მოლაპარაკება მანესთან, მბაპეს უმცროსი ძმაც სათვალავშია...

ესპანური პრესის ინფორმაციით, შედგა პირველი კონტაქტი მადრიდის „რეალის“ წარმომადგენლებსა და „ლივერპულის“ ფორვარდის სადიო მანეს აგენტებს შორის.

აღნიშნავენ, რომ მადრიდული კლუბის მთავარი მწვრთნელი ზინედინ ზიდანი უკვე ელაპარაკა მანეს და განაცხადა, რომ ძალიან უნდა სენეგალელის ხილვა „რეალში“. „სამეფო კლუბი“ იმედოვნებს ტრანსფერის განხორციელებას ზაფხულის სატრანსფერო ფანჯრის დროს.

სადიო მანეს მოქმედი ხელშეკრულება ინგლისურ კლუბთან 2013 წლის ზაფხულამდეა ძალაში. მისი სატრანსფერო ღირებულება 150 მილიონ ევროს შეადგენს.

ამ სეზონში სენეგალელმა 27 მატჩი ჩაატარა „ლივერპულის“ შემადგენლობაში, 14 გოლი გაიტანა და 11 შედეგიანი პასი შეასრულა.

ამასობაში, გავრცელდა ინფორმაცია, რომ სამეფო კლუბმა ქარიმ ბენზემას, შესაძლოა, ახალი ხელშეკრულება გაუფორმოს. წყაროს ცნობით, ორივე მხარეს სურს თანამშრომლობის გაგრძელება. უკვე გაიმართა მოლაპარაკებები, რომელმაც აჩვენა, რომ შეთანხმების მიღწევას პრობლემა არ შეექმნება.

ფრანგის ფეხბურთელის მოქმედი კონტრაქტი 2021 წლის ზაფხულამდეა ძალაში. ვარაუდობენ, რომ ხელშეკრულება კიდევ ორი წლით გაგრძელდება. ცნობილია, რომ „რეალის“ მთავარმა მწვრთნელმა ზინედინ ზიდანმა მოიწონა 32 წლის ფორვარდთან ახალი გარიგება.

ამ სეზონში ბენზემამ „რეალის“ რიგებში 23 მატჩი ჩაატარა, 16 გოლი გაიტანა და შვიდი შედეგიანი პასი შეასრულა. ის მადრიდულ კლუბში 2009 წლიდან თამაშობს.

და კიდევ ერთი ამბავი მადრიდიდან - „რეალს“ პსჟ-ის ფორვარდ კილიან მბაპეს უმცროსი ძმა - იტან მბაპე მოსწონს. როგორც ესპანურ პრესაში დაიწერა, მადრიდული კლუბის ხელმძღვანელობა მოიხიბლა 13 წლის ფეხბურთელის თამაშით ერთ-ერთ საერთაშორისო ტურნირზე. უმცროსი მბაპე „პარი სენ-ჟერმენის“ ასაკობრივ გუნდში თამაშობს.

შეგახსენებთ, რომ „პარი სენ-ჟერმენის“ შემადგენლობაში კილიან მბაპემ 78 გოლი გაიტანა 106 მატჩში.

913
მკითხველის კომენტარები / 0 /
მსგავსი ამბები
რუბრიკის სხვა სიახლეები
;