამდე კი ლაშა ჭაღიაშვილის გუნდმა მართლაც რომ მედგარი წინააღმდეგობა გაუწია "საბურთალოს"...

თუმცა თბილისის "დინამომ" მიმდინარე სეზონში უადავოდ საუკეთესო მატჩი ჩაატარა ჟა აბსოლუტურად დამსახურებულად გაიმარჯვა. ეს წარმატება კი დინამოელთა სამწვრთნელო შტაბის მიერ განხორციელებული გონივრული როტაციით (უფრო ზუსტად, ოპტიმალური შემადგენლობის შერჩევით) იყო განპირობებული.

კერძოდ, გამოჩნდა, რომ გიორგი პაპავა და გიორგი ზარია ნამდვილად იმსახურებენ ადგილს "დინამოს" ძირითად შემადგენლობაში. ისიც აღსანიშნავია, რომ წინა 2 წაგებული მატჩისგან განსხვავებით, "დინამოს" ძირითადში ვერ ვიხილეთ 3 ლეგიონერი - ნოჩე, კარბია და როხანო.

სამაგიეროდ, მათ ნაცვლად ვინც ითამაშა, ურიგოდ არც ერთი არ გამოიყურებოდა. თუნდაც, ლევან კუტალია - 29 წლის შემტევმა "დინამოს" მაისურით პირველი გოლი გაიტანა.

ალბათ, თავიდანვე უნდა გვეთქვა, რომ დედაქალაქური დერბის საბოლოო შედეგზე უდიდესი გავლენა იქონია პირველ ტაიმში მომხდარმა ეპიზოდმა, როცა საკუთარ საჯარიმოში ხელით თამაშისთვის არბიტრმა ჯენერი ხორავამ სამართლიანად უჩვენა წითელი ბარათი "ლოკომოტივის" ახალგაზრდა მცველ თორნიკე ძებნიაურს.

ისე, მატჩი მართლაც მოვლენებით დახუნძლული გამოდგა - გაძევებაც ვნახეთ, ორი პენალტიც და ბოლოს - სეზონის პირველი ავტოგოლიც.

...ზემოთ გიორგი ზარია ვახსენეთ და ისიც უნდა ვთქვათ, რომ ამ 21 წლის ნახევარმცველს ყველა თვისება აქვს საიმისოდ, რომ "დინამოს" ერთ-ერთი ლიდერი გახდეს, ისევე, როგორც თბილისური გუნდის საკვანძო მოთამაშე ლევან შენგელიას - ამ 23 წლის შემტევს სულაც ჩემპიონატის საუკეთესო ფეხბურთელობაზე უნდა ჰქონდეს პრეტენზია...

ამ ქომაგების გაწბილება იქნებოდა?

მიმოხილვის შესავალში რთული კლიმატური პირობები ვახსენეთ, ტურის თითქმის ყველა მატჩზე რომ მოახდინა გარკვეული ზეგავლენა. აი, თუნდაც, ბათუმში გამართული დაპირისპირება ავიღოთ, კოკისპირული წვიმის თანხლებით რომ მიმდინარეობდა...

ამის მიუხედავად, ბათუმის "დინამოს" ერთგულ გულშემატკივრებს სტადიონიდან ფეხი არც მოუცვლიათ. ჰოდა, ასეთი ქომაგების გაწბილება იქნებოდა?! გია გეგუჩაძის გუნდმა ზედიზედ მეორე მატჩი მოიგო და როგორც სეზონის დაწყებამდეც ვვარაუდობდით, ლიდერთა ჯგუფშიც გაერია.

გამარჯვების მომტანი ერთადერთი გოლი კი 27 წლის ნიკა საბანაძემ გაიტანა: ამ არაორდინარულმა ცენტრფორვარდმა მშვენივრად შეირგო "დილას" ლეგიონერთა (ჯერ, ჯეისონ ნჯოკუ შეცდა, შემდეგ - ამოს ნონდი) გადაბმული შეცდომები, მეკარესთან პირისპირ გავიდა და თავის გუნდს პირველი საშინაო გამარჯვება მოუტანა.

აქვე, იმასაც დავძენთ, რომ მორიგი "მშრალი" მატჩი ჩაატარა მასპინძელთა გამოცდილმა მეკარე მიხეილ ალავიძემ, რომელმაც, სულ მცირე, ორი ურთულესი ბურთი მოიგერია. აი, "დილა" კი კვლავაც პირველი გამარჯვების მოლოდინშია...

განსხვავებული განწყობა

ორკვირიან პაუზას განსხვავებული განწყობით ხვდებიან ქვემოქართლური გუნდები: "სიონი" მეორე ადგილზეა და მხოლოდ ჩემპიონ "საბურთალოს" ჩამორჩება, "რუსთავი" კი პირიქით - ბოლო ადგილზეა...

