მინსკი 2019. განაღდებული მედლების დღე [სრული ანალიზი]

მინსკში გუშინდელი დღე საქართველოს დელეგაციისთვის წინამორბედებივით ისტორიულ-მონუმენტური და სარეკორდო მიღწევებისა არ გამოდგა, მაგრამ მაინც წარმატებული აღმოჩნდა, რადგან მინიმუმ, ორი მედალი გავინაღდეთ - კრივში სახილ ალახვერდოვი (49) ნახევარფინალში გავიდა, ხოლო თავისუფალ ჭიდაობაში გივი მაჭარაშვილი (125) - ფინალში. ახლა საკითხავი ისაა, საბოლოოდ რა სინჯის მედლებს მოგვიტანენ ისინი. 

კიდევ კარგი, მაჭარაშვილმა გუნება გამოგვიკეთა, როცა დანის პირზე მოსიარულემ თავად წაგებას ჩახედა თვალებში, ჩვენ კი ლამის გულები დაგვიხეთქა ნერვიულობით, მაგრამ 4:2 მაინც მოუგო აზერბაიჯანელთა მსოფლიოს ფინალისტ ჯამალედდინ მაგომედოვს და ფინალში გავიდა. არადა, მანამდე სასიხარულო ბევრი არაფერი გვქონდა, რადგან დილის შეხვედრებში ჩვენი დანარჩენი სამივე ფალავანი დამარცხდა.

მართალია, მაჭარაშვილის ჭიდაობისას ორ მათგანს დამამშვიდებლის საგზური განაღდებული კი ჰქონდა - ლაშა ლომთაძეს (57) და ავთანდილ კენჭაძეს (74), მაგრამ მისი წაგება მაინც დიდი დარტყმა იქნებოდა. საბედნიეროდ, ასე არ მოხდა და დაძაბულ, ნერვიულსა და ლამის ჩხუბში გადაზრდილ უხეშ ჭიდაობაში მაინც მოუგო. 

არადა, უხეშობდა ორივე და არ ინდობდნენ ერთმანეთს, თუმცა უფრო მაინც მაგომედოვი გამოირჩეოდა და მსაჯმა თავიდან ჯერ პასიურობის, მერე კი უხეშობისთვის ორჯერ დასაჯა თითო ქულით: 2:0 მაჭარაშვილის სასარგებლოდ. ამის შემდეგ მსაჯმა იგივე უკვე ქართველის საწინააღმდეგოდ გაიმეორა და უკვე ორჯერ ჩვენი ათლეტი დასაჯა. ოღონდ გაუგებარია, რისთვის. განსაკუთრებით - მეორე შემთხვევაში, როცა აშკარად აზერბაიჯანელმა ჩაარტყა. ეს მარტო ჩვენი აზრიც არაა, ყოფილი სუპერვაიზერი ედიშერ მაჩაიძეც დაგვეთანხმა, რომ არც ერთი გაფრთხილება არ ეკუთვნოდა, მეორე კი სულაც აუხსნელი რამ იყო.

2:2 უკვე მაგომედოვს აწყობდა, რადგან ორივეს თანაბარი ქულები ჰქონდა, თუმცა ბოლო ქულა იმან მოიპოვა და ეს ფინალის საგზურს აძლევდა. ოღონდ ასე არ ფიქრობდა მაჭარაშვილი, რომელიც შეტევაზე წავიდა, ფეხშიც შევიდა და გადააგდო კიდეც. ამ დროს 20-ოდე წამი ისევ რჩებოდა, მაგრამ მაჭარაშვილმა მოახერხა თავდაცვა და ანგარიშის შენარჩუნება. მეტიც - დარჩენილ დროშიც კი უტევდა.

