მოურინიო შიშობს: ბეილი ძალიან ძვირია! - სატრანსფერო ბაზარი აწრიალდა

დასრულდა ევროპული ჩემპიონატები და სატრანსფერო ბაზარიც აწრიალდა.

ალბათ, ამას ვერც მოახლოებული მუნდიალი შეუშლის ხელს. თუმცა კლუბები, თავისთავად, გაფაციცებით მიადევნებენ თვალს მსოფლიოს ჩემპიონატს, რომელმაც, შეიძლება, ბევრი ისეთი ვარსკვლავი წარმოაჩინოს, დღეს შედარებით ჩრდილში რომ დგას და თავის დროს ელოდება.

ამას გარდა, ბევრს ფეხბურთელს ურჩევნია, ახლავე გაარკვიოს თავისი მომავალი, რათა 14 ივნისიდან მხოლოდ მსოფლიოს ჩემპიონატზე იყო კონცენტრირებული...

ჩვენ კი ჩვენსას მივხედოთ. სატრანსფერო ბაზრის გარშემო ბევრია ჭორ-მართალი და ამ ყველაფერში გარკვევა და ანალიზი ამ ეტაპზე ძალიან ძნელია. ამიტომ, ჯობია, ამ მომენტისთვის მშრალი ინფორმაციებით შემოვიფარგლოთ...

* "დეილი მეილი" წერს, რომ "მანჩესტერ სიტი" მზადაა, "ლესტერის" 27 წლის შემტევ რიად მაჰრეზის ტრანსფერში 75 მილიონი ფუნტი გადაიხადოს.

* "მანჩესტერ იუნაიტედის" თავკაცი ჟოზე მოურინიო შიშობს, რომ გარეთ ბეილის ფასი, - 335 მილიონი ფუნტი, მისი კლუბის შეფებს დააფრთხობს და ტრანსფერის სურვილს გაუქრობს. ცხადია, რომ უელსელის ფასმა ჩემპიონთა ლიგის ფინალის შემდეგ კიდევ უფრო მოიმატა, - წერს "დეილი ექსპრესი".

* "ფულჰემის" ვარსკვლავი, 18 წლის რაიან სესენიონი, რომელიც ინგლისური ფეხბურთის იმედია, გუნდში რჩება, - განუცხადა კლუბის მფლობელმა შაჰიდ ხანმა "თაიმსს". შეგახსენებთ, რომ "ფულჰემი" პრემიერლიგაში დაბრუნდა და შესაბამისად, სესენიონის ფასი, თუ ელიტაში თავს გაიმოიჩენს, კიდევ უფრო გაიზრდება.

* "ლივერპულს" ძალიან უნდა "ლიონის" ფორვარდ ნაბილ ფეკირის ყიდვა და საამისოდ 60 მილიონ ფუნტს ამზადებს. Goal.comის ინფორმაციით, მერსისაიდელები 24 წლის ფრანგის ტრანსფერთან დაკავშირებით მოლაპარაკების დაწყებას ამ კვირიდან აპირებენ.

* "რომას" სპორტული დირექტორი მონჩი "მირორთან" ინტერვიუში ადასტურებს ცალკეული კლუბების ინტერესს გუნდის ბრაზილიელის მეკარის, ალისონის მიმართ. 25 წლის კიპერი "სელესაოს" პირველი ნომერია. მისი შესაძენად განსაკუთრებით "ლივერპული" აქტიურობს და ეს გასაგებიცაა - ჩემპიონთა ლიგის ფინალმა კიდევ ერთხელ დაადასტურა, რომ იურგენ კლოპს კარში სერიოზული პრობლემა აქვს.

* "სანის" ინფორმაციით, "მანჩესტერ იუნაიტედი" "ასტონ ვილას" 22 წლის ნახევარმცველ ჯეკ გრილიშს აკვირდება.

* "ლესტერი" მზადაა, ჯეიმი ვარდისთან ახალი კონტრაქტის დეტალებზე მოლაპარაკება დაიწყოს. "დეილი სტარი" წერს, რომ "მელიები" 31 წლის ფორვარდს კვირაში 120 ათას ფუნტს შესთავაზებენ.

* "მირორის" ინფორმაციით, "ნაპოლიმ" უარყო "მანჩესტერ სიტის" შეთავაზება ნახევარმცველ ჟორჟინიოსთან დაკავშირებით. "ქალაქელებმა" იტალიის ვიცე-ჩემპიონს 39 მილიონი ფუნტი შესთავაზეს ("ნაპოლი" 52 მილიონს ითხოვს) 26 წლის ბრაზილიელში, რომელიც 2016 წლიდან "სკუადრა აძურას" მაისურით თამაშობს. ჟორჟინიოს გადაბირება "ჩელსისაც" სურს.

* გავრცელებული ხმების საწინააღმდეგოდ, "მანჩესტერ იუნაიტედის" 22 წლის მცველი ლუკ შოუ, შესაძლოა, მომავალ სეზონშიც "ოლდ ტრაფორდზე" ვიხილოთო, - წერს "დეილი მეილი".

* "მანჩესტერ ივნინგ ნიუსის" ცნობით, "სიტი" მზად არის "პარი სენ-ჟერმენს" კილიან მბაპესთვის შეებრძოლოს. მოგეხსენებათ, 19 წლის შემტევი დღემდე "მონაკოს" საკუთრებაა, პსჟ კი, სადაც ის იჯარით გაუშვეს, გამოსყიდვაზე პრიორიტეტული უფლებით სარგებლობს. თუმცა გააჩნია, ვინ რამდენს შესთავაზებს "მონაკოს"...

* "ვესტ ჰემის" სამიზნეში "ფიორენტინას" ნახევარმცველი მილან ბადელი მოხვდა. 29 წლის ხორვატს სადაცაა კონტრაქტის ვადა ამოეწურება, თუმცა "იები" იმედოვნებენ, რომ ფეხბურთელს ახალ ხელშეკრულებაზე დაიყოლიებენ. ინფორმაციას იტალიური "ტუტომერკატო" ავრცელებს.

* ხორვატულ "სპორტსკე ნოვოსტისთვის" ინტერვიუში "ატლეტიკოს" მცველი შიმე ვრსალიკო ამბობს, რომ ბედნიერია დიეგო სიმეონეს გუნდში. ეს იმ ინფორმაციის პასუხად, თითქოს, 26 წლის ფეხბურთელის გადაბირებას "მანჩესტერ იუნაიტედი" აპირებს.

* თურქული მედიის ინფორმაციით, "ნიუკასლს" 33 წლის სლოვაკი მცველის, მარტინ შკრტელის ყიდვა სურს. "ლივერპულის" ყოფილი ფეხბურთელი ამჟამად "ფენერბაჰჩეს" ღირსებას იცავს.

* საფრანგეთის ნაკრების მცველი სამუელ უმტიტი ამბობს, რომ "ბარსელონაში" დარჩენა სურს. "სანის" ინფორმაციით, 24 წლის ფეხბურთელი ამ ზაფხულს "მანჩესტერ იუნაიტედის" ერთ-ერთი მთავარი სამიზნე იქნება.

ყოველდღიური სპორტული გაზეთი "ლელო"
1158
მკითხველის კომენტარები / 0 /
მსგავსი ამბები
რუბრიკის სხვა სიახლეები
;