მოლდოვური შოკი: ამ შედეგს ვერავინ  წარმოიდგენდა

“შერიფის” პრესსამსახურმა “საბურთალოს” მატჩის შემდეგ გამოაქვეყნა წერილი სათაურით - “როცა არაფერი გამოდის...”

“შერიფმა” ახალი ევროკამპანია წარუმატებლად დაიწყო. “საბურთალოსთან” მატჩი ისე წარიმართა, რასაც ვერავინ წარმოიდგენდა, თვით სტუმრებიც კი. პირველ ნახევარში თანაბარი თამაშით გუნდებმა ორი რეალური საგოლე მომენტი (?!) შექმნეს, მაგრამ ანგარიში “საბურთალომ” გახსნა, რომელმაც ჩვენი დაცვის ერთადერთი შეცდომით ისარგებლა.

ზორან ზეკიჩის გუნდს თამაში არ გამოსდიოდა, რამაც სტუმრებს საშუალება მისცა, საშიში კონტრშეტევები განეხორციელებინათ. ისე ჩანდა, თითქოს, ანგარიში არც ისე ლოგიკური იყო. შესვენებისას ზეკიჩმა ორი შეცვლა გააკეთა, რამაც გუნდს მოედნის ცენტრში თამაშის გამოსწორების საშუალება მისცა.

თუმცა, ამის მიუხედავად, ჩვენთვის სამწუხარო შედეგი დაფიქსირდა. ერთ-ერთი კონტრშეტევისას სტუმართა თავდამსხმელმა (გიორგი კოხრეიძე - რედ) “ცხრიანი” შეარხია. მატჩის დასასრულს, კუთხურის გათამაშების შემდეგ, სტუმართა უპირატესობა კიდევ უფრო გაიზარდა. “შერიფი” არ დანებებულა, მაგრამ ვითარების გამოსწორება ვერ მოხერხდა. წინ საპასუხო მატჩია, რომელიც 16 ივლისს გაიმართება”, - წერია “შერიფის” ოფიციალურ გევრდზე.

კომსომოლსკაია პრავდა (მოლდოვური ვერსია): 

“რა იყო ეს? “შერიფმა” ჩემპიონთა ლიგაში გამოსვლა მეტად წარუმატებლად დაიწყო. სასტარტო მატჩში გუნდი ტირასპოლში საქართველოს ჩემპიონ “საბურთალოსთან” განადგურდა - 0:3. არადა, ჩემპიონთა ლიგის პირველი ეტაპის წილისყრა მოლდოვის ჩემპიონისთვის თითქოს ხელსაყრელი იყო.

“შერიფს” მეტოქედ საქართველოს ჩემპიონი შეხვდა - ახალგაზრდული გუნდი, რომელიც პირველად გახდა ქვეყნის ჩემპიონი. ამის ფონზე გასაკვირი იყო ტირასპოლის კლუბის დამარცხება. “შერიფი” ხომ ევროსარბიელზე გამოცდილი მებრძოლია. თანაც, გუნდი დიდი ანგარიშით დამარცხდა, თან - საკუთარ მოედანზე.

“შერიფი” საქართველოში საპასუხო მატჩის ჩასატარებლად მიზერული იმედებით გაემგზავრება. როგორც ჩანს, მოლდოვის ჩემპიონისთვის ლიგაში მიმავალი გზა დახურულია. რჩება ევროპალიგა”, - წერს გამოცემა.

publica.md

“ტირასპოლის “შერიფის” კატასტროფული სტარტი ჩემპიონთა ლიგაში! პირველი საკვალიფიკაციო რაუნდის პირველ მატჩში მოლდოვის ჩემპიონი თბილისის “საბურთალოსთან” 0:3 დამარცხდა. საპასუხო მატჩი თბილისში 16 ივლისს გაიმართება. თუ “შერიფი” ორი მატჩის ჯამში “საბურთალოს” ვერ დაამარცხებს, ევროპალიგაში გადაერთვება და ტირანის “პარტიზანისა” და აგდამის “ყარაბაღის” წყვილის გამარჯვებულს შეხვდება”.

ყოველდღიური სპორტული გაზეთი "ლელო"
1760
მკითხველის კომენტარები / 0 /
მსგავსი ამბები
რუბრიკის სხვა სიახლეები
;