მოურინიო პორტუგალიის ნაკრებში?

"დეილი მეილის" ინფორმაციით, პორტუგალიის ფეხბურთის ფედერაცია ჟოზე მოურინიოს ეროვნული ნაკრების მთავარ მწვრთნელად განიხილავს. პორტუგალიური ფეხბურთი "მამები" ყურადღებით აკვირდებიან მოურინიოსა და "მანჩესტერ იუნაიტედის" ხელმძღვანელობას, ასევე, ცალკეულ ფეხბურთელებს შორის გართულებულ ურთიერთობას, რამაც სახელოვან მწვრთნელს, შესაძლოა, პოსტის დატოვებისკენ უბიძგოს.

ბოლო პერიოდში მოურინიო ხშირად აკრიტიკებდა "იუნაიტედის" ბოსებს სატრანსფერო პოლიტიკის გამო. 55 წლის პორტუგალიელი სპეციალისტი რამდენიმე ფეხბურთელის ყიდვას ითხოვს, რათა ცალკეული პოზიციები გააძლიეროს და კონკურენციის დონე აამაღლოს. ამასწინათ, მან ისიც კი თქვა, რომ ძალიან ეშინია პრემიერლიგის სტარტის.

თავის მხრივ, ინგლისურმა ტოტალიზატორებმა ყველაზე დაბალი კოეფიციენტი (რაც მაღალ ალბათობას ნიშნავს) მიანიჭეს იმ პოზიციას, რომ პრემიერლიგის ახალ სეზონში პირველი მწვრთნელი, ვინც პოსტს დატოვებს, სწორედ მოურინიო იქნება.

თავის დროზე ჟოზემ თქვა, რომ დიდად არ იწვის პორტუგალიის ნაკრებში მუშაობის სურვილით, თუმც ძალიან კი უნდა, რომ ერთ მშვენიერ დღეს სამწვრთნელო კარიერა სწორედ ამ პოსტზე დაასრულოს.

სემ ელარდაისის გადადგომის შემდეგ, ინგლისის საფეხბურთო ასოციაცია ამ ქვეყნის ნაკრების მთავარ მწვრთნელად მოურინიოსაც განიხილავდა, თუმცა ჟოზემ მაშინ თქვა:

"რა თქმა უნდა, ეს ძალიან დიდი პატივია, მაგრამ ჩემი სამშობლოა პორტუგალიაა და თუ მისთვის და მისი ხალხისთვის გავაკეთებ რამეს, ეს განსაკუთრებული მოვლენა იქნებოდა ჩემს ცხოვრებაში".

ამჟამად, პორტუგალიის ნაკრების მწვრთნელი ფერნანდო სანტუშია, ვის ხელშიც ამ გუნდმა 2016 წელს ევროპის ჩემპიონატი მოიგო, თუმცა უსახურად ითამაშა ახლახან დასრულებულ მსოფლიოს ჩემპიონატზე.

818
მკითხველის კომენტარები / 0 /
მსგავსი ამბები
რუბრიკის სხვა სიახლეები
;