მინსკში,ევროპულ თამაშებზე, პეტრიაშვილი დაგვაკლდება?

დიდი ალბათობით, მეორე ევროპულ თამაშებს ჩვენი ოლიმპიური დელეგაციის და თავისუფალი სტილით მოჭიდავეთა ნაკრების ერთ-ერთი ლიდერი, მძიმეწონოსანი გენო პეტრიაშვილი დააკლდება.

მართალია, ჯერჯერობით, ამ გუნდის მთავარ მწვრთნელ გიორგი იანტბელიძეს მინსკში წასაყვანი შემადგენლობა ოფიციალურად არ დაუსახელებია, მაგრამ, როგორც ამბობენ, პეტრიაშვილის დაკლება გადაწყვეტილია.

მიზეზი ჯანმრთელობის მდგომარეობაა - მსოფლიოს ორგზის და ევროპის ჩემპიონმა მენისკის ოპერაცია გაიკეთა და, თუმცა ყველაფერმა კარგად ჩაიარა, მათ შორის - სარეაბილიტაციო პერიოდმაც, მაგრამ თურმე არც თავად სპორტსმენს სურს მსოფლიოს ჩემპიონატის წინ გარისკვა, მინსკში ჭიდაობა და მეტი სიფრთხილისთვის სამწვრთნელო შტაბს ექიმებიც თავშეკავებას ურჩევენ. მით უფრო, სეზონის მთავარი შეჯიბრება წინაა - მსოფლიოს ჩემპიონატი, რომელიც ტოკიოს 2020 წლის ლიცენზიებსაც იძლევა. 

თუმცა იანტბელიძე ამ ინფორმაციას უარყოფს და ამბობს, რომ ეს საკითხი ჯერ კიდევ განხილვის პროცესშია. მისი თქმით, მინსკში წასაყვან შემადგენლობას დასკვნითი შეკრების დაწყებისას დაასახელებს, ამ შეკრებას კი ახლა შაბათს დაიწყებს. 

თუმცა, ამის პარალელურად, იანტბელიძე სათადარიგო ვარიანტებს ნამდვილად ეძებს, რისი უნებლიე მომსწრეც რამდენიმე დღის წინ საქართველოს ეროვნულ ოლიმპიურ კომიტეტში სტუმრობისას პირადად გავხდი. ის მინსკში მძიმე წონაში ელიზბარ ოდიკაძის, ხოლო 97-ში ოდიკაძის ნაცვლად გივი მაჭარაშვილის დაყენებას აპირებს. 

ვნახოთ, დაველოდოთ უახლოეს დღეებს, როცა ყველაფერი გაირკვევა. შეკრება ერთია და, ფაქტობრივად, რამდენიმე საათში ევროპულ თამაშებზე წარდგენის ვადებიც იწურება. 

ყოველდღიური სპორტული გაზეთი "ლელო"
367
მკითხველის კომენტარები / 0 /
მსგავსი ამბები
რუბრიკის სხვა სიახლეები
;