მორაგბეების დასაქმებაზე ასოციაცია იზრუნებს

გუშინ, „საქართველოს მორაგბეთა ასოციაციის“ პრეზენტაცია შედგა, რომლის მიზანი მოთამაშეებისთვის უკეთესი სათამაშო გარემოს შექმნა, განათლების დონის ამაღლება და სპორტული კარიერის დასრულების შემდეგ მათი გადამზადება-დასაქმებაა.

ასოციაციას 7 დამფუძნებელი ჰყავს და ყველა მათგანი კონკრეტული მიმართულებით იმუშავებს. დამფუძნებლები არიან: ლექსო იორდანიშვილი, სიმონ მაისურაძე, ჯაბა მალაღურაძე, ქეთი მოდებაძე, ნონო ანდღულაძე, ლაშა ხმალაძე და ალექსანდრე თოდუა.

ლექსო იორდანიშვილი, საქართველოს მორაგბეთა ასოციაციის პრეზიდენტი:
„წარმოგიდგენთ საქართველოს მორაგბეთა ასოციაციას. ასეთი ორგანიზაცია ყველა წამყვან სარაგბო ქვეყანაში არსებობს. მოწინავე ათეულის შემდეგ საქართველო პირველია, რომელმაც მორაგბეთა ასოციაცია დააარსა. ჩვენი პირდაპირი მოვალეობა მორაგბეებზე ზრუნვა და მოთამაშის კარიერის დასრულების შემდეგ, მათი სოციუმში უმტკივნეულო ინტეგრაციაა. პროფესიონალ მოთამაშეებს განათლებისთვის დიდი დრო არ რჩებათ და ჩვენ მათ განათლებაზე, ასევე შემდგომ დასაქმებაზე ვიზრუნებთ“.

გოჩა სვანიძე, საქართველოს რაგბის კავშირის პრეზიდენტი:
„მორაგბეთა ასოციაციის იდეა თავად მორაგბეებისგან მოდის. იურიდიულად ის გასულ წელს დაარსდა. დღეს კი, დასრულებული სახე ოფიციალურად მიიღო. მისი მნიშვნელობა განუზომლად დიდია, რადგან დღესდღეისობით საქართველოში რეგისტრირებულ მოთამაშეთა რაოდენობა 17 ათასს აღწევს.

ბუნებრივია, კარიერის დასრულების შემდეგ, ყველა მათგანი რაგბიში ვერ დასაქმდება. პროფესიული კარიერის დასრულებას უამრავი ტკივილი ახლავს და ასეთ დროს მოთამაშეებს ასოციაციის დახმარება ცხოვრების გზის პოვნაში დაეხმარება. გარდა ამისა, ასოციაცია მოთამაშეებს კლუბებთან ურთიერთობაში დაეხმარება. მინდა აღვნიშნო, რომ მორაგბეთა ასოციაცია რაგბის კავშირისგან დამოუკიდებელი ორგანიზაციაა და ის იმ სეგმენტებს შეეხება, რომლებსაც რაგბის კავშირი ვერ ფარავს. ჩვენ ამ წამოწყებას მთელი გულით მივესალმებით“.
სიმონ მაისურაძე, ერთ-ერთი დამფუძნებელი:

„გვაქვს მოლაპარაკება კომპანიებთან, სადაც მორაგბეები გაივლიან სტაჟირებას და საქმის ათვისების შემთხვევაში იქვე დასაქმდებიან. გვაქვს იმედი, რომ ამ კომპანიებთან მემორანდუმი უახლოეს ხანში გაფორმდება. ვამყარებთ ურთიერთობებს სხვადასხვა უნივერსიტეტებთან, სადაც ჩვენი მორაგბეები უფასოდ გაივლიან სწავლების კურსებს. მნიშვნელოვანია, რომ მოთამაშეებს განათლების მიღებაში კლუბებმაც გაუწიონ დახმარება. ვაპირებთ ფონდის შექმნას, რათა დავაფინანსოთ იმ მორაგბეების სწავლა, რომელთაც ამის საშუალება არ ექნებათ“.

ქეთი მოდებაძე, საქართველოს ქალთა ნაკრების კაპიტანი, ერთ-ერთი დამფუძნებელი:
„ყველა სარგებელი, რომელსაც ეს ასოციაცია მოთამაშეებს მისცემს, თანაბრად გავრცელდება კაცებზეც და ქალებზეც, რადგან ჩვენ არ ვმიჯნავთ ქალ და კაც მორაგბეებს. ეს საზოგადოებამაც უნდა გაითავისოს. ხშირად შემქმნია პრობლემები, რომელთა მოგვარება ადვილად შეიძლებოდა და ჩვენი ასოციაცია ყველა მოთამაშეზე იზრუნებს, იქნება ეს ადვილი, თუ რთული საკითხები“.

ყოველდღიური სპორტული გაზეთი "ლელო"
636
მკითხველის კომენტარები / 0 /
მსგავსი ამბები
რუბრიკის სხვა სიახლეები
;