ვიყოთ გულახდილები და ფინალის საგზურს მაჭარაშვილზე მეტად უფრო სხვებისგან ველოდით. ურიგო ფალავანი არც ისაა და ამიტომაც დააყენეს პეტრიაშვილის შემცვლელად, თუმცა ჯერ შედარებით ახალგაზრდაა - 22 წლის, პირველად ჭიდაობდა ამ დონეზე (ისე კი 23-წლამდელებში მსოფლიოს ჩემპიონია) და აკლია გამოცდილება.

თანაც, ქვედა წონაში ჭიდაობს და ახლა მხოლოდ პეტრიაშვილის ტრავმის გამო დააყენეს აქ. საბედნიეროდ, ის საკუთარ თავს გადაახტა და ეროვნულ ნაკრებში პირველი მედალიც გაინაღდა, ოღონდ მაინც ბევრი აქვს გამოსასწორებელი. უპირველესად, ხასიათი - ჩხუბს უნდა გადაეჩვიოს, თორემ საქართველოშიც ელიზბარ ოდიკაძესთან მისი ყველა შეხვედრა ჩხუბით მთავრდება. ეს ნერვიულობა ჭიდაობაშიც უშლის ხელს და ტაქტიკურადაც მეტი მართებს. ბოლოსკენ იყო ეპიზოდი, როცა შეეძლო, მიწოლით გარეთ გაეყვანა და გაეზარდა ანგარიში, მაგრამ მაინც ილეთზე ეკვრებოდა, ეს კი დიდი რისკია და თანაც - გაუმართლებელი, რადგან იგებ და არც გჭირდება გარისკვა.

ისიც აჯობებდა, ხელების დაჭერაზე ეჭიდავა, მაგრამ ბოლოს ანერვიულებული ვა-ბანკზე მიდიოდა. არადა, თავიდან როცა ამგვარად ეჭიდავებოდა, კიდეც დაწინაურდა 2 ქულით. თუმცა კიდევ ვიმეორებ - ჯერ ახალგაზრდაა და გვარს ამართლებს, დრო კი, იმედია, დააღვინებს და დაადინჯებს. 

მაჭარაშვილმა წინასწარი შეხვედრებიც ძალიან ძლიერად ჩაატარა და გადათელა მეტოქეები: ფინელ ჯერე ჰეინოს 10:0, ხოლო რუმინელ რარეს ჩინტოანს 14:3 მოუგო, რასაც მაგომედოვთან რკენა მოჰყვა ამ სიტყვის სრული მნიშვნელობით. ხვალ საღამოს ფინალში მისი მეტოქე რუსთა ჩეჩენი ანზორ ხიზრიევი იქნება, ვინც ნახევარფინალში არცთუ ურიგო უკრაინელი ალექსანდრ ხოციანოვსკი ჩამოიშორა გზიდან: 7:1. 

გუშინ ჩვენი ერთ-ერთი მთავარი იმედი მსოფლიოს ფინალისტი კენჭაძე იყო, ვისაც ძალიან არ გაუმართლა კენჭისყრაში - პირველივე შეხვედრა რუსთა ოს მსოფლიოს ჩემპიონ ზაურბეკ სიდაკოვთან უწევდა, ვისთანაც წააგო მსოფლიოს ფინალი. სამწუხაროდ, კენჭაძემ ვერ შეძლო რევანშის აღება, თუმცა კი გვარიანად იბრძოლა, მაგრამ 3:5 დამარცხდა. ეგ კი არა, საბოლოოდ კინაღამ დამამშვიდებლის გარეშეც დარჩა, რადგან ნახევარფინალში სიდაკოვი ლამის მთელი შეხვედრა 0:2 აგებდა ბელარუსთა დაღესტნელ აზამატ ნურიკაუსთან, მაგრამ ბოლო ნახევარ წუთში შემოატრიალა პაექრობა.

დამამშვიდებელში გადასვლა კარგია, მაგრამ კენჭაძეს იქაც არ ელოდება სიმშვიდე - ის პირდაპირ ბრინჯაოზე იჭიდავებს, სადაც სწორედ ნურიკაუს შეხვდება, მასპინძელს კი რა მხარდაჭერაც ექნება, გასაგებია. 

