მოურინიომ დაასახელა სეზონის სიმბოლური ნაკრები... რონალდოს გარეშე, და მიზეზიც ახსნა...

ჟოზე მოურინიო, რომელიც ახლა უმუშევარია, ექსპერტობით იქცევს თავს. მიუხედავად მავანთა მტკიცებისა, რომ პორტუგალიელი სპეციალისტი თანამედროვე ფეხბურთის ბნელი მხარე და წარსულია, მისი თითოეული ფრაზა და ანალიზი მაინც დიდ ინტერესს იწვევს.

ჟოზემ შეადგინა სეზონის სიმბოლური ნაკრები, რომელშიც არ შეიყვანა კრიშტიანო რონალდო. მის რჩეულებს შორის "ლივერპულისა" და "აიაქსის" ფეხბურთელები სჭარბობენ და ეს სრულიად გასაგებია. ისე, საინტერესო იქნებოდა, რას მიაღწევდა ეს გუნდი, რეალურად რომ არსებობდეს და მას მოურინიოს თავკაცობდეს...

ჟოზემ წინასწარ განჭვრიტა, რომ ყველაზე მეტ კითხვას მის "გუნდში" რონალდოს არყოფნა გამოიწვევდა და კომენტარიც სწორედ ამ თემით დაიწყო: "პირველ რიგში, მინდა ავხსნა - სიმბოლურში არ შევიყვანე ფეხბურთელები, რომლებმაც არ ითამაშეს ნახევარფინალში. ეს ჩემი პრინციპია - ობიექტური და პრაგმატული.

ბევრმა ფეხბურთელმა ადრეულ სტადიაზე ძალიან დიდი შთაბეჭდილება მოახდინა, მაგრამ, ჩემი აზრით, სწორი იქნებოდა აქცენტის გაკეთება იმ გუნდების ფეხბურთელებზე, რომლებიც ნახევარფინალში გავიდნენ. ახლა კი დეტალურად თითოეულზე:

კარში ავირჩევ ალისონს, იმიტომ, რომ ფინალში ის ყოველთვის იყო იქ, სადაც ამას საჭიროება მოითხოვდა. განაპირა მცველებადაც ლივერპულელებს დავასახელებ - რობერტსონსა და ალექსანდერ-არნოლდს. ყველაფერთან ერთად, ისინი საოცარი პიროვნებები არიან. მაგალითად, რობერტსონი შოტლანდიელი ბიჭია, რომელიც "ლივერპულში" მოხვდა პრემიერლიგიდან გავარდნილი "ჰალიდან".

ორივე აგრესიულია. არაფრის ეშინიათ, თამამად მიდიან წინ და მონაწილეობენ შეტევებში. ფინალშიც დიდი დაწოლის ქვეშ იყვნენ, მაგრამ თავი არ შეურცხვენიათ. დაცვის ცენტრში ვან დაიკი არის მეფე! ასევე საოცარი პიროვნება. ტოპმოთამაშე, რომელიც ძალიან ძლიერია პოზიციის შერჩევისას.

დე ლიგტი - "აიაქსის" ახალგაზრდა კაპიტანი. ის ძალიან კარგად თამაშობდა საკვანძო მატჩებში და საჭირო გოლებიც გაჰქონდა. ეს თავისთავად ბევრ რამეზე მეტყველებს. ვფიქრობ, ისიც ღირსია, იყოს უძლიერესთა შორის. 

ნახევარდაცვის სხვა პოზიციებზეც "აიაქსის" ბიჭებს ავირჩევდი, იმიტომ, რომ "ლივერპული" ხშირად ცვლიდა ფეხბურთელებს ამ რგოლში. ვეინალდუმი, კეიტა, მილნერი - ისინიც ძალიან კარგები არიან და ძალიან ჰგვანან ერთმანეთს თავიანთი საფეხბურთო მახასიათებლებით.

ამიტომ ვირჩევ დე იონგსა და ვან დე ბეკს. მათ დიდი მომავალი აქვთ, არ დამავიწყდება, როგორ ითამაშეს მათ სტუმრად "რეალისა" და "იუვენტუსის" წინააღმდეგ. მათთან ერთად იქნება ერიქსენი. ის ძალიან კარგი იყო ფინალშიც, მიუხედავად იმისა, რომ მისი გუნდი დამარცხდა. მე ვიტყოდი, ის "ტოტენჰემის" კომპასია.

მიუხედავად "ენფილდის" საპასუხო მატჩში განცდილი ფიასკოსი, სიმბოლურ ნაკრებში დავასახელებ ლიონელ მესის. რონალდოს ჰქონდა შესანიშნავი "ქამბექი" "ატლეტიკოსთან", მაგრამ მისი "იუვენტუსი" ვერ გავიდა ნახევარფინალში. ლეოსთან ერთად წინა ხაზზე იქნებიან ლივერპულელები - მანე და სალაჰი".

ისე კი, საინტერესოა, რატომ არ შეიყვანა ჟოზემ სიმბოლურ ნაკრებში ლუკას მოურა, რომლის ჰეთ-თრიკმა "ტოტენჰემს" სასწაულებრივად შემოატრიალებინა "აიაქსთან" საპასუხო მატჩი, რომელსაც ორი თამაშის ჯამში 0:3-ს აგებდა. ალბათ იმიტომ, რომ მოურა არ იყო "მამლების" მთავარი ფიგურა მთელი ტურნირის განმავლობაში და ეს ჰეთ-თრიკი "წამიერ გაელვებად" ჩაუთვალა.

მოურინიოს აზრით, ვან დეიკს შეუძლია, პრეტენზია ჰქონდეს "ოქროს ბურთზეც": "რატომ არ უნდა იყოს მცველი? მართალია, ის არ არის პრემიერლიგის გამარჯვებული, მაგრამ მოიგო ჯილდო საუკეთესო მოთამაშისთვის. სამაგიეროდ, ვან დაიკმა "ლივერპულთან" ერთად ჩემპიონთა ლიგა მოიგო. წინ არის ერთა ლიგა, სადაც ჰოლანდიის ნაკრები თამაშობს.

შეიძლება, ერთა ლიგის თასი არ არის ყველაზე მთავარი ტროფეი ფეხბურთელისთვის, მაგრამ რატომაც არა? მესის შეუძლია, თავი გამოიჩინოს "კოპა ამერიკაზე", სალაჰს და მანეს - აფრიკის თასზე. ვფიქრობ, ისინიც არიან "ოქროს ბურთის" პრეტენდენტები", - ასე ფიქრობს ჟოზე.

ყოველდღიური სპორტული გაზეთი "ლელო"
1240
მკითხველის კომენტარები / 0 /
მსგავსი ამბები
რუბრიკის სხვა სიახლეები
;