მნიშვნელოვანი ცვლილებები ფოთის კოლხეთში

ეროვნული ლიგის 2018 წლის ჩემპიონატი 2 მარტს დაიწყება. ახალ სეზონს "კოლხეთი" მნიშვნელოვანი ცვლილებებით ხვდება. ჯერ სიახლე ის არის, რომ ამოქმედდა კლუბის ახალი ვებგვერდი და თუ აქამდე "კოლხეთზე" ინფორმაციები მწირად იყო, ახლა იქ ბევრ საინტერესო სიახლეს წაიკითხავთ...

მაგალითად, ფოთური კლუბის პრესსამსახურის ცნობით, მთავარ მწვრთნელად დანიშნულმა 56 წლის რუსმა სპეციალისტმა კონსტანტინ გალკინმა ფიზმომზადების მწვრთნელად თავისი თანამემამულე იური ევლამპიევი მიიწვია, ხოლო მწვრთნელ-სელექციონერად - წარსულში თბილისის "დინამოს" ფეხბურთელი, ფოთელი მალხაზ არზიანი იმუშავებს.

"კოლხეთში" საქმიანობას აგრძელებენ მთავარი მწვრთნელის ასისტენტი ნუგზარ თვარაძე და მეკარეების მწვრთნელი ზვიად გვასალია.

კლუბს ჰყავს ახალი სპორტული დირექტორიც - ყოფილი ფეხბურთელი ლევან ჯღარკავა, რომელიც სხვადასხვა დროს რუსეთის პირველი დივიზიონის გუნდების ღირსებას იცავდა.

"კოლხეთი" მზადებას იანვრის მეორე ნახევრიდან შეუდგა: 12-დღიან ბათუმურ შეკრებაზე გუნდმა 2 ამხანაგური მატჩი გამართა. 27 იანვარს ფოთელები ბათუმის "დინამოსთან" 1:2 დამარცხდნენ, ხოლო 29-ში ხელვაჩაურის "მაჭახელას" 1:0 სძლიეს.

6 თებერვალს, "კოლხეთი" მეორე ორკვირიანი შეკრების გასავლელად თურქეთში გაემგზავრა და საკურორტო ქალაქ ბელეკში დაბინავდა, სადაც 4 ამხანაგური სპარინგი ჩაატარა.

სწორედ ამ შეკრების შემდეგ დაკომპლექტდება გუნდი ახალი სეზონისთვის. ფოთელები თურქეთში ამ შემადგენლობით იმყოფებოდნენ:

მეკარეები - ალექსეი სოლოსინი, ლაშა-გიორგი გურგენიძე;

მცველები - გიორგი კილასონია, ლაშა გოგონაია, ლევან კაკულია, ბექა მახარაძე, სერგეი დანილოვი, თორნიკე ჯიმშელეიშვილი, გიგა ჭეიშვილი;

ნახევარმცველები - გიორგი ქურდაძე, ვალიკო ტყემალაძე, თორნიკე ჩუბითიძე, რომან ერემეევი, ზურაბ არზიანი, პატერსონ კაბორე;

თავდამსხმელები - ილია მიხაილოვი, ვლადიმერ გოგბერაშვილი, გიორგი არქანია.

საინტერესოა პატერსონ კაბორეს ამბავი. ბურკინაფასოელი ფეხბურთელი 2016 წელს ლანჩხუთის "გურიაში" მიიწვიეს, 2017 წელს კი ესპანეთის სეგუნდა B-ს "ელდენსეში" ჩაირიცხა.

27 წლის თავდამსხმელი სწორედ შარშან მიიწვიეს ეროვნულ ნაკრებში, სადაც სადებიუტო მატჩი 2017 წლის 24 მარტს მაროკოსთან (0:2 ამხანაგურ შეხვედრაში) ჩაატარა. ბურკინა ფასო ფიფას რეიტინგში 58-ე ადგილზეა. შარშან, აფრიკის ერთა თასზე, ამ ნაკრებმა მესამე ადგილი დაიკავა და ეს ამბავი ამითაა მნიშვნელოვანი.

გარდა ზემოთ ხსენებული ფეხბურთელებისა, ბელეკის შეკრებაზე კიდევ რამდენიმე ლეგიონერი ისინჯება. ზურაბ არზიანი "რუსთავში" იყო და იქიდან შეუერთდა კოლხებს. ორიოდე დღის წინ, გალკინის გუნდში ჩაირიცხა გამოცდილი გიორგი კახელიშვილი, რომელსაც რამდენიმე ქართულ კლუბში უთამაშია, ბოლო სეზონი კი ქობულეთის "შუქურაში" გაატარა.

სამაგიეროდ, გუნდი დატოვეს არა მხოლოდ ქართველებმა, არამედ ლეგიონერებმაც - ერიკ მარსელო ოტიენომ, ჯონ მაჩარიამ, უკრაინელებმა - იგორ დერებჩინსკიმ და იგორ ბროვკომ.

ბელეკში ორკვირიან წინასასეზონო შეკრებაზე "კოლხეთმა" 4 ამხანაგური მატჩი გამართა. პირველ სამ შეხვედრაზე უკვე ვწერდით, ოღონდ, არ ვიცოდით გუნდის შემადგენლობა.

