მიქელთაძეს მოსკოვის ლოკომოტივში იწვევენ...

"ლელომ" საქართველოს ეროვნული ლიგის დასრულებული სეზონი რომ შეაფასა, ჩემპიონატის სიმბოლურ გუნდში თბილისის "დინამოს" ორი ფეხბურთელი დაასახელა - მცველი ლაშა თოთაძე და თავდამსხმელი ბექა მიქელთაძე.

რჩეულთა შორის მათი მოხვედრა შემთხვევითი არ იყო. დასრულებულ სეზონში "დინამოს" ფორმით ყველაზე მეტი მატჩი სწორედ მათ ჩაატარეს ბაქარ ქარდავასთან ერთად, 20 წლის მიქელთაძე კი "დინამოს" ბომბარდირი გახდა 15 გოლით (პლუს 8 საგოლე პასი).

ეროვნულ ლიგაში მიქელთაძემ მეორე სეზონი ჩაატარა და ამის ფონზე ბომბარდირის ტიტული (თუნდაც გუნდის) სასიამოვნო ფაქტი უნდა იყოს. თუმცა თავად მიქელთაძე ამით სულაც არ არის კმაყოფილი...

- დასრულდა სეზონი და 20 წლის ფორვარდი "დინამოს" ბომბარდირი გახდით. ასეთი ფაქტი ნებისმიერ თქვენი ასაკის მოთამაშეს გაახარებდა...

- ცხადია, ასეთი კლუბის ბომბარდირობა ჩემთვის საამაყო და სასიხარულო ფაქტია. მაგრამ რომ გითხრათ, უზომოდ ბედნიერი ვარ-მეთქი, ტყუილი იქნება.

- რატომ?!

- მე რომ ჩემპიონატის ბომბარდირი გავმხდარიყავი, "დინამოს" ოქროს მედლები მოეგო, ეს სულ სხვა საქმე იქნებოდა. თუმცა არც ერთი მოხდა და არც მეორე, შესაბამისად, სეზონით კმაყოფილი ვერ ვიქნები, უფრო მეტად უკმაყოფილების განცდა დამიტოვა, ვიდრე - კმაყოფილების.

- იმის გათვალისწინებითაც კი, რომ სეზონი ფლანგზე გაატარეთ და არა - თავდასხმის ცენტრში?
- დიახ, ამის გათვალისწინებითაც. ცენტრალურ თავდამსხმელად 2-3 თამაში თუ ჩავატარე, მაგრამ მე მაქსიმალური შედეგი მახარებს, საშუალო - არა.

- სეზონის დასრულების შემდეგ კონტრაქტი დაგიმთავრდათ?

- ჯერ არა, ერთ თვეში თავისუფალი აგენტი გავხდები და ჩემში მაქსიმუმ საკომპენსაციო თანხა იქნება გადასახდელი.

- "დინამოში" დარჩენას არ აპირებთ?
- კლუბმა კონტრაქტის გახანგრძლივება შემომთავაზა და ამაზე უნდა მოვილაპარაკოთ.

- რამდენწლიან კონტრაქტს გთავაზობენ?
- კიდევ ერთწლიანს და მერე ევროპულ გუნდში ჩვენ გაგიშვებთო.

- რომელ გუნდში?
- ამაზე კონკრეტულად არ გვილაპარაკია.

- მაგრამ საქართველოში გაჩერება არავის სურს და ახალ კონტრაქტს გააფორმებთ?

- "დინამოში" თამაში ჩემთვის მართლა ბევრს ნიშნავს, ამიტომ, პრიორიტეტული სწორედ "დინამოს" წინადადება იქნება... მაგრამ ჯერ ზუსტად არც ვიცი, რა მოხდება. ყველაფერი ერთ კვირაში უნდა გადაწყდეს.

