მიში ბატშუაის აღმაფრენა

ძალიან ძნელია, იანვარში განხორციელებული ტრანსფერი უკვე თებერვალში შეაჯამო. ყველამ კარგად ვიცით, რომ ფეხბურთს არ უხდება ნაადრევი დასკვნების გამოტანა.

და მაინც, როგორ გინდა, არ დაწერო, რომ "ჩელსიდან" "დორტმუნდში" გადასულმა მიში ბატშუაიმ თავისი უკვე დაამტკიცა. ის უმოკლეს ხანში იქცა დორტმუნდელთა ერთ-ერთ ლიდერად.

თამამად შეიძლება ვთქვათ, რომ 24 წლის ბელგიელი გერმანული კლუბის ქომაგებს თანდათან ავიწყებს პიერ-ემერიკ ობამეიანგს, ვისაც ამჟამად უკვე ლონდონის "არსენალის" მაისურა აცვია...

ბატშუაი მართლაც ქარიშხალივით შეიჭრა "დორტმუნდში". თავად განსაჯეთ - მან ორი გოლი გაუტანა "კიოლნს", ერთი - "ჰამბურგს". ევროპალიგის პლეი ოფში კი ორჯერ აიღო "ატალანტას" კარი. დაგვეთანხმებით, ძალიან მცირე დროის განმავლობაში სრულიად საკმარისია.

ბოლო დროს ობამეიანგი "დორტმუნდის" გულშემატკივრებს ძალიან აბრაზებდა. ამ გუნდის გამორჩეული ფანები გაპატიებენ ყველაფერს, გარდა უგულო თამაშისა.

შენ შეიძლება წააგო, მაგრამ ისე უნდა გახვიდე მინდვრიდან, თითქოს უკანასკნელი ომი მოიხადე. "ობას" მოტივაცია აკლდა.

სხვა ბევრ ფაქტორთან ერთად ბატშუაის მთავარი კოზირი სწორედ მოტივაციაა. მისი თვალებიდან ცეცხლი ცვივა. ის იბრძვის ყველა ბურთისთვის, მათ შორის, ისეთი ბურთებისთვისაც, რომელიც თითქოს დაკარგულია...

ორი უძვირფასესი თვისება

"ჩვენ შევიძენთ დიდებულ ფეხბურთელს, რომელიც არის ევროპის ტოპთავდამსხმელების დონეზე. მას შეუძლია გოლების გატანა და გახსნა. ეს არის თვისება, რომელიც ყველას არ აქვს.

ის ბევრს გაიტანს ჩვენი გუნდის მაისურით და ამაში ბოლომდე ვარ დარწმუნებული", - თქვა ერთ-ერთ ინტერვიუში "დორტმუნდის" მთავარმა მწვრთნელმა პეტერ შტიოგერმა ჯერ კიდევ მაშინ, როცა დორტმუნდელთა მაისურით ბატშუაის ერთი მატჩიც არ ჰქონდა ჩატარებული.

რა თქმა უნდა, შტიოგერს დიდ მწვრთნელობამდე ჯერ კიდევ ბევრი უკლია, მაგრამ მიშის შემთხვევაში მან ზუსტად გამოიცნო მოვლენათა განვითარების სცენარი და, როგორც იტყვიან, "ათიანში" გაარტყა.

შტიოგერი ბატშუაისგან ითხოვს იმას, რაც მან ძალიან კარგად იცის. მაგალითად, "ჩელსის" მთავარი მწვრთნელი ანტონიო კონტე ფეხბურთელს პირდაპირ აიძულებდა ფლანგებზე გადასვლას, ეს კი მიშის ძალიან არ უყვარს და ამაში ფეხბურთელის გამტყუნება ძალიან რთულია.

საერთოდ, იშვიათია ისეთი ფორვარდი, ვინც კონტეს ხელში ბოლომდე ავლენს საკუთარ შესაძლებლობებს. გავიხსენოთ დიეგო კოშტას მაგალითი, ვინც პირდაპირ გაექცა იტალიელს ლონდონური კლუბიდან.

მნიშვნელოვანი პლუსი

ბატშუაის აქვს ერთი ძალიან მნიშვნელოვანი პლუსი. მას ძალიან კარგად შეუძლია ბურთის შენარჩუნება მაშინ, როცა მოწინააღმდეგის კართან ზურგით დგას.

"მისი ეს თვისება ძალიან გვეხმარება. ნამდვილ ფორვარდს ეს უნდა შეეძლოს. მე ძალიან მიყვარს ასეთი თავდამსხმელები. შემიძლია გითხრათ, რომ ამ კომპონენტში ის, უბრალოდ, შეუდარებელია", - მიიჩნევს შტიოგერი.

მადლიერი მიში

"დორტმუნდი" ზუსტად ისეთ ფეხბურთს თამაშობს, როგორიც მე მიყვარს. აქ არის დიდი ადრენალინი, ბევრი შეტევა და კომბინაცია. ჩემთვის დიდი პატივია იმ გუნდში თამაში, სადაც დიდებული ფეხბურთელები არიან", - ამბობს ჩვენი წერილის გმირი.

როგორც ირკვევა, ის განსაკუთრებით კარგად უგებს მინდორზე მარიო გიოტცეს: "მარიოსთან ერთად თამაში ერთი დიდი სიამოვნებაა, ასევე - დანარჩენებთან. მე ვიტყოდი, რომ საკუთარი თავი ვიპოვე", - ამბობს ბელგიის ნაკრების შემტევი.

რა უნდა გააუმჯობესოს?

ერთადერთი კომპონენტი, რომელშიც მიში ბატშუაიმ ძალიან უნდა მოუმატოს, ესაა შრომისმოყვარეობა. მისი მუშაობის მასშტაბი აუცილებლად უნდა გაიზარდოს. ასეთ შემთხვევაში მას აშკარად შეუძლია, უკვე რუსულ მუნდიალზე დაიმკვიდროს ადგილი მსოფლიოს ტოპფორვარდებს შორის.

ბელგიის ნაკრებში ცენტრფორვარდის პოზიციაზე ძალიან დიდი კონკურენციაა. ბოლოს და ბოლოს, ყველაფერს რომ თავი დავანებოთ, იქ რომელუ ლუკაკუ თამაშობს. ამის მიუხედავად, მიშის აუცილებლად ექნება შანსი.

ბელგიის ნაკრებთან ერთად, მომავალი ზაფხულის დიდ საფეხბურთო ფორუმზე ბატშუაის გაბრწყინებასაც ელიან ქომაგები. იმედია, ის გაამართლებს მასზე გაცემულ ავანსებს.

"ფეხბურთი ჩემთვის ყველაფერია და მე ვიცი, რომ მისთვის თავი უნდა დავდო. დანარჩენს მომავალი გვიჩვენებს. მთავარია, ჯანმრთელად ვიყო და საკუთარი თავის იმედი მუდამ მექნება", - ამბობს ბატშუაი და ჩვენც დაველოდოთ, მით უმეტეს, მიში არ ჩერდება...

ყოველდღიური სპორტული გაზეთი "ლელო"
891
მკითხველის კომენტარები / 0 /
მსგავსი ამბები
რუბრიკის სხვა სიახლეები
;