მონღოლეთში საქართველოს ღირსების დასაცავად 

საქართველოს 18 წლამდე 3X3 კალათბურთელთა ნაკრები მონღოლთში გაემგზავრა, სადაც მსოფლიოს ჩემპიონატში მიიღებს მონაწილეობას. ამ ასაკში პლანეტის უმთავრეს 3X3 საკალათბურთო ტურნირს მონღოლეთის დედაქალაქი ულან-ბატორი 3-დან 7 ივნისის ჩათვლით უმასპინძლებს. 

ქართულ სპორტში ერთ-ერთი ყველაზე წარმატებული ჩვენი ნაკრებისთვის ესაა ზედიზედ მე-4 მსოფლიო პირველობა. საქართველოს 18-წლამდელთა ნაკრებმა მუნდიალზე 2015, 2016 და 2017 წლებში იასპარეზა, ხოლო 2018 წელს ახალგაზრდულ ოლიმპიურ თამაშებში მიიღო მონაწილეობა, რომელმაც ამ წელს მსოფლიოს პირველობა ჩაანაცვლა. 

მონღოლეთში ვაჟთა და გოგონათა მსოფლიოს 20-20 საუკეთესო ნაკრები მოიყრის თავს. ვაჟთა ჩემპიონატში მონაწილე 20 ნაკრები 4 ჯგუფში გადანაწილდა. საქართველო ყველაზე ძლიერ ჯგუფში მოხვდა აშშ-ის, ლატვიის, ბელარუსის და მასპინძელ მონღოლეთის ნაკრებებთან. ამერიკის ნაკრების სიძლიერეზე საუბარი ზედმეტია, ხოლო მონღოლეთის ნაკრები 2017 წლის აზიის თასის გამარჯვებულია. 

საქართველოს ნაკრების ღირსებას მონღოლეთში დაიცავენ: ნიკა ნიკოლაიშვილი (ორბი), ირაკლი სულხანიშვილი (აკადემია), ვლადიმერ თავაქარაშვილი (დინამო) და ლაშა მიქელაძე (აკადემია).

ისევე როგორც წინა წლებში, მსოფლიოს ჩემპიონატისთვის მონაწილეები რეიტინგით შეირჩა. 3X3 კალათბურთში მსოფლიო რეიტინგსიაში საქართველოს ფედერაცია ამჯერადაც 20-ეულშია და ჩვენს ნაკრებსაც პლანეტის ყველაზე მნიშვნელოვან შეჯიბრებაში ასპარეზობის უფლება ზედიზედ მეოთხედ მიეცა. 

საქართველოს 18-წლამდელთა ნაკრებისთვის მსოფლიოს ჩემპიონატებზე საუკეთესო შედეგი მეოთხედფინალში გასვლა გახლავთ. ჩვენმა გუნდმა 2016 წელს, ყაზახეთის დედაქალაქ ასტანაში ასპარეზობისას მსოფლიოს საუკეთესო 8 გუნდს შორის მოახერხა მოხვედრა. 

მიმდინარე წლის 18-წლამდელთა მსოფლიოს ჩემპიონატის პირდაპირი ტრანსლაცია სათამაშო დღეების მიხედვით ქვემოთ წარმოდგენილ FIBA 3X3-ის Youtube-ის არხზე განხორციელდება. 

ყოველდღიური სპორტული გაზეთი "ლელო"
372
მკითხველის კომენტარები / 0 /
მსგავსი ამბები
რუბრიკის სხვა სიახლეები
;