მოსკოვის ტურნირი თავისუფალშიც და ბერძნულ-რომაულშიც. ერთა თასზე ულიდერებოდ

1-2 დეკემბერს მოსკოვი ვაჟთა ორივე საჭიდაო სტილში - თავისუფალშიც და ბერძნულ-რომაულშიც "ერთა თასი-ალროსას თასს" უმასპინძლებს, რომელიც გუნდური შეჯიბრებაა, თუმცა ის მხოლოდ ოლიმპიურ წონით კატეგორიებში ტარდება, ასეთი კი, მოგეხსენებათ, ორივე ჭიდაობაში 10-10-დან 6-6-ია.

ადრე ეს შეჯიბრებები ცალ-ცალკე ტარდებოდა, ახლა კი გააერთიანეს. "ერთა თასს" არც ისე დიდი ისტორია აქვს, ოღონდ მას მაინც ცოტა ადრე ჩაეყარა საფუძველი, როგორც ინდივიდუალურ შეჯიბრებას, რამდენიმე წლის წინ კი გუნდურად გადაკეთდა. ის ყოველთვის მოსკოვში ტარდებოდა, თუმცა ბოლო წლებში იყო ერთი შემთხვევა, როცა ყაზახეთმა უმასპინძლა.

რაც შეეხება ალროსას, ესაა ალმასის ქარხანა, რომლის შეფიც მსოფლიოს ორგზის ჩემპიონ ვიქტორ ლებედევის სიმამრი, სახა-იაკუტიის ავტონომიის პრეზიდენტი ეგორ ბორისოვია. ეს ქარხანა რუსეთის ჭიდაობის ფედერაციის გენერალური სპონსორია და მისი სახელობის ტურნირი შედარებით ახალი დაარსებულია.

ამ გაერთიანებულ შეჯიბრებაში ჩვენი ორივე ნაკრები სრული შემადგენლობით მიიღებს მონაწილეობას, თუმცა "თავისუფლებს" მხოლოდ ერთი წონა ეყოლებათ გაორებული, ბერძენ-რომაელები კი უფრო დიდი გუნდით გაემგზავრნენ. ამასთან, ორივე ნაკრები გადახალისებული შემადგენლობით იასპარეზებს.

ეს უფრო მეტად თავისუფალი სტილით მოჭიდავეებს ეხებათ, რადგან მათ არც ერთი ლიდერი არ მიჰყვებათ - ისინი გუნდის მთავარი დამრიგებლის, გიორგი იანტბელიძის გადაწყვეტილებით, სხვა დატვირთვით ემზადებიან. მოსკოვში არც იანტბელიძე წასულა, ნაკრებს ლაშა ქეთიშვილი გაჰყვა. იანტბელიძემ მას 7 ფალავანი გააყოლა ანუ გაორებული მხოლოდ ერთი წონა გვეყოლება, დანარჩენებში კი თითო კაცით ვიასპარეზებთ.

ბერძნულ-რომაული სტილით ნაკრებში ლიდერთაგან ევროპის წლევანდელი მესამე პრიზიორი დავით ჩხარტიშვილი (60) იჭიდავებს. უნდა გამოსულიყო 23-წლიანებში მსოფლიოს ჩემპიონი ზვიად პატარიძეც (130), თუმცა ის ბოლო მომენტში ტრავმის გამიზეზების შიშით გამოაკლდა გუნდს.

ყოველდღიური სპორტული გაზეთი "ლელო"
842
მკითხველის კომენტარები / 0 /
მსგავსი ამბები
რუბრიკის სხვა სიახლეები