მიმოხილვა. როცა ინტრიგა მკვდარია...

ეს წერილი არ ისახავს მიზნად ევროპულ საკლუბო ფეხბურთში მიმდინარე მოვლენების ღრმა ანალიზს, უბრალოდ, საინტერესოა, გადავხედოთ როგორია სატურნირო მდგომარეობა ტოპ და სხვა ლიგებში.

ბევრგან ჩემპიონატმა ეკვატორი გადაკვეთა და გამოჩნდა, თუ ვინ არის ამა თუ იმ ლიგაში ჩემპიონობის უმთავრესი პრეტენდენტი.

როგორი სურათი გვაქვს ამ მხრივ? გულშემატკივრებისთვის, ინტრიგისთვის სიტუაცია ვერ არის სახარბიელო - ხუთიდან ოთხ წამყვან ლიგაში ჩემპიონის ვინაობა თითქმის გარკვეულია.

ასე რომ, გაზაფხული ვერ იქნება ისეთი საინტერესო, როგორც სხვა შემთხვევაში, ჩემპიონატის ბოლო დღეს რომ ირკვევა ხოლმე გამარჯვებული...

ინგლისი. პეპ გვარდიოლას გაწვრთნილი "მანჩესტერ სიტი" 12 ქულით უსწრებს უპირველეს მდევარ "იუნაიტედს". ორი კვირის წინ იყო 15. მაგრამ არ გვგონია, "ლივერპულთან" "სიტის" ამასწინანდელმა მარცხმა (3:4) პრემიერლიგაში განსაკუთრებული ინტრიგა დააბრუნოს.

გერმანია. აქაც ყველაფერი ცხადია. "ბაიერნი" არავითარ შემთხვევაში არ დათმობს ჩემპიონის ტიტულს. 19 ტურის შემდეგ "რეკორდმაისტერი" 16 ქულით უსწრებს უახლოეს მდევრებს - "ლევერკუზენს", "შალკეს", "ლაიპციგსა" და "გლადბახს".

ესპანეთი. "ბარსელონა" 11 ქულით უსწრებს მეორეადგილოსან "ატლეტიკოს", კიდევ უფრო შორს არის "რეალი", რომელიც ისტორიულ მტერს მთელი 19 ქულით ჩამორჩება. დაგვეთანხმებით, არავითარი ბრძოლა აქ აღარ იქნება.

საფრანგეთი. "ლიონთან" განცდილი საგარეო მარცხის (1:2) მიუხედავად, "პარი სენ-ჟერმენი" 8 ქულითაა წინ კონკურენტებზე. გვერწმუნეთ, ინტრიგა არც საფრანგეთის ჩემპიონატში იქნება.

იტალია. აი, აქ კი დიდი ბრძოლაა. მაურიციო სარის "ნაპოლი" ყველაფერს აკეთებს იმისთვის, რომ "იუვენტუსი" არ გააჩემპიონოს. "ნაპოლი" სულ რაღაც 1 ქულით უსწრებს მრისხანე მდევარს. კონკურენტებს შორის უშუალო ჯახი 22 აპრილს ტურინში გაიმართება.

პორტუგალია. სამ გრანდს შორის სხვაობა (პირველიდან მესამემდე) 2 ქულაა, თუმცა "პორტუს" თამაში აქვს რეზერვში. აქვე უნდა აღინიშნოს, რომ იმავე "პორტუსა" და "სპორტინგს" საერთოდ არ აქვთ წაგება.

უკრაინა. "შახტარმა" ბოლო ოთხიდან 2 მატჩი წააგო და საშუალება მისცა კიევის "დინამოს", 3 ქულამდე მიახლოებოდა, ხოლო დაკარგული ქულებით - სულაც დასწეოდა. უკრაინის პრემიერლიგა ახალი ფორმატით ტარდება. 22 ტურის შემდეგ გუნდები შუაზე გაიყოფიან. ასე რომ, აქ ინტერესი თითქმის გარანტირებულია.

თურქეთი. ლიდერობს ოთხი სტამბოლური კლუბი. თურქეთის ლიგის წამყვანი გუნდების შემადგენლობა ძალიან ვარსკვლავურია. საკმარისია, აღინიშნოს, რომ სულ ცოტა ხნის წინ "ბაშაქშეჰირმა" "ბარსელონადან" არდა თურანი ინათხოვრა. პირველ ადგილზე სწორედ ეს გუნდია. მერე მოდიან "ფენერბაჰჩე",

"გალათასარაი", "ბეშიქთაში"... "ბაშაქშეჰირი" ისტორიაში პირველი ჩემპიონობისკენ მიილტვის. გასაკვირი არაფერია. ამ გუნდის ღირსებას იცავენ გაელ კლიში, ემანუელ ადებაიორი, ემრე ბელეზოღლუ...

პოლონეთი. ჩემპიონატი აქაც გაიყოფა უკრაინის მსგავსად. სატურნირო ბრძოლა ძალიან დაძაბულია. სატურნირო განლაგებაც ძალიან მჭიდროა. პირველ ადგილზე "ლეგიაა", მეორეზე - "ლეხი", მესამეზე - "გურნიკი", მეოთხეზე - "იაგელონია". საკმარისია, აღინიშნოს, რომ პირველ და მეოთხე ადგილებს შორის სხვაობა სულ რაღაც 2 ქულაა.

საბერძნეთი. პირველად, ბოლო 10 წლის განმავლობაში "ოლიმპიაკოსი", შეიძლება, ვერ გახდეს ჩემპიონი. პირეოსული გუნდი მძიმე სეზონს ატარებს და ჩემპიონატის მიმდინარეობისას უკვე 4 მწვრთნელი გამოიცვალა, მაგრამ მაინც ლიდერობს. ფავორიტს 1 ქულით ჩამორჩება პაოკ-ი, სამით - აეკ-ი.

რუსეთი. მოსკოვის "ლოკომოტივი" 8 ქულით უსწრებს უახლოეს მდევრებს - "ზენიტსა" და "სპარტაკს". ძალიან უნდა მოინდომონ საბა კვირკველიამ და მისმა მეგობრებმა, ჩემპიონები რომ ვერ გახდნენ.

ყოველდღიური სპორტული გაზეთი "ლელო"
1211
მკითხველის კომენტარები / 0 /
მსგავსი ამბები
რუბრიკის სხვა სიახლეები
;