მიქელთაძეთი 'ორენბურგი' ინტერესდება - 'იყო მიზეზები, რის გამოც 'დინამო' დავტოვე თორემ'...

ბექა მიქელთაძე თბილისის "დინამოდან" წელს "რუსთავში" გადავიდა და გუნდის ერთ-ერთი ლიდერი გახდა.

11 თამაშში გატანილი 3 გოლი სრულად ვერ ასახავს გუნდისთვის ამ 20 წლის თავდამსხმელის მნიშვნელობას.

"ლელომ" მასთან ინტერვიუ ჩაწერა და გუნდზე, მის ტრანსფერსა და სამომავლო გეგმებზე ელაპარაკა...

- "რუსთავმა" სეზონი ცუდად დაიწყო, მაგრამ ბოლო ტურებში მდგომარეობა გამოასწორეთ. რას ფიქრობთ, ჩემპიონობისთვის ბრძოლის შანსი გაქვთ?

- რატომაც არა?! მოკლე ხანში საჩემპიონო გუნდი არ იკვრება. ჩვენ კი ახალი შემადგენლობით ვართ, შეთამაშება და დალაგება გვჭირდება, "რუსთავს" კი დიდი პოტენციალი გააჩნია, მინიმუმ, არავიზე ნაკლები ფეხბურთელები არ გვყავს და დარწმუნებული ვარ, ჩვენს რეალურ შესაძლებლობებს მალე ყველა დაინახავს.

ამიტომ მიზანზე ხელი არ აგვიღია და ის უცვლელია - ჩვენ ჩემპიონობისთვის ვიბრძოლებთ! იმედს შარშანდელი ჩემპიონატიც გვაძლევს. ხომ გახსოვთ, თბილისის "დინამო" ქუთაისის "ტორპედოს" რამხელა უპირატესობით უსწრებდა და ლამის ჩემპიონად გამოაცხადეს. თუმცა, ბოლო ტურში ტიტული მაინც დათმო. ჩემპიონატის ფინიშამდე კიდევ 25 ტურია დარჩენილი და ჩემპიონობა წარმოუდგენელი თუნდაც ამის გამო არ არის. ქულებით ჯერ საგრძნობი უპირატესობა არცერთ გუნდს არ აქვს და ლიდერის დაწევაც შესაძლებელია.

- ცნობილია "რუსთავის" წინადადებას რატომაც დათანხმდით - რუსეთში წასვლა ზაფხულისთვის გადაგედოთ და ამ კლუბში დროებით გადახვედით...

- კი, იყო ეს მომენტიც...

- ბევრს გაუჩნდა ლოგიკური კითხვა: "დინამოში" რომ დარჩენილიყავით, უკეთეს პირობებში ივარჯიშებდით და რუსეთშიც უკეთ მომზადებული წახვიდოდით.

- ამაზეც ვფიქრობდი. იყო მიზეზები, რის გამოც გუნდი დავტოვე. თორემ "დინამო" რომ ბრენდია და საქართველოში საუკეთესო მოსამზადებელი პირობები აქვს, ეს ყველამ იცის. საერთოდ, ბუნებრივია, "დინამოს" შემდეგ "რუსთავში" ვარჯიში იოლი არ იყო. ამ მხრივ პირობებში განსხვავებაა. ამ სირთულეს, გარკვეულწილად, ყველა ფეხბურთელი აწყდება, ვინც "თბილისის "დინამოს" შემდეგ რომელიმე ქართულ გუნდში გადადის.

- "რუსთავი" როგორ პირობებში ვარჯიშობს?

- ცხადია, "დინამოსნაირი" პირობები არ არის, მაგრამ საკმაოდ კარგ მოედანზე ვვარჯიშობთ და ვთამაშობთ.

- წლევანდელ ჩემპიონატზე რას იტყვით?

- შარშანდელზე დაძაბული და საინტერესო თამაშებია. ბოლო ტურის ამბავიც კარგ მაგალითად გამოდგება - ყველამ ვიცით, თბილისის "ლოკომოტივმა" სეზონი რა ცუდად დაიწყო, მაგრამ თბილისის "დინამოსთან" ძალიან კარგი ფეხბურთი აჩვენა და გამოჩნდა, რომ გუნდებს შორის დიდი სხვაობა არაა.

საერთოდ, წლევანდელი ჩემპიონატი ამის გამო მომწონს - წინასწარ ვერ გაიგებ, ვინ ვის მოუგებს და ყველა ტურის შემდეგ ცხრილში რაღაც იცვლება. მიმაჩნია, რომ წინა წლებთან შედარებით უკეთესი ჩემპიონატია.

- თუმცა, მაყურებელი სტადიონზე წელსაც ნაკლებად დადის...

- მათი სიმცირე ფეხბურთელებზე ცუდად მოქმედებს. სამწუხაროდ, ჩვენს ჩემპიონატს მაყურებელი აკლია. ხალხი იმიტომაც არ დადის, რომ რამდენიმე სტადიონზე რეკონსტრუქცია დაიწყო და რაიონის გუნდებს ხალხი სხვა სტადიონზე ვერ დაჰყვება. მეორე და მთავარი მაინც ისაა, რომ ხალხის ინტერესი მას შემდეგ შენელდა, როდესაც ჩვენი კლუბები ევროთასებზე პირველივე ეტაპიდან გამოვარდა. ძნელია ამის შემდეგ ვინმეს მოუწოდო, რომ სტადიონები შეავსონ.

- როცა გუნდები საკუთარ ქალაქში დაბრუნდებიან, ვითარების გამოსწორებას იმედოვნებთ?

- დარწმუნებული ვარ, ასეც იქნება. ფედერაციამ სტადიონებზე საფარის შეცვლით კარგი პროექტი წამოიწყო, ზაფხულიდან რამდენიმე ქალაქში ახალი ან განახლებული სტადიონი იქნება და დარწმუნებული ვარ, რაიონებში ხალხი ივლის.

- "რუსთავის" მიზნებსა და საჩემპიონო ამბიციაზე ლაპარაკობთ, მაგრამ შევიტყვეთ, რომ, შესაძლოა, კლუბი მალე დატოვოთ და რუსეთის პრემიერლიგაში დაბრუნებულ "ორენბურგში" გადახვიდეთ...

- "ორენბურგში"? არ ვიცი, ვნახოთ...

- ფაქტია, რომ მოლაპარაკება მიმდინარეობს...

- ჯერ კონტრაქტი "რუსთავთან" მაქვს და წინასწარ ვერაფერს გეტყვით. დასამალი არ არის, რაღაც ინტერესი არსებობს, მაგრამ რა გითხრათ, ჯერ თავადაც არაფერი ვიცი.

ყოველდღიური სპორტული გაზეთი "ლელო"
1674
მკითხველის კომენტარები / 0 /
მსგავსი ამბები
რუბრიკის სხვა სიახლეები