- მაგრამ უცხოეთში კარგი ვარიანტი თუ გამოჩნდა, ასეთ ცდუნებას კონტრაქტდასრულებული ქართველი ფეხბურთელი გაუძლებს?

- უცხოეთში წასვლა ყველას სურვილია და გამონაკლისი არც მე ვარ. თანაც, "დინამო" ფეხბურთელებს ზრდასა და წინსვლაში ხელს ყოველთვის გვიწყობს.

- ჩვენი ინფორმაციით, თქვენს თაობაზე თბილისის "დინამოს" ესპანური ლა ლიგა 2-ის კლუბი, ტარაგონის "ჟიმნასტიკი" დაელაპარაკა. ექსდინამოელი ჩისკო ნოემბერში სწორედ ამ მიზნით იმყოფებოდა თბილისში...

- ინტერესი იყო და ჩისკოც ნამდვილად ვნახე, რომელიც "ჟიმნასტიკის" სპორტულ დირექტორთან ერთად იყო ჩამოსული... მაგრამ ესპანეთში არ მივდივარ.

- რატომ? "ჟიმნასტიკში" თამაში მიუღებელია?

- არა, უბრალოდ, ეს მოლაპარაკება ჩაიშალა.

- მაგრამ მერე გამოჩნდა მოსკოვის "ლოკომოტივიც". ესეც ხომ ფაქტია?

- (იცინის) დიახ, მეც ასე ვიცი, რომ მოსკოველები დაინტერესებულნი არიან. მაგრამ არც მხოლოდ ინტერესია და საკითხიც საბოლოო გადაწყვეტამდე ჯერ არ მისულა. ალბათ, მოსკოვში არც წავალ.

- ანუ?

- შესაძლოა, ერთი ნაბიჯი უკან გადავდგა, რომ შემდეგ ოთხი ნაბიჯით წავიდე წინ.

- ანუ "ლოკომოტივის" ფარმკლუბში ან მის პარტნიორ კლუბში ითამაშოთ?

- ჯერ ამდენს ვერ გეტყვით.

- რამდენადაც ვიცით, ესპანელები და რუსები ახალგაზრდული ნაკრების დანიასთან წაგებულ შეხვედრაში დაგაკვირდნენ. იმ შეხვედრაში დუბლი შეასრულეთ...

- დიახ, მართლა ასე იყო.

- ახალ სეზონამდე დიდი დროა დარჩენილი და საინტერესოა, მანამდე ფორმის შენარჩუნებას როგორ ახერხებთ?

- კლუბი სავარჯიშო პროგრამას გვაძლევს და იმას ვასრულებ. ორი კვირა დავისვენებ, მაგრამ სულ ვერ გავჩერდები. ასეთ დროსაც კი დღეში, მინიმუმ, 5-6კილომეტრს მაინც დავრბივარ, ვერთობი და ვცდილობ, ტონუსში ვიყო.

- მესამე წელია, "დინამოში" თამაშობთ. ამ პერიოდში ბევრი რამ შეიძინეთ, გაიზარდეთ და ცნობადი გახდით...

- მანამდე "ზესტაფონში" ვთამაშობდი, ბოლო სამი წელია, რაც "დინამოში" გადმოვედი. ბედნიერი ვარ, ასეთ კლუბში რომ მოვხვდი. "დინამო" დიდი ისტორიის მქონე კლუბია, სადაც ფეხბურთელი აუცილებლად გაიზრდება.

ამისთვის კლუბს, ხელმძღვანელობას და ფანებს მადლობა ეკუთვნით. მთავარი კი სათამაშო პრაქტიკაა. როცა მოედანზე "დინამოს" ფორმით გადიხარ, სულ მოგებას გთხოვენ და მოთამაშეს ასეთი მიდგომა ზრდის.

ყოველდღიური სპორტული გაზეთი "ლელო"
2681
მკითხველის კომენტარები / 0 /
მსგავსი ამბები
რუბრიკის სხვა სიახლეები
;