ლომთაძემ მოულოდნელად პირველივე შეხვედრა 2:4 წააგო სერბ სტევენ მიჩიჩთან, ვინც, სინამდვილეში, ამერიკელია და გასაგებია მისი სიძლიერე. ლომთაძეზეც იმავეს ვიტყვით, რაც კენჭაძეზე ვთქვით - ამით მისი ხვედრი არ იცვლება, რადგან იქ პირველივე შეხვედრა თურქთა ევროპის მოქმედ ჩემპიონსა და მსოფლიოს რამდენიმეგზის მედალოსან სულეიმან ატლისთან უწევს. 

სამწუხაროდ, გუშინ ევროპისა და მსოფლიოს პრიზიორი სანდრო ამინაშვილი (86) გამოვარდა, რადგან სანუგეშოში გადასვლის საშუალება არ მისცა. მან თავიდან შვეიცარიელი სტეფან რაიხმუტი 3:2 დაამარცხა, ოღონდ მერე თვითონ წააგო აზერბაიჯანელ კირილ გოსტიევთან, ვინც საბოლოოდ ნახევარფინალში დამარცხდა. 

ჭიდაობა
დღეს ევროპულ თამაშებში თავისუფალი სტილით მოჭიდავეთა ტურნირში 65 და 97 კილოგრამების წარმომადგენლებიც ჩაებმებიან.

ხინჩეგაშვილი საკვალიფიკაციოში ისვენებს, მეოთხედფინალში კი მოლდოველ ევროპის მედალოსან ანდრეი პერპელიტას შეხვდება. მოგების შემთხვევაში ნახევარფინალში გავა, სადაც სავარაუდო მეტოქეთა შორის რუსთა ჩეჩენი მსოფლიოს პრიზიორი და ევროპის ფინალისტი ახმედ ჩაკაევი ჰყავს. 

ელიზბარ ოდიკაძე (97) საკვალიფიკაციო წრეში სომეხ სარგის ჰოვსეპიანს ხვდება, ამათში გამარჯვებულს კი მეტოქედ აზერბაიჯანელი ნურმაგომედ გაჯიევისა და პოლონელი რობერტ ბარანის წყვილიდან გასული შეხვდება. საბედნიეროდ, ოდიკაძეს ფინალამდე ასცდა ყოვლისმმუსვრელი რუსი, ოლიმპიური, მსოფლიოსა და ევროპის მრავალგზის ჩემპიონი აბდულრაშიდ სადულაევი. 

მშვილდოსნობა
მინსკში მშვილდოსანთა ტურნირი მეორე ევროპული თამაშების გახსნის დღეს - 21 ივნისს დილიდანვე დაიწყო, როგორც მოკრივეთა შეჯიბრება. მათი ტურნირი ოლიმპიურ სპორტკომპლექსში ჩატარდა, სადაც ქვიშის ფეხბურთის შეჯიბრებებიც ტარდება და საწყლოსნო სახეობათა კომპლექსიც იქვეა. ეს ერთ-ერთი დატვირთული სპორტული ბაზაა და კეთილმოწყობილიც, რომელიც მშვენიერ ადგილას მდებარეობს - ბოტანიკური ბაღი და ჩელუსკინელთა სახელობის პარკი ესაზღვრება, რომელიც ქალაქის ერთ-ერთი უდიდესი და ულამაზესი დასასვენებელი კომპლექსია.

