მოურინიოს შემცვლელად პოჩეტინოს ამზადებენ, დირექტორატის ნაწილს ზიდანი აეჭვებს...

ინგლისური "ინდიფენდენტი" სანდო წყაროზე დაყრდნობით წერს, რომ "მანჩესტერ იუნაიტედის" მომავალი მწვრთნელი მაურისიო პოჩეტინო იქნება და არა ზინედინ ზიდანი, რაზეც ბოლო პერიოდში ბევრს წერენ.

გამოცემა ამტკიცებს, რომ "იუნაიტედის" დირექტორატის წევრთა ერთ ნაწილს სერიოზულად აეჭვებს ზიდანის კანდიდატურა იმ მოტივით, რომ ის საერთოდ არც იცნობს პრემიერლიგას, განსხვავებით პოჩეტინოსგან, რომელსაც მსოფლიოს ერთ-ერთ უძლიერეს ლიგაში მუშაობის ზღვა გამოცდილება დაუგროვდა.

თუმცა დირექტორატის მეორე ნაწილს, ვინც ზიდანს ემხრობა, არანაკლებ წონადი არგუმენტი მოჰყავს - "ზიზუს" აქვს გამარჯვებულის მენტალიტეტი, რითიც ნამდვილად ვერ დაიკვეხნის პოჩეტინო. მართალია, მის ხელში "ტოტენჰემი" სერიოზულ ძალად იქცა, მაგრამ ტიტულებს ჯერჯერობით ვერ იგებსო, ასე მსჯელობენ თურმე ზიდანის მომხრეები.

"ინდიფენდენტი" გვარწმუნებს, რომ პოჩეტინოს მომხრებს აშკარა რიცხობრივი უპირატესობა აქვთ. მოკლედ, ვნახოთ, ვისი აჯობებს. ფაქტი მხოლოდ ის არის, რომ ჯერჯერობით ჟოზე მოურინიო პოსტს ინარჩუნებს...

801
მკითხველის კომენტარები / 0 /
მსგავსი ამბები
რუბრიკის სხვა სიახლეები
;