მოულოდნელი და სასიხარულო: ანაჰაიმში ბრინჯაო ავწიეთ [VIDEO]

* ამერიკის ქალაქ ანაჰაიმში მიმდინარეობს ძალოსანთა მსოფლიოს ჩემპიონატი.
* საქართველოს დელეგაციამ პირველივე ცდით მოიპოვა მედალი.
* 62 კგ. წონით კატეგორიაში ბრინჯაოს პრიზიორი შოთა მიშველიძე გახდა.
* კალიფორნიულ ფიცარნაგზე კიდევ სამი ქართველი ძალოსანი გამოვა.
* ჩვენი უდიდესი იმედი კვლავ ოლიმპიურ ჩემპიონ ლაშა ტალახაძეს უკავშირდება.
* აკვრაში ქართველმა ძალოსანმა ამ წონით კატეგორიაში საქართველოს რეკორდი დაამყარა.

ამერიკულ ანაჰაიმში ძალოსანთა მსოფლიოს 2017 წლის ჩემპიონატზე საქართველოს ნაკრები (მთავარი მწვრთნელი ოლიმპიური ჩემპიონი გიორგი ასანიძე) ოთხი სპორტსმენით გაემგზავრა.

ჩვენებურთაგან ფიცარნაგზე პირველი შოთა მიშველიძე (პირადი წონა 62 კგ) გავიდა. წლეულს მან ალბანურ დურესში 23-წლამდელთა ევროპის ჩემპიონატში სამი ოქროს მედალი მოიპოვა: ატაცში -134, აკვრასა-153 და ორჭიდში-287 კგ. ამჯერად შოთამ 62 კილოგრამი წონითი კატეგორიის ატაცში ასპარეზობა 130 კილოგრამით დაიწყო, მაგრამ სტარტი გაუცუდდა. ეს წონა მეორე ცდაზე აიტაცა, შემდეგ 135-კილოგრამიანი შტანგა დაიმორჩილა და მე-4 ადგილი დაიკავა.

ამ მოძრაობაში პირველი იყო ვიეტნამელი ვინ ვან თრინი, რომელიც 136 კილოს მოერია. 135-135 კილოგრამით ვერცხლი და ბრინჯაო უზბეკმა ადხამჯონ ერგაშევმა (61.85) და მიენგნოკ ჰანმა (61.90) პირადი წონის გათვალისწინებით გაიყვეს.

ქართველმა ძალოსანმა აკვრაში სამივე ცდა (148, 157, 163) გამოიყენა. მესამე მისვლისას 163 კილოგრამის (საქართველოს რეკორდი) დაძლევა გაუჭირდა - მართალია, შტანგა მკერდზე იოლად აიგდო, მაგრამ შემდეგ აკვრისას ჩაჯდა და იმ წამს ძნელად თუ ვინმე დაიჯერებდა, რომ ამ წონას დაიმორჩილებდა. მიშველიძემ კი ეს შეძლო - ფაქტობრივად, ატაცი გამოუვიდა, თუმცა ამ მოძრაობაში მხოლოდ მე-5 ადგილი ერგო. სამაგიეროდ, ორჭიდში 298 კილოს მოუყარა თავი და ბრინჯაოს მედალი დაისაკუთრა.

ატაცში ვიეტნამელმა ჩემპიონმა თრინმა აკვრაში საწყისი წონა (165 კგ) ვერ დაძლია და ორჭიდში შეუფასებელი დარჩა; უზბეკი ერგაშევი მხოლოდ 157 კილოს მოერია და საბოლოოდ მე-4 ადგილით დაკმაყოფილდა - ქართველ ძალოსანს 6 კილოთი ჩამორჩა.

