მოულოდნელი ამბავი და  არც ისე სამწუხარო... ეროვნული ლიგის რეპორტაჟები სადავო გახდა 

ეროვნული ლიგის ახალი პარტნიორი კომპანია INSTAT LTD-ის (“ინსტატ ლიმიტედი”) გახდა. ირლანდიური კომპანიის შესახებ ურთიერთგამომრიცხავი ინფორმაციები ვრცელდებოდა... 

გრანდების პარტნიორი

თავდაპირველი ცნობების მიხედვით, საქართველოს ფეხბურთის ფედერაციამ ქართული კომპანიის ნაცვლად, ეროვნული ლიგის თამაშების ტრანსლაციის უფლება რუსულ მედიაკომპანიას გადასცა. გულშემატკივრები კი სოციალურ ქსელებში აღნიშნავენ, რომ ბოლო პერიოდში ეროვნული ჩემპიონატის მატჩების ტრანსლირების ხარისხი გაუარესდა. მათ გაღიზიანებას იწვევს ისიც, რომ რეპორტაჟების დროს ერთდროულად ქართულ-ლათინური წარწერები ჩნდება.

გულშემატკივრებში საკმაოდ ცნობილმა გიორგი კანდელაკმა სოციალურ ქსელში საინტერესო პოსტი გამოაქვეყნა: “ხალხო, ეს “ინსტატი” მარტო ლაივები არაა. ფეხბურთელზე ყველანაირ ინფორმაციას დებენ. სკაუტებისთვის კარგი რამაა. რაც ვნახე, რუსეთის პირველ ლიგას, მოლდოვის, ლიტვის და ირლანდიის ჩემპიონატებს იღებენ, ახლა უკვე - საქართველოსაც.

ასევე თანამშრომლობენ ლა ლიგა 2-თან, პორტუგალიის პრიმეირა ლიგასთან, ასევე გუნდებთან - “მანჩესტერ სიტისთან”, მადრიდის “რეალთან”, “ესპანიოლთან”, “ნაპოლისთან”, “ტორინოსთან”, “რომასთან”, “ცრვენა ზვეზდასთან”, აელ-თან, “ნანტთან”... აუცილებელი და სავალდებულოა, მატჩების ჩვენების ხარისხი გამოასწორონ და იმედი მაქვს, ასეც იქნება. ამას თუ ვერ მოახერხებენ, რა თქმა უნდა, სჯობს ძველ კომპანიას დაუბრუნდნენ. მაგრამ საკმაოდ ცნობილი კომპანიაა და არა მგონია, ვერ იპოვონ ისეთი გადამღებები, რომლებიც უკეთეს დონეზე გააშუქებენ”.

ყოფილი პარტნიორი: დარწმუნებული ვარ,ეს რეპორტაჟები 
ფედერაციის  თავკაცებს არ მოსწონთ

ამის თაობაზე კომენტარი GFF STUDIO-ს (რომელიც ადრე ახორციელებდა რეპორტაჟებს) ხელმძღვანელმა შალვა სამხარაძემ გაააკეთა:

“GFF STUDIO-მ პირველი რეპორტაჟი ორი წლის წინ გააკეთა. სულ, დაახლოებით მათი რაოდენობა 400-ს აღწევს. ფედერაციას საცდელი მაუწყებლობის დაწერა არც ერთზე არ დასჭირვებია, მათ შორის, არც - წელს და ჩვენი გადაღებულის გამო თავი არასოდეს უმართლებია. რაც შეეხება “ინსტატს”, ყველამ ვიცით, ვისთანაც თანამშრომლობს, შედეგი ჩანს. მთავარია, ვინაა სარეჟისორო პულტთან და კამერასთან. პრინციპში ისინიც ზუსტად ისე მუშაობენ, რამდენსაც უხდიან”.

“ლელო” შალვა სამხარაძეს დაუკავშირდა და კომენტარი ჩამოართვა: “რასაც გვთხოვდნენ, იმას ვაკეთებდით. ჩემპიონატის დაწყებამდე ათი დღით ადრე გვითხრეს, რომ ახალი კომპანია გამოჩნდა და უკეთეს პირობებს გვთავაზობსო. ჩვენ კონტრაქტი დამთავრებული გვქონდა. ჩვენი პირობები შევთავაზეთ, თუმცა მათი უკეთესი აღმოჩნდა. სამწუხაროდ, იმის გამო, რომ ამ ქვეყანაში გადასახადებს ვიხდით, ჩვენ უკეთესი ფასი ვერ შევთავაზეთ. რაც შეეხება ხარისხს - არც შევადარებ. უბრალოდ, მათსა და ჩვენს რეპორტაჟებს შორის პარალელსაც ვერ გავავლებ. პირდაპირ ვიტყვი, რომ ახლა ფედერაცია ცუდი ხარისხის რეპორტაჟებს ყიდულობს და თან ამაში ფულს იხდის. ამას იმიტომ არ ვამბობ, რომ რეპორტაჟებზე ჩვენ აღარ ვმუშაობთ”.