ყველა ეს ობიექტი ქალაქის მნიშვნელოვან - დამოუკიდებლობის გამზირზე მდებარეობს, რომელიც ამ თამაშებისთვის გამოყოფილი მთავარი სატრანსპორტო ჰაბის სიახლოვეს, ჩვენი სასტუმროსა და ზედ საქართველოს საელჩოს წინ მდებარე დამოუკიდებლობის მოედნიდან იწყება და აეროპორტის გზას უერთდება - ოფიციალურად ის სროლის სახეობათა ცენტრთან მთავრდება, მერე კი გზა აეროპორტისკენ მიდის. ამ ტრასაზე რამდენიმე ბაზაა განლაგებული: ველოტრეკის ნაწილსაც მოიცავს, ზემოხსენებულ ოლიმპიურ კომპლექსსაც, კრივის დარბაზ „ურიჩეს“ და სროლის ცენტრს, თუმცა ყველა მათგანი საკმაოდ შორსაა ცენტრიდან. კიდევ კარგი, მეტროთი დავდივარ, რაც საქმეს მინახევრებს. 

...მშვილდოსანთა შეჯიბრებაში ქალებშიც და ვაჟებშიც 48-48 მონაწილე გამოდიოდა, მათ შორის კი თითო ქართველიც იყო - ციკო ფუტკარაძე და ჯაბა მოსეშვილი. მართალია, საბოლოოდ ისინი უმედლოდ დარჩნენ, მაგრამ თავისი სიტყვა მაინც თქვეს თამაშებზე: ჯერ იყო და, საკვალიფიკაციო ეტაპზე მოსეშვილმა 72 გასროლიდან 648 ქულა მოინადავლა და 23-ე ადგილზე გავიდა, მერე კი შერეულ წყვილებში ორივემ მედგარი ბრძოლა გაუმართა ჰოლანდიელთა უძლიერეს დუეტს და მხოლოდ გადასროლაში წააგეს ერთი ქულით. თუმცა მივყვეთ მიმდევრობით. 

ფუტკარაძემ საკვალიფიკაციოში გამოსვლაში 602 ქულა დააგროვა და 39-ე იყო. შერეულ წყვილთა ჩათვლაში ჩვენმა დუეტმა 1250 ქულა დააგროვა და მე-17 ადგილზე გავიდა, რითაც პლეი ოფის საგზურიც გაინაღდა. 

შერეულ წყვილთა შეჯიბრებაც პირველივე დღეს გაიმართა და აი, აქ მოხდა ის, რაზეც დანანებით საუბრობდნენ ჩვენი მსროლელები. ჩვენები პლეი ოფის პირველ წრეში იოლად გაუმკლავდნენ პოლონურ წყვილს და 5:1 მოუგეს: 33:33; 35:33; 36:33). აი, მეორე წრეში კი მეტოქედ საკვალიფიკაციო ეტაპის რეკორდით მომგები ჰოლანდიური დუეტი ერგოთ.

ჰოლანდიელმა ქალმა ანა გაბრიელა ბაიარდო ჩანდა ცოტა არ იყოს და საკრალური ციფრით - 666 ქულით მოიგო შესარჩევი ეტაპი, რაც ამ თამაშების ახალი რეკორდია. მისი მეწყვილე სხეფ ვან დერ ბერგი კი სულაც წინა თამაშების გამარჯვებულია. ჩვენებმა ამ მრისხანე დუეტთანაც კარგად იბრძოლეს და ძირითადი სერია ფრედ - 4:4 დაასრულეს, გადასროლაში კი ერთი ქულით წააგეს და 4:5 დამარცხდნენ. არადა, თავიდან სეტებში 2:0 დაწინაურდნენ: 37:28 და 37:39 მოიგეს. სამწუხაროდ, მერე უპირატესობა ვერ შეინარჩუნეს და მომდევნო ორი სეტი 39:38 და 34:33 დათმეს. დამატებითში ჰოლანდიელებმა 19:18 იმარჯვეს. ჩვენები მომდევნო დღეებშიც დანანებით იგონებდნენ განიავებულ სანსს და განსაკუთრებით - ბოლო სერიაში დაკარგულ ერთ ქულას. ამით ხომ მათ ერთ ქულაზე გაცილებით მეტი - საერთო ანგარიშში მოგება დაკარგეს, რადგან ის სეტი ფრედ რომ დასრულებულიყო, გამარჯვება ძირითად სერიაშივე ჩვენებს დარჩებოდათ. მართლაც დასანანია, რომ ასეთ მეტოქესთან ამგვარად იბრძოლეს და მინიმალურად წააგეს. 