მაგალითად, 8 თებერვალს ფოთელებმა ჩერნიგოვის (უკრაინა) "დნიპროსთან" 1:1 ითამაშეს. 23-ე წუთზე გუნდი კაპიტანმა ლაშა გოგონაიამ დააწინაურა, მაგრამ "კოლხეთმა" ანგარიში ვერ შეინარჩუნა.

კოლხეთი: სოლოსინი, გ. კილასონია, გოგონაია, მახარაძე, ჯიმშელეიშვილი, ქურდაძე, არზიანი, გოგბერაშვილი, დანილოვი, მიხაილოვი, კარპუხინი; შეცვლაზე: გურგენიძე, ჭეიშვილი, ჩუბითიძე, ტყემალაძე, კაკულია, ერემეევი, არქანია.

მეორე მატჩი 10 თებერვალს კოლხებმა ჩემპიონთა ლიგის ჯგუფური ეტაპის არაერთგზის მონაწილე ბელორუსულ ბატე-სთან 0:2 დათმეს.

კოლხეთი: სოლოსინი, ჯიმშელეიშვილი, ბ. მახარაძე, გოგონაია, კაკულია, არზიანი, დანილოვი, გოგბერაშვილი, კაბორე, მიხაილოვი, კარპუხინი.

14 თებერვალს "კოლხეთი 1913" უნგრულ "კიშვარდას" დაუპირისპირდა და 3:1 დაამარცხა. პირველ ნახევარში ანგარიში ფოთელთა ფორვარდმა ვლადიმირ მიხალოვმა გახსნა.

მეორე ნახევრის დასაწყისში მადიართა კარი ლაშა გოგონაიამ პენალტით მეორედ აიღო, რის შემდეგაც უნგრელებმა ერთი ბურთი გაქვითეს. ამის შემდეგ კი ფოთელთა უპირატესობა მიხაილოვმა კიდევ ერთ გოლში გამოხატა და ფოთელებმა 3:1 მოიგეს.

კოლხეთი: სოლოსინი, ჯიმშელეიშვილი, გოგონაია, კაკულია, კილასონია, დანილოვი, ტყემალაძე, არქანია, კაბორე, ჩუბითიძე, მიხაილოვი; შეცვლაზე: გურგენიძე, გოგბერაშვილი, კარპუხინი.

სამშობლოში გამომგზავრებამდე, "კოლხეთმა" ბოლო ამხანაგური მატჩი რუსული პრემიერლიგის ბინადარ მახაჩყალის "ანჟისთან" გამართა და 1:4 დამარცხდა. ჩვენებურთაგან გოლი მიხაილოვმა გაიტანა.

კოლხეთი: სოლოსინი, ჯიმშელეიშვილი, დანილოვი, გოგონაია, კაკულია, ტყემალაძე, არზიანი, კახელიშვილი, კაბორე, გოგბერაშვილი, მიხაილოვი.

მახაჩყალელთა გუნდის მეკარე გიორგი ლორიაა, რომელმაც ფოთელებთან არ ითამაშა. სამაგიეროდ, ფოთელთა კარში იდგა ალექსეი სოლოსინი, რომელიც შარშან "ანჟიში" ირჯებოდა. მის გარდა, წლების წინ დაღესტნურ კლუბში კოლხებიდან ზურაბ არზიანსაც უთამაშია...

"ანჟის" პრესსამსახურის ცნობით, კლასში უპირატესობა თავიდანვე აისახა. მახაჩყალელებმა საკმაოდ ბევრი საგოლე მომენტი შექმნეს, კოლხებმა კი გოლი შესანიშნავი, 6-წამიანი კონტრშეტევის შედეგად გაიტანეს - მარცხენა ფლანგიდან ლევან კაკულიამ შეტევა კაბორეს გაუგრძელა, რომელმაც ერთი შეხებით

მეკარესთან პირისპირ დატოვა მიხაილოვი და ანგარიში გათანაბრდა.

მალე კაბორემ კარის წინ ლადო გოგბერაშვილი დატოვა, რომელმაც სუსტად დაარტყა და კოლხებმა დაწინაურების მშვენიერი შანსი ხელიდან გაუშვეს. მახაჩყალელებს უფრო მეტი მომენტი ჰქონდათ, მაგრამ ხან სალოსინი თამაშობდა კარგად, ხან - მეტოქე არაზუსტად ურტყამდა.

ამის მიუხედავად, დაღესტნელებმა კოლხებს მაინც აჯობეს. მეტოქემ მეორე ნახევარში კიდევ სამი გოლი გაიტანა და დიდი ანგარიშით გაიმარჯვა. 

დღეს "კოლხეთი" სამშობლოში დაბრუნდება და უშუალოდ ჩემპიონატის სტარტისთვის მზადებას ბათუმში გააგრძელებს.

ყოველდღიური სპორტული გაზეთი "ლელო"
1641
მკითხველის კომენტარები / 1 /
tiago
0
დაწერეთ რა კოლხეთის საიტის მისამართი როგორ არის
მსგავსი ამბები
რუბრიკის სხვა სიახლეები
;