სამხარაძე არ უშვებს იმის შესაძლებლობას, რომ სფფ-სა და ირლანდიურ კომპანიას შორის 6-თვიანი ხელშეკრულების დასრულების შემდეგ რეპორტაჟები ისევ GFF STUDIO-მ განახორციელოს: “ეს გამორიცხულია. დარწმუნებული ვარ, ეს რეპორტაჟები ფედერაციის თავკაცებს არ მოსწონთ და მათ გემოვნებაშიც არ ჯდება. მაგრამ ჩემთვის გაუგებარია, ხარისხზე თვალებს რომ ხუჭავენ და აქცენტს ფასზე აკეთებენ. ისე, ამ კომპანიის ქართველ წარმომადგენლებზე საერთოდ არაფერი ვიცი, არასოდეს არსად შემხვედრიან. ისიც მაინტერესებს, ვინმემ მათი სტატისტიკა გადაამოწმა, სიმართლეს რამდენად შეეფერება?

ფედერაციასთან და იმ ირლანდიურ კომპანიასთან კი ასეთი შეთავაზება მაქვს: რამდენიმე თამაში პარალელურ რეჟიმში გაგვაკეთებინონ და ხალხმა და სპეციალისტებმა თქვან, უკეთესი რომელია. თავისთავად ჩვენ ამ რეპორტაჟებს ყოველგვარი ფინანსების გარეშე გავაკეთებთ, თუ ამისთვის მზაობა იქნება”.
ამის თაობაზე ფეხბურთის ფედერაციის გენერალურმა მდივანმა დავით მუჯირმა დეტალურად ილაპარაკა.

“საქართველოს ფეხბურთის ფედერაციას ჰყავს ახალი პარტნიორი ეს გახლავთ ირლანდიური კომპანია “ინსტატ ლიმიტედი”. ეს ევროპისა და მსოფლიოს საფეხბურთო წრეებში ცნობილი კომპანიაა, რომელიც უზრუნველყოფს გულშემატკივრებისთვის, მწვრთნელებისა და ფეხბურთელებისთვის საჭირო სტატისტიკური ინფორმაციების მიწოდებას, როგორც ინდივიდუალურის, ასევე - გუნდურის. მოხდა ამ ინფორმაციების ინტეგრირება ეროვნული ლიგის რეპორტაჟებში.

ამას გარდა, “ინსტატ ლიმიტედთან” ხელშეკრულების ფარგლებში, ამ კომპანიამ ფეხბურთის ფედერაციას სატელევიზიო გადაღებასთან დაკავშირებით ყველაზე სარფიანი წინადადება შესთავაზა. გარდა ამისა, სტატისტიკა დამატებით სერვისად შემოგვთავაზა”, - ამბობს მუჯირი და იქვე ხარისხზეც ამახვილებს ყურადღებას:

“ვიტყვი, რომ ჩვენთვის მთავარია რეპორტაჟების ხარისხი, რასაც გულშემატკივრები უკვე მივაჩვიეთ. მოთხოვნები მინიმუმ ის სტანდარტი იქნება, რაც აქამდე იყო. იმედია, ადგილობრივი რესურსით ხარისხის გაუმჯობესებას ირლანდიური კომპანიისგანაც მოვახერხებთ. ეს კი მოგვცემს საშუალებას, რომ გარკვეული თანხები დაიზოგოს. ირლანდიურ კომპანიასთან ხელშეკრულება ექვსთვიანია და თავად ნახავდით, რომ ჯერჯერობით რეპორტაჟები სატესტო რეჟიმში მიმდინარეობს. ასევე იყო იმ კომპანიის შემთხვევაშიც, რომელთანაც ადრე ვთანამშრომლობდით. მათთანაც სამუშაო რეჟიმში მივედით იმ კონკრეტულ სტანდარტამდე, რაც აკმაყოფილებდა როგორც ფეხბურთის ფედერაციას, ასევე - ქართველ გულშემატკივარს. ჩვენთვის პრიორიტეტული მხოლოდ ის მოთხოვნებია, რაც გულშემატკივარს და ფეხბურთის ფედერაციას აკმაყოფილებს და მხოლოდ შემდეგ მოდის ის დამატებითი სერვისი, რაც ამ ეტაპზე სტატისტიკაში გამოიხატება”. 