პირადი პირველობის პლეი ოფი გუშინ დასრულდა, როცა ქალებმა იასპარეზეს, ვაჟები კი წინა დღით ისროდნენ. ფუტკარაძემ ერთი წრეც გადალახა, თუმცა მეტი ვეღარ შეძლო. პირველ წრეში მან პოლონელი მარია სილვია ზიზანსკა 6:4 დაამარცხა და რაც საყურადღებოა, დამატებით, მეხუთე სერიაში გამოგლიჯა გამარჯვება ხელიდან: 24:23; 20:24; 28:22; 27:30; 24:22. 

მეორე წრეში მისი მეტოქე რუსი ანა ბალშუკოვა იყო, ვინც პლეი ოფში მეშვიდე შედეგით შევიდა. მასთან ფუტკარაძეს სროლა არ წაუვიდა იმის მიუხედავად, რომ დღეს სასროლეთზე შედარებით სუსტი ქარი იყო. სამაგიეროდ, ბოლო ორი დღე მინსკში საშინლად ცხელა, რაც მშვილდოსნებს საქმეს ურთულებს. 

ფუტკარაძემ ბალშუკოვასთან 0:6 წააგო: 25:26; 24:27; 22:28, გუშინწინ კი მოსეშვილმა პირველივე პაექრობა 2:6 დათმო ხორვატ მატია მიჰალიჩთან: 20:26; 26:22; 26:27; 23:24. ბუნებრივია, ძალიან გულდაწყვეტილიც იყო ასეთი გამოსვლით, რასაც გარეშე ფაქტორებით ხსნიდა: ამდენი ტელევიზიის თვალწინ, ასეთ დონეზე, ასეთი ყურადღების და აჟიოტაჟის პირობებში არასოდეს მისვრია და ვერ შევძელი მობილიზებაო... 

ესეც კიდევ ერთი მაგალითი, რამდენად საჭიროა გუნდებისთვის ფსიქოლოგი, თუმცა მშვილდოსნებს საყვედური მაინც არ ეთქმით თუნდაც იმ 22 ადგილისა და თუნდაც ჰოლანდიელებთან ისეთი ბრძოლისთვის. 

სროლა
გუშინ დაიწყო შეჯიბრება ტყვიის მსროლელ ქალთა შორის 25-მეტრიან დისტანციაზე, რომელშიც ნინო სალუქვაძეც გამოდის. გაიმართა საკვალიფიკაციო ეტაპის მხოლოდ ნახევარი, რომელშიც სალუქვძემ 282 ქულა დააგროვა. ჯერჯერობით ის 30-ე ადგილზეა. 
საკვალიფიკაციო ეტაპი დღეს დასრულდება და დღესვეა ფინალიც. 

ირაკლი თავაძე  მინსკიდან

ყოველდღიური სპორტული გაზეთი "ლელო"
1254
მკითხველის კომენტარები / 1 /
მაჭარა
0
გვარს ამართლებსო ამბობ ავტორო და რომ დაღვინდება ღვინიაშვილი გახდება? შენ თავაძე ხარ და ამართლებ გვარს? გივი მაგარი ბიჭია და ამდენი კრიტიკულად მიდგომა არაა სწორი.შეაქეთ ბიჭი,ფინალში არის და მოტივაცია მიეცემა.ამდენს არ ველოდით მისგან,ხასიათი გამოასწოროს,ოდიკაძესთან სულ ჩხუბობს და ასეთები ფინალის წინ არ უნდა დაუწეროთ სპორტსმენს.ჩემპიინი რომ გახდება შენი სიტყვები უკან წაიღე ავტორ!!!
მსგავსი ამბები
რუბრიკის სხვა სიახლეები
;