მინსკი 2019. ძიუდო. პაპინაშვილი, მარგველაშვილი, ნინიაშვილი და ჩხვიმიანი იწყებენ

მეორე ევროპულ თამაშებზე ხვალ ძიუდოისტთა ტურნირში ვაჟებში 60 და 66 კილოგრამების, ხოლო ქალებში 48, 52 და 57 კილოგრამების წარმომადგენლები იჭიდავებენ, მათ შორის კი 5 ჩვენებურიც იქნება.

სამწუხაროდ, 60 კილოგრამში ამირან პაპინაშვილისა და ლუხუმ ჩხვიმიანის გზები ნახევარფინალში იკვეთება. ევროპის ჩემპიონი და მსოფლიოს ორგზის მესამე პრიზიორი პაპინაშვილი პირველ ჯგუფშია განთესილი და თავიდან ისვენებს, ხოლო მერე დაპირისპირება ესპანელ ხოაკინ გომისსა და ებრაელ დანიელ ბენ დაუდს შორის უძლიერესთან მოუწევს. მას ქვეჯგუფში უკრაინელ ანტონ ლესიუკი და ფრანგი ევროპის ჩემპიონი ვალიდე ხიარიც ჰყავს, ოღონდ ისინი მეოთხედფინალამდე არ ხვდებიან, მანამ კი ერთმანეთში უნდა იჭიდაონ. სამწუხაროდ, პაპინაშვილს ორივესთან რევანში აქვს ასაღები - მათ თითოჯერ შეხვდა და ორივესთან დამარცხდა.

პირველ წრეში ჩხვიმიანიც ისვენებს, მერე კი თურქი მიჰრან აკუსი ან ბულგარელი ვალენტინ ალიპიევი ეყოლება მეტოქედ. მას მეოთხედფინალში სავარაიდო მეტოქეტა შორის ჰოლანდიის სახელით მოჭიდავე თორნიკე ჭკადუაც ჰყავს მეტოქედ.

66 კილოგრამში ჩვენები ბადის სხვადასხვა მხარეს არიან და ფინალამდე მათი გზები არ იკვეთება. თან ორივე მეორე წრიდან ჩაებმება ტურნირში, თუმცა ვაჟა მაგველაშვილის შემთხვევაში ეს წინასწარ იყო ცნობილი - ევროპის ჩემპიონი და მსოფლიოს მედალოსანი საერთაშორისო რეიტინგის ლიდერია. მისი პირველი მეტოქე სერბი ნემანია ბუნჩიჩი იქნება, ხოლო მას თუ მოუგებს, მერე მოლდოველ ვადიმ ბუნესკუსა და ესპანელ დანიელ რომან პერესს შორის მოგებულს დაეჭიდება. ჩვენებურს ჯგუფში ბელარუსი დმიტრი მინკოუც ჰყავს, ვინც ისედაც არაა სუსტი მოჭიდავე, ახლა კი მასპინძლის როლი გარკვეულ უპირატესობასაც მისცემს.

ბაგრატ ნინიაშვილი მეორე წრეში არცთუ ხელსაყრელ ფრანგ კილიან ლე ბლოს ხვდება, ხოლო მოგების შემთხვევაში პოლონელ პატრიკ ვავრიცჟეკსა და ესპანელ ალბერტო მარტინ გაიტეროს შორის მოგებულს გაეჯიბრება.

ქალთა ტურნირში ჩვენი ერთადერთი მონაწილე ეთერ ლიპარტელიანი (57) პირველივე წრეში იჭიდავებს აზერბაიჯანელთა მონღოლ იჩინკორლოო მუნკცედევთან.

23 ივნისს 73 და 81 კილოგრამების ფალავნები იჭიდავებენ. ოლიმპიური და ევროპის ჩემპიონი ლაშა შავდათუაშვილიც (73) ისვენებს პირველ წრეში, თუმცა მთავარი ისაა, რომ მას ფინალმდე ასცდნენ აზერბაიჯანელები - ევროპის ჩემპიონი ჰიდაიეტ ჰეიდაროვი და ოლიმპიადისა და მსოფლიოს ფინალისტი რუსტამ ორუჯოვი. ამათგან მის|თვის უხერხული მეტოქე ორუჯოვია.

შავდათუაშვილი თავდაპირველად მოლდოველ იოან ნაკუს შეხვდება, ხოლო მოგების შემთხვევაში მორიგ პაექრობას პორტუგალიელი ნუნო სარაივას, იტალიელი ჯოვანი ესპოზიტოსა და უკრაინელ არტემ ხომულას სამეულიდან გასულთან ჩაატარებს.

დებიუტანტი ლუკა მაისურაძე (81) ჯგუფში თურქთა ქართველ მსოფლიოს პრიზიორ ვედათ ალბაირაქთან მოხვდა, ოღონდ მას მეოთხედფინალამდე ვერ დაეჭიდება, პირველ შეხვედრას კი ფრანგ ალფა ოუმარ ჯალოსთან ჩაატარებს, ვისაც წლეულს უკვე მოუგო. მაისურაძეს მერვედფინალის სავარაუდო მეტოქეთა შორის პორტუგალიის სახელით მოჭიდავე ანრი ეგუტიძეც ჰყავს.

24 ივნისს 90, 100 და +100-ის წარმომადგენლები იასპარეზებენ. ალბათ, ჩვენებიდან ყველაზე მეტად ევროპის მედალოსან ბექა ღვინიაშვილს (90) არ გაუმართლა: ჯგუფში იქით ესპანელთა მსოფლიოს ქართველი ჩემპიონი ნიკოლოზ შერაზადიშვილი, აქეთ - რუსთა ოლიმპიური ჩემპიონი ხუსეინ ხალმურზაევი და ბელგიელი ევროპის მედალოსანი იოახიმ ბოტიე. თუმცა რუსტა ინგუში ქვედა წონიდანაა ამონაცვლებული და თან ის ჯერ ბოტიეს ხვდება.

ღვინიაშვილი მეორე წრიდან ჩაებმება შეჯიბრებაში, სადაც ესტონელ კლენ კრისტოფერ ხალჯულაიდს დაეჭიდება, ხოლო თუ მოუგებს, მერე სწორედ ბოტიე-ხალმურზაევს შორის მოგებულს ხვდება.

თავიდან ევროპის სამგზის გამარჯვებული, მსოფლიოს სამგზის და ოლიმპიადის ვიცე-ჩემპიონი ვალერი ლიპარტელიანიც (100) თავისუფალია, მერე კი ბელარუს ნიკიტა სვირიდსა და პოლონელ ივო ბარანევსკის წყვილიდან გასულს დაეჭიდება. მას ჯგუფში გერმანელი კარლ-რიჰარდ ფრეი და შვედი იოაკიმ დვარბი კი ჰყავს, მაგრამ თავად თუ ფორმაშია, ისინი ხიფათს ვერ შეუქმნიან.

დაბოლოს, ევროპისა და მსოფლიოს ჩემპიონი გურამ თუშიშვილი (+100) - ისიც მეორე წრიდან ჩაებმება შეჯიბრებაში და რუმინელ ვლადუტ სიმოენესკუს შეხვდება. ჯგუფის სხვა მეტოქეებიდან უკრაინელი იახივ ხამოა გამოსარჩევი, ვინც მისთვის უხერხული მეტოქეა.

1990
მკითხველის კომენტარები / 0 /
მსგავსი ამბები
რუბრიკის სხვა სიახლეები
;