მოურინიომ კლოპს დაარტყა: მას უყვარს ხორცი, მაგრამ მიიღო თევზი... ოლდ ტრაფორდი ის ადგილია, სადაც კლოპი ვერ იგებს...

ჟოზე მოურინიომ მძაფრად გააკრიტიკა იურგენ კლოპი. თავის მხრივ, გერმანელმა მწვრთნელმა კრიტიკის ქარ-ცეცხლში გაატარა "იუნაიტედის" თამაში მისი გუნდის წინააღმდეგ. კლოპი მიიჩნევს, რომ მეტოქე "მთელი თამაშის განმავლობაში დაცვაში იჯდა" და რომ ეს "ფეხბურთს სულაც არ ამშვენებს".

"იუნაიტედი" იგებდა, მაგრამ ადამ ლალანამ ბოლოსკენ გაათანაბრა ანგარიში და მატჩი 1:1 დასრულდა. ამ დროისთვის "ლივერპული" ისევ პირველ ადგილზეა და 6 ქულით უსწრებს უახლოეს მდევარს "მანჩესტერ სიტის".

"რაც ინგლისში ჩამოვედი, "იუნაიტედი" სულ დაცვით ფეხბურთს თამაშობს. შენ უნდა დაძლიო სირთულეები და მოწინააღმდეგე გატეხო, მაგრამ ეს ძალიან ძნელდება, რადგან ის მთელი გუნდით ზის უკან. ეს ერთხელ და ორჯერ არ მომხდარა, სულ ასე ხდება", - თქვა კლოპმა.

ეს კრიტიკა მწვავედ მიიღო "მანჩესტერ იუნაიტედის" ყოფილმა მწვრთნელმა ჟოზე მოურინიომ. მოგეხსენებათ, ის 2016-18 წლებში ხელმძღვანელობდა "წითელ ეშმაკებს" და კლოპმა ოლე გუნარ სულშერის გარდა, მასაც გაჰკრა კბილი ზედმეტად დაცვითი ფეხბურთისთვის.

"არ გამკვირვებია კლოპის კრიტიკა. მას უყვარს ხორცი, მაგრამ მიიღო თევზი. ამდენად, მისი უკმაყოფილების მიზეზი ჩემთვის სავსებით გასაგებია", - ამბობს ჟოზე.

მან ყურადღება მიაქცია იმასაც, რომ "ლივერპულმა" ვერ დაამხო მისი "ჩელსის" რეკორდი, რომელიც სეზონის 9 სასტარტო შეხვედრაში გამარჯვების შედეგად დამყარდა. ეს საამაყო ამბავი "ჩელსიმ" სწორედ მოურინიოს ხელმძღვანელობით შეძლო 2005-06 წლების სეზონის სტარტზე.

"დიახ, მე ბედნიერი ვარ, რომ კლოპმა ეს რეკორდი ვერ დაამხო. ზოგადად, ყველა რეკორდი ემხობა ოდესმე, მაგრამ მჯეროდა, რომ ამას ვერ შეძლებდა. "ოლდ ტრაფორდი" ის ადგილია, სადაც კლოპი ვერ იგებს", - თქვა მოურინიომ.

ჟოზე მართალია: "ლივერპულში" მოსვლის შემდეგ კლოპმა, ყველა ტურნირის ჩათვლით 5 მატჩი ითამაშა "ოლდ ტრაფორდზე", საიდანაც ერთში დამარცხდა და 4 ფრედ ითამაშა.

658
მკითხველის კომენტარები / 0 /
მსგავსი ამბები
რუბრიკის სხვა სიახლეები
;