მუჯირმა ახალი ხელშეკრულების პლუსები ციფრებში დაასახელა: “ახალი კომპანიის უპირატესობა იმაში გამოიხატება, რომ სფფ ჯამში 200 ათასამდე ლარის ეკონომიას გააკეთებს. ეს კი ხელს შეგვიწყობს, რომ ჩვენ მიერ დაგეგმილი სხვა მრავალი პროექტი განვახორციელოთ, მათ შორის, ინფრასტრუქტურაში, ბავშვთა ფეხბურთსა და სხვადასხვა მასობრივ აქტივობებში”. 

ამავე დროს, სფფ-ის ერთ-ერთმა თავკაცმა აღნიშნა, რომ კომპანიაში საქართველოს მოქალაქეები მუშაობენ: “პროექტი ადგილობრივი რესურსით ხორციელდება. ადგილობრივები არიან პროექტის მენეჯერი, რეპორტაჟების რეჟისორები და ოპერატორები. ვისურვებდი და იმედი მაქვს, რომ ეს ადამიანები მალე აუღებენ საქმეს ალღოს და ის შენიშვნები, რომელიც გულშემატკივრებსა და სფფ-ის აქვთ, სამუშაო რეჟიმში მოგვარდება”. 

მუჯირი ქართული ლიგის მატჩების ჩვენების პროექტს პრიორიტეტულს უწოდებს: “აქვე ვიტყვი, რომ ლიგის სატელევიზიო რეპორტაჟების გაშუქება ჩვენთვის პრიორიტეტული პროექტია და მის განხორციელებას სფფ საკუთარი რესურსით ახერხებს, რასაც საერთაშორისო საფეხბურთო ბაზარსა და საქართველოში მოძიებული სპონსორების დახმარებით უზრუნველყოფს. ჩვენ რეპორტაჟებს ვზრდით და წელს ლიგა 3-ის და ლიგა 4-ის ცენტრალურ მატჩებსაც ვაჩვენებთ”. 

ფეხბურთი,  როგორც თემა

საკითხი, რომელიც ამ დავაში ჩრდილში მოექცა - მუჯირის თქმით, წლეულს ეროვნული ლიგის მიმართ სატელევიზიო კომპანიების ინტერესი გაიზარდა და გაშუქების კუთხით კონკურენტუნარიანი გარემო შეიქმნა.

“სამწუხაროდ, წლების წინ ჩვენ ნულიდან დაწყებამ მოგვიწია, როცა სატელევიზიო და ინტერნეტსივრცეში ეროვნული ლიგის ტრანსლაციების საშუალება არ იყო და გულშემატკივარი საკუთარი გუნდის თამაშს ვერ უყურებდა. წელს კი ფეხბურთის ფედერაციამ სხვადასხვა კომპანიებისგან უფრო მეტი ინტერესი დაინახა, კონკურენტუნარიან გარემოში კი “ინსტატ ლიმიტედმა” ყველაზე სარფიანი წინადადება შემოგვთავაზა”, - ამბობს მუჯირი. 

დავა სასიამოვნო ვერ იქნება, მაგრამ სასიამოვნო ეს მოულოდნელი ამბავია, რომელიც ამ საქმეს წითელ ხაზად გასდევს - როგორც ჩანს, ჩვენ იმ დროს მოვესწარით, როცა ეროვნული ჩემპიონატის მატჩების ტრანსლირების უფლებების მოსაპოვებლად კონკურენტი კომპანიები იბრძვიან. 

ლაპარაკია იმ ტურნირზე, რომელიც წლების განმავლობაში არავის აინტერესებდა. იყო მხოლოდ მცირე პერიოდი, როცა პროფლიგა საკითხის გააქტუალურებას ცდილობდა. მერე კი ის დროც გვახსოვს, როცა სატელევიზიო ეთერი ქართული ლიგის მიმართ გულგრილი იყო, ხოლო კონკურენციაზე ლაპარაკიც გამორიცხული გახლდათ. 

ახლა კი საქმე იქამდე მივიდა, ბოლო 4-5 დღე მთავარ სპორტულ თემად გადაიქცა, თუ ვინ აჩვენებს რეპორტაჟებს. რომ დავფიქრდეთ, ეს სასიამოვნო და სანატრელი დავაა, რომელიც ქართული ლიგისადმი ინტერესის ზრდაზე მეტყველებს.

ყოველდღიური სპორტული გაზეთი "ლელო"
1814
მკითხველის კომენტარები / 1 /
მიხეილი
0
კომპანიაზე დაწვრილებით ინფორმაცია რატომ არ დებენ ? ლინკი დადეს რომელიც არანაირ ინფორმაციას არ იძლევა .
არის რუსული კომპანია ინსტატი და ეს ვითომ ირლანდიური ეკუთვნის ვინმე კოზლოვს! !!
ან ქართველები თუ დაასაქმეს ერთმანეთში რუსულად ლაპარაკობენ ?
მსგავსი ამბები
რუბრიკის სხვა სიახლეები
;