ვერც კორეელმა ჰანმა იყოჩაღა - 153 კილოს დასჯერდა. ამ მოძრაობაში ოქროს მედალი 170 კილოგრამით კოლუმბიელმა ფრანსისკო ანტონიო მოსკერა ვალენსიამ მოიპოვა. მეორე-მესამე ადგილებზე, შესაბამისად, მექსიკელები - ლინო ხოსე მონტესი (167 კგ) და ანტონიო მენდესი (165 კგ) გავიდნენ. მართალია, იაპონელმა იოიჩი იტოკაცუმაც, რომელიც ატაცში შოთას კილოგრამით ჩამორჩა, 165 კილო აკრა, მაგრამ პირადი წონით მექსიკელზე მძიმე აღმოჩნდა და მეოთხე იყო, სამაგიეროდ, მან ორჭიდში მოაგროვა 299 კილო და ვერცხლის მედალი დაიმსახურა.

300 კილოგრამით კვარცხლბეკის უმაღლეს საფეხურზე კოლუმბიელი ვალენსია ავიდა.

62 კგ
1. ფრანსისკო ანტონიო მოსკერა ვალენსია (კოლუმბია) - 300 (130+170)
2. იოიჩი იტოკაცუ (იაპონია) - 299 (134+165)
3. შოთა მიშველიძე (საქართველო) - 298 (135+163)

* * *
ანაჰაიმში საქართველოს ძალოსანთა ნაკრების კიდევ სამი წევრი გამოვა. მათ შორის - ოლიმპიური, მსოფლიოს და ევროპის მოქმედი ჩემპიონი ლაშა ტალახაძე (+105 კგ).

მართალია, ერთწლიანი დისკვალიფიკაციის გამო მას ამჯერად მეტოქეობას რუსი და სომეხი ძალოსნები ვერ გაუწევენ, მაგრამ ჩვენებურთან ერთად ჩემპიონობისთვის იბრძოლებენ ირანელი ბეჰდად სალიმიკორდაშიაბი და მისი თანამემამულე საედ ალიჰოსეინი, ასევე, ესტონელი მარტ სეიმი, ბრაზილიელი ფერნანდო სარაივა რეისი და სხვები.

ამ წონაში უნდა ეასპარეზა რიოს თამაშების ბრინჯაოს პრიზიორსა და ევროპის ჩემპიონ ირაკლი თურმანიძეს, მაგრამ მან ფეხის ტრავმის მოშუშება ვერ მოასწრო და 2018 წლის ევროპის ჩემპიონატისთვის მოემზადება.

კვარცხლბეკის უმაღლეს საფეხურზე ასასვლელად იბრძოლებს ანასტასია გოტფრიდი (90), რომელიც 23-წლამდელებში ევროპის პირველობის სამი ოქროს (ატაცი -123, აკვრა -140, ორჭიდი -263 კგ) და უფროსებში კონტინენტის ჩემპიონატის სამი ვერცხლის მფლობელია.

ჩვენებური ანაჰაიმში ისეთ ძლიერ მეტოქეებს დაუპირისპირდება, როგორებიც არიან ჩილელი ფერნანდა მარია ვალდესი, დომინიკელი დომინგა სანტანა, ეკვადორელი სელედინა ულიბა ნიევე აროიო.

ამერიკის ფიცარნაგს მოსინჯავს რევაზ დავითაძე (85), რომელმაც წლეულს ახალგაზრდებში ევროპის პირველობაზე სამ ოქროს (ატაცი-165, აკვრა-188, ორჭიდი-353 კგ) გამოჰკრა ხელი.

ქართველთა გამოსვლის განრიგი ჩვენი დროით
3 დეკემბერი. 23:55 - რევაზ დავითაძე (85 კგ),
5 დეკემბერი. 7:55 - ანასტასია გოტფრიდი (90 კგ),
6 დეკემბერი. 5:25 - ლაშა ტალახაძე (+105 კგ).

ყოველდღიური სპორტული გაზეთი "ლელო"
1382
მკითხველის კომენტარები / 0 /
მსგავსი ამბები
რუბრიკის სხვა სიახლეები
;