მოდი, ვნახოთ ახალი ჩაკვეტაძეები! თბილისი დარასელიას თასს მეოთხედ მასპინძლობს

დღეიდან 21 აპრილის ჩათვლით თბილისის “დინამოს” აკადემიის მოედანზე ვიტალი დარასელიას თასი უკვე მეოთხედ გაიმართება. ეს საერთაშორისო საფეხბურთო ტურნირი, თამამად შეიძლება ითქვას, უპრეცედენტოა ჩვენი ქვეყნისთვის.

განვლილი სამი წლის განმავლობაში საქართველოს გარდა ტურნირში 13 ქვეყნის წარმომადგენელმა მიიღო მონაწილეობა, რასაც წელს კიდევ სამი ქვეყანა - შვეიცარია, პორტუგალია და ინგლისი ემატება...

შეგახსენებთ, 2016 წელს ტურნირზე “ალკმაარმა” (ჰოლანდია) იჩემპიონა, მომდევნო წელს თასი კიევის “დინამოს” (უკრაინა) ერგო, შარშან კი მთავარი ტროფეი “ესპანიოლს” (ესპანეთი) ერგო. აღვნიშნოთ ისიც, რომ წინა სამი ფინალიდან ორში თბილისის “დინამოს” ასაკობრივმა გუნდმა ითამაშა...

ვიტალი დარასელიას თასის ჩატარების იდეაც და მისი ხორცშესხმაც “დინამოს” პრეზიდენტ რომან ფიფიას ეკუთვნის. პირველ წელს გამოითქვა დიდი სურვილი, რათა ტურნირი ტრადიციული გამხდარიყო და ფაქტიც სახეზეა.

ტურნირის დაწყების წინ ტრადიციული პრესკონფერენცია გაიმართა. ჟურნალისტების წინაშე აკადემიის დირექტორი ლევან გვანცელაძე, ტურნირის მენეჯერი არჩილ კეკელია, ტურნირის პარტნიორები: თბილისის მერიის კულტურის, განათლების, სპორტისა და ახალგაზრდულ საქმეთა საქალაქო სამსახურის ხელმძღვანელი ირაკლი გვილავა, სფფ-ის აკადემიის ხელმძღვანელი ირაკლი ლილუაშვილი, VTB ბანკის მარკეტინგის განყოფილების ხელმძღვანელი შოთა მაჭავარიანი და “ავერსი ფარმას” გენერალური დირექტორი ირაკლი ფურცელაძე წარსდგნენ.

“დინამო” მადლობას უხდის ფეხბურთის განვითარების ფონდს, კომპანია “კიმბოს” და ერთგულ სპონსორებს - მინერალური წყლების კომპანია “საირმეს” და “ჩაფიძის ცენტრს” სპონსორობისა და გვერდში დგომისთვის.

ახლა რაც შეეხება ტურნირის სპორტულ მხარეს. A ჯგუფში ითამაშებენ თბილისის “დინამო”, “ვულვზი” (ინგლისი), “ემპოლი” (იტალია) და “ციურიხი” (შვეიცარია), ხოლო საქართველოს ფეხბურთის ფედერაციის აკადემიის გუნდი, კიევის “დინამო” (უკრაინა), როტერდამის “ფეიენოორდი” (ჰოლანდია) და “ბრაგა” (პორტუგალია) B ჯგუფს დააკომპლექტებენ.

ჯგუფური ეტაპის მატჩებს, ასევე ნახევარფინალურ შეხვედრებს, ვიტალი დარასელიას სახელობის “დინამო თბილისის” აკადემია უმასპინძლებს, ფინალი კი, ტრადიციულად, ბორის პაიჭაძის სახელობის “დინამო არენაზე” გაიმართება.

კომპეტენტური ჟიური გამოარჩევს საუკეთესო მეკარეს, მცველს, ნახევარმცველს, თავდამსხმელს, ბომბარდირს, ლამაზი გოლის ავტორს, ტურნირის საუკეთესო მოთამაშესა და “აღმოჩენას” გამოავლენს, ასევე, დაჯილდოვდება ფეხბურთელი, რომელიც ქომაგებში ყველაზე დიდ სიმპათიას მოიპოვებს.

...ტურნირს მართლაც გამორჩეული ადგილი უჭირავს ქართულ საფეხბურთო სინამდვილეში. სწორედ აქ ნახა პირველად ქართულმა საფეხბურთო თემმა გიორგი ჩაკვეტაძე. გარდა ამისა, ტურნირზე დაფრთიანებული სხვა ბიჭებიც ამბობენ ფეხბურთში თავის სიტყვას. ისღა დაგვრჩენია, “დინამოს” აკადემიას ვეწვიოთ და კარგ ფეხბურთთან ერთად, ვინძლო, ახალი ჩაკვეტაძეებიც ვნახოთ...

ტურნირის განრიგი
ჯგუფური ეტაპი

სამშაბათი, 16 აპრილი
(B) ფეიენოორდი-დინამო (კ) 12:00
(A) ემპოლი-ვულვზი 14:00
(B) სფფ აკადემია-ბრაგა 16:00
(A) დინამო (თბ)-ციურიხი 20:00

ოთხშაბათი, 17 აპრილი
(B) დინამო (კ)-სფფ აკადემია 12:00
(B) ბრაგა-ფეიენოორდი 14:00
(A) ციურიხი-ემპოლი 16:00
(A) დინამო (თბ)-ვულვზი 18:00

ხუთშაბათი, 18 აპრილი
(B) დინამო (კ)-ბრაგა 12:00
(B) სფფ აკადემია-ფეიენოორდი 14:00
(A) ვულვზი-ციურიხი 16:00
(A) დინამო (თბ)-ემპოლი 18:00
1/2 ფინალი

შაბათი, 20 აპრილი
(1) A3 - B4 12:00
(2) B3 - A4 14:00
(3) B1 - A2 18:00
(4) A1 - B2 20:00

ფინალები

კვირა, 21 აპრილი
VII-VIII ადგილებისთვის 10:00
V-VI ადგილებისთვის 12:00
III-IV ადგილებისთვის 14:00

ფინალი 17:00

ყოველდღიური სპორტული გაზეთი "ლელო"
592
მკითხველის კომენტარები / 0 /
მსგავსი ამბები
რუბრიკის სხვა სიახლეები
;