მის შესაჩერებლად სამი  ფეხბურთელი შეცვალეს... - კიტეიშვილი ავსტრიაში საუკეთესოა 

ოთარ კიტეიშვილი ავსტრიაში ჩასვლისთანავე გუნდს და იქაურ ბუნდესლიგას ადვილად შეეგუა. ის უმალვე გახდა გრაცის „შტურმის“ საკვანძო მოთამაშე.

ამაზე მიუთითებს მაისურის ნომერი, რომელიც მას ახლახანს გადასცეს - საქართველოს ნაკრების შემტევი ნახევარმცველი ავსტრიულ კლუბში 10-ნომრიანი მაისურით თამაშობს, „ათიანებს“ კი, მოგეხსენებათ, ისე არ არიგებენ...

გასულ სეზონში ოთარ კიტეიშვილი რამდენჯერმე ტურის სიმბოლურ ნაკრებშიც დაასახელეს, გოლი და საგოლე გადაცემებითაც გამოუჩენია თავი, მაგრამ ის აღიარება, რაც ბუნდესლიგის მე-5 ტურში დაიმსახურა, ქართველი ლეგიონერის ავსტრიულ კარიერაში, ჯერჯერობით, საუკეთესოა.

გრაცის „შტურმმა“ ავსტრიის ბუნდესლიგაში „ტიროლს“ უმასპინძლა და 2:0 დაამარცხა. იქაური მედიის ცნობით, საქართველოს ნაკრების 23 წლის ნახევარმცველი მატჩის მთავარი მოქმედი პირი იყო: გარდა იმისა, რომ ძირითად შემადგენლობაში იყო და შეუცვლელად ითამაშა, კიტეიშვილმა 39-ე წუთზე ასისტენტობა გაუწია შტეფან ჰერლანდერს, ხოლო 58-ე წუთზე თავად გაიტანა.

ქართველი ნახევარმცველი მატჩის საუკეთესო მოთამაშედ დაასახელეს. კიტეიშვილს ჰკითხეს, როგორ აფასებდა ამ გადაწყვეტილებას. მან კი საკუთარ თავს არ უღალატა და როგორც spox.com წერს, საკუთარ დამსახურებასა და მატჩის საუკეთესო მოთამაშის პრიზის გადაცემაზე ლაპარაკს მოერიდა.

„არ ვიცი, ამ პრიზს ვიმსახურებ თუ არა. უბრალოდ, ვცდილობ, ყველაფერი ისე გავაკეთო, როგორც მწვრთნელი დამავალებს. ეს გამარჯვება კი გუნდური მცდელობის შედეგია და არა მხოლოდ ჩემი დამსახურება. მაგრამ მატჩის საუკეთესო ფეხბურთელად დასახელება ძალიან გამიხარდა. რაც შეეხება უშუალოდ თამაშს, გუნდმა ხასიათ გამოავლინა ამ კვირაში ჩვენ ბევრი ვიმუშავეთ და ვფიქრობ, გამარჯვება დავიმსახურეთ“, - უთხრა კიტეიშვილმა ადგილობრივ მედიას.

გამოცემა spox.com-მა მატჩს სპეციალური წერილი მიუძღვნა, რომლის სათაურიც ლეგიონის გუშინდელ მიმოხილვაში ჩვენც გამოვიყენეთ - „კიტეიშვილის შოუ“. 

„მეორე ბუნდესლიგიდან გადმოსული „ტიროლი“ თვალისმომჭრელი ქართველის შეჩერებას ვერ ახერხებდა. სტუმართა მწვრთნელმა მის გასანეიტრალებლად სამი შეცვლა გამოიყენა, კიტეიშვილი კი მაინც კარისკენ მიიწევდა“, - წერს გამოცემა.

გარდა იმისა, რომ კიტეიშვილი მატჩის საუკეთესო მოთამაშე გახდა spox.com-ის შეფასებით, სტატისტიკურმა ინერნეტგვერდმა „სოფასკორმა“ ავსტრიის ბუნდესლიგის V ტურში ყველაზე მაღალი შეფასება სწორედ ქართველს დაუწერა - 9,5 ქულა ათბალიანი სისტემით, რაც ფეხბურთში ძალიან იშვიათი შეფასებაა.

იმედია, ასეთ ფორმაში მყოფი კიტეიშვილი საქართველოს ნაკრებსაც დიდ სამსახურს გაუწევს.

ყოველდღიური სპორტული გაზეთი "ლელო"
1368
მკითხველის კომენტარები / 0 /
მსგავსი ამბები
რუბრიკის სხვა სიახლეები
;