მიხეილ ალავიძე: სტადიონზე ხალხი თუ ივლის, ვითარება აუცილებლად  სასიკეთოდ შეიცვლება 

ეროვნული ლიგის ოფიციალურმა გვერდმა პირველი წრის საუკეთესო მოთამაშე გამოავლინა და სიმბოლური ნაკრები დაასახელა. პირველი წრის საუკეთესო ფეხბურთელად მიხეილ ალავიძე აღიარეს. ბათუმის “დინამოს” მეკარემ ამ პერიოდში ყველაზე ნაკლები (6) გოლი გაუშვა და დიდი როლი ითამაშა იმაში, რომ მისი გუნდი მეორე ადგილზე დაწინაურდა. შესაბამისად, ალავიძე ეროვნული ლიგის პირველი წრის სიმბოლურ ნაკრებში მოხვდა.

მისთვის ეს პირველი აღიარება არ ყოფილა: სიმბოლურ ნაკრებში ადრეც ბევრჯერ მოხვედრილა, 2007 წელს კი, 19 წლისამ, საქართველოს ახალგაზრდული ნაკრების ყოფილმა მეკარემ ასაკისთვის უჩვეულო რეკორდი დაამყარა - 9 მატჩი უგოლოდ ჩაატარა და საქართველოს ჩემპიონატის პირველი ეტაპის საუკეთესო მეკარედ დაასახელეს.

“ლელომ” მიხეილ ალავიძეს ინტერვიუ ჩამოართვა. გამოცდილი მეკარე ეროვნულ ჩემპიონატში 15 წელია თამაშობს, ბევრი უნახავს და ბევრი რამის შეფასება შეუძლია...

- უპირველესად, პირველი წრის საუკეთესო მეკარედ აღიარებას გილოცავთ!..

- ბედნიერი ადამიანი ვარ, რომ საუკეთესო მეკარედ მაღიარეს. ეს ჩემთვის ბევრს ნიშნავს. თუმცა, სიმართლე გითხრათ, ამას არც ველოდი. საერთოდ, ჩვენი მიზანი ბათუმელი გულშემატკივრის საბოლოო შედეგით გახარებაა და იმედია, ამას შევძლებთ. 

- თავად რომელ მოთამაშეს გამოარჩევდით?

- ბათუმის “დინამოდან” ჯოვინო ფლამარიონს, რომელმაც გუნდს ბევრი რამ შემატა. მას თამაშის შექმნა და მოედანზე ვითარების შეცვლა შეუძლია. სხვა გუნდებიდან კი ლევან შენგელიას გამოვარჩევდი. 

- ბათუმის “დინამოში” გია გეგუჩაძის მისვლის შემდეგ გასაგები გახდა, რომ გუნდი ამბიციური იქნებოდა, მაგრამ ლიდერობა მაინც მოულოდნელი აღმოჩნდა... 

- სიმართლე გითხრათ, სეზონის დასაწყისში ეს ვინმეს რომ ეთქვა, არ დავიჯერებდი. 

- რატომ?

- სეზონი ცუდად დავიწყეთ და ზედიზედ ორი თამაში წავაგეთ. თუმცა ამის შემდეგ დავლაგდით, თბილისის “დინამოსთან” მოგებას დიდი მნიშვნელობა ჰქონდა, რადგან საკუთარი ძალების ვირწმუნეთ და მივხვდით, რომ მეტი შეგვეძლო. იოლად არაფერი მოდის და ეს წარმატება და ტონუსი სეზონის ბოლომდე უნდა შევინარჩუნოთ.

- რამდენი წელია, რაც საქართველოს მთავარ ლიგაში თამაშობთ?

- წელს მე-15 სეზონს ვატარებ. კარიერა “თბილისში” დავიწყე, სადაც გამორჩეული შემადგენლობა გვყავდა - კაკო დევაძე, რომლისგანაც ბევრი რამ ვისწავლე, თორნიკე აფციაური, გოჩა ხოჯავა, სანდრო იაშვილი, რეზო გეწაძე, რეზო ქემოკლიძე, დათო ოდიკაძე, გია კვარაცხელია, გოგიტა გოგუა, გიორგი მიქაძე... სასწაული გუნდი იყო, რომელმაც ერთხელ თბილისის “დინამო” 5:0 დაამარცხა... მერე ვითამაშე რუსთავის “ოლიმპში”, თბილისის “ლოკომოტივი”, აზერბაიჯანულ სუმგაითის “სტანდარდსა” და უზბეკურ გუზორის “შორთანში”. ბათუმის “დინამოში” 2013 წელს ჩავირიცხე. მართალია, ორი წელი (2016-17) “რუსთავში” გამოვდიოდი, მაგრამ შარშან ისვე ბათუმში დავბრუნდი და მიხარია, რომ ამ გუნდის წევრი ვარ.