...აი, რას ნიშნავს მშობლიურ ქალაქში დაბრუნება - თემურ შალამბერიძის "სიონმა" ბოლნისში მეორე თამაში ჩაატარა და მეორედაც გაიმარჯვა, თან ამჯერადაც ნერვულ და დაძაბულ ბრძოლაში, სადაც შეხვედრის ბედი შეცვლაზე შესულმა 26 წლის ზვიად სიხარულიამ გადაწყვიტა.

წინა მატჩების მსგავსად, "ვიტ ჯორჯიამ" ამჯერადაც მშვენიერი შთაბეჭდილება დატოვა და მასპინძლებს არაერთი პრობლემა შეუქმნა. "ლოკომოტივი"-"დინამოსი" არ იყოს, ეს მატჩიც ძლიერი ქარის თანხლებით მიმდინარეობდა, თუმცა ეს ყველაფერის არაფერია იმასთან შედარებით, რა პირობებშიც ჩატარდა "რუსთავისა" და "ჩიხურას" მატჩის მეორე ტაიმი - ქარი და სიცივე, აბა, იქ იყო, თუ იყო!..

ოღონდ, "სიონისგან" განსხვავებით, "რუსთავს" ჯერ ვერაფერში წაადგა მშობლიურ ქალაქში დაბრუნება. დიდი იყო იმის ალბათობაც, რომ მასპინძლები ამჯერად სულაც უქულოდ დარჩენილიყვნენ.

ორივე შემთხვევაში, ყველაფერი მატჩის მიწურულს მოხდა, მაგრამ როგორც გიორგი ვასაძემ ("ვიტ ჯორჯია"), ისე გიორგი ფანცულაიამ ("ჩიხურა"), უაღრესად ხელსაყრელი მომენტებით ვერ ისარგებლეს.

თუმცა, ისიც სათქმელია, რომ "ჩიხურასთან" მატჩში "რუსთავი" წაგებას ნამდვილად არ იმსახურებდა და ამის დასტურად მეორე ტაიმის ის 3-წუთიანი მონაკვეთიც კმარა, როცა სტუმრები ზედიზედ სამჯერ გადაურჩნენ აშკარა ხიფათს...

საერთოდაც, ახალგაზრდული "რუსთავი" ამ მატჩში ურიგოდ არ გამოიყურებოდა: 19 წლის ბექა ქავთარაძის გარდა, გამოსარჩევია აგრეთვე გუნდის ახალწვეულების - 18 წლის მეკარე გიორგი მამარდაშვილისა და 22 წლის ცენტრალური მცველის, ზურაბ ჯაფიაშვილის დამაჯერებელი თამაში. აშკარად მომატებული აქვს 20 წლის გარემარბ თეიმურაზ ჩოგაძეს, რომელმაც უმაღლეს ლიგაში სადებიუტო გოლი გაიტანა...

ამ სუსხიან მატჩს კიდევ ჰყავდა ორი გამორჩეული ფეხბურთელი - მისთვის უჩვეულო პოზიციაზე გამწესებულმა 23 წლის ზაზა ციცქიშვილმა ყველას "მიანიშნა", რომ "რუსთავის" ძირითად შემადგენლობაში ადგილს იმსახურებს, ხოლო, რაც შეეხება მიხეილ სარდალიშვილს, "ჩიხურას" 26 წლის შემტევმა, გოლი ხომ გაიტანა და, მთელი მატჩის განმავლობაში უამრავი პრობლემა შეუქმნა მასპინძლებს.

1. საბურთალო 4 4 0 0 9:2 12
2. სიონი 4 2 1 1 5:4 7
3. დინამო (თბ) 4 2 0 2 7:3 6
4. ლოკომოტივი 4 2 0 2 7:8 6
5. დინამო (ბთ) 4 2 0 2 2:3 6
6. ტორპედო 4 2 0 2 5:7 6
7. ვიტ ჯორჯია 4 1 2 1 2:2 5
8. ჩიხურა 4 0 3 1 3:5 3
9. დილა 4 0 2 2 1:3 2
10. რუსთავი 4 0 2 2 3:7 2

ბომბარდირები
ო. როლოვიჩი (საბურთალო) 4
ლ. შენგელია (დინამო თბ) 3
ლ. შინდაგორიძე (საბურთალო) 3

მომდევნო ტური

შაბათი, 30 მარტი
ჩიხურა-სიონი 17:00
დილა-ლოკომოტივი 19:00
ვიტ ჯორჯია-დინამო (ბთ) 21:00
კვირა, 31 მარტი
ტორპედო-რუსთავი 14:00
დინამო (თბ)-საბურთალო 16:00
ყოველდღიური სპორტული გაზეთი "ლელო"
694
მკითხველის კომენტარები / 0 /
მსგავსი ამბები
რუბრიკის სხვა სიახლეები
;