- 15 წელი დიდი დროა, თქვენ თვალწინ ბევრი რამ მოხდა...

- ფაქტობრივად, 15 წელია ქართულ ფეხბურთში ვარ და მართლაც ბევრი რამ შეიცვალა. მახსოვს დიდი უკუსვლაც. ეს იმ დროს, როცა ძალიან მაგარი თაობა გამოჩნდა და წინსვლა უნდა გვქონოდა... ჩემთვის დღემდე გაუგებარია, ასე რატომ მოხდა... მაგრამ წარსულზე ლაპარაკი აღარ ღირს, მთავარია, ახლა მაინც წავიდეთ წინ და ქართული ფეხბურთი უკეთ გამოვაჩინოთ. ამის იმედი კი ნამდვილად მაქვს.

- ასე რა გაიმედებთ?

- თუნდაც, ბოლო ტურში “საბურთალოსთან” შეხვედრა. მსგავსი აჟიოტაჟი და გარემო საქართველოს ჩემპიონატში აქამდე არ ყოფილა, არადა, ბევრად უკეთესი ფინანსური პერიოდებიც მახსენდება. ჩემპიონატის დონე ასეთი თამაშებით აუცილებლად გაიზრდება და მაყურებელსა და სპონსორსაც მოიზიდავს. 15 წელი შესაფასებლად პატარა დრო არ არის, მსგავსი თამაში კი არ მახსენდება - მართალია, ანგისაში პატარა სტადიონია, მხოლოდ ერთი ტრიბუნაა, მაგრამ იმდენი ხალხი მოვიდა, მოედნის გარშემოც იდგნენ და ისეთი ატმოსფერო შექმნეს, დღემდე ამ ემოციებიდან ვერ გამოვსულვარ. 

- ხალხის მხარდაჭერა მართლაც ძალიან ბევრს ნიშნავს...

- ძალიან, ძალიან ბევრს და ესაა ყველაზე მნიშვნელოვანი! სხვათა შორის, თავიდან “საბურთალოსთან” 0:2-ს კი ვაგებდით, მაგრამ ხალხი კი არ გვაგინებდა, პირიქით, ისეთი მხარდაჭერა ვიგრძენით, მე პირადად შინაგანად დარწმუნებული ვიყავი, რომ თამაშის შემოტრიალებას და მოგებას შევძლებდით. ეს რწმენა გულშემატკივრის გარეშე ვერ გაჩნდება.

ჩვენს ფეხბურთს სწორედ ეს მუხტი აკლია. ამიტომ მჯერა, თამაშებზე ხალხი თუ ივლის, ვითარება სასიკეთოდ აუცილებლად შეიცვლება. ბათუმის სტადიონზე შემდეგ თამაშს მოუთმენლად ველოდებით, რადგან ეს ჩვენთვის სიამოვნებაა.

მადლობა ჩვენს გულშემატკივარს, რომელმაც ასეთი განცდა მოგვანიჭა! ისინი სულ გვერდში გვიდგანან - და არა მხოლოდ კარგ ამინდში. წელს ერთ-ერთ შეხვედრამდე წვიმა წამოვიდა, მაგრამ ტრიბუნა მაინც სავსე იყო. ესაა ჩვენი სტიმული, თორემ ვარსკვლავებიც რომ ჩამოვიყვანოთ, ცარიელი ტრიბუნების წინაშე თამაში მათაც გაუჭირდებათ. აბა, სტადიონზე რომ 20 კაცი მოვა, ჩემპიონატის დონე როგორ გაიზრდება, ან მაყურებელს და სპონსორს როგორ მოვიზიდავთ? “საბურთალოსთან” ასე რომ მომხდარიყო, 0:2-ის შემდეგ წარმოუდგენელია, ჩემპიონთან თამაში რომ მოგვეგო.

ყოველდღიური სპორტული გაზეთი "ლელო"
966
მკითხველის კომენტარები / 0 /
მსგავსი ამბები
რუბრიკის სხვა სიახლეები
;