მოფარიკავეები უნგრეთში, მსოფლიოს თასზე - ჯიჯეიშვილი მეექვსეა, რეჭია - მეათე

ქართველმა მოფარიკავეებმა ახალ წელს პირველ საერთაშორისო ტურნირში იასპარეზეს:

გასულ უქმეებზე მოხმალავეები (მწვრთნელი ალექსანდრ ტორჩუკი) - ლიკა ჯიჯეიშვილი, ვაჟა რეჭია და ნიკა შენგელია უნგრეთის დედაქალაქ ბუდაპეშტში ახალგაზრდების მსოფლიოს თასზე - დიორდ გურევიჩის მემორიალში ცდიდნენ ძალებს.

ლიკა ჯიჯეიშვილმა შარშან 23-წლამდელთა ევროპის ჩემპიონატში მე-6 ადგილი დაიკავა. ბუდაპეშტის ტურნირშიც მსგავსი შედეგით დაკმაყოფილდა. ჩვენებურმა ჯგუფში ექვსიდან ხუთ მოხმალავეს მოუგო - ვირად კობრას (უნგრეთი, 5:1), ლიზა რუეტგერსს (გერმანია, 5:1), კლაუდია მალგრემს (ჰოლანდია, 5:2), ანა ვანკოვას (რუსეთი, 5:1), ანა კუდერს (საფრანგეთი, 5:1) და ერთადერთი შეხვედრა იტალიელ ჯულია არპინოსთან წააგო ერთი ჩხვლეტით - 4:5, ამიტომ პლეი ოფში პირველი წრიდანვე ჩაება, სადაც ავსტრიელ ევა-მარია გუტშის წარმატების იოტისოდენა შანსიც არ დაუტოვა - 15:4 გაიმარჯვა.

მომდევნო წრეში უნგრელი კატა ბატორის (უნგრეთი, 15:14) მძლეველ მარია მატეს (რუმინეთი) შეხვდა და 15:10 მოუგო. მეთექვსმეტდფინალში უკრაინელი ოლექსანდრა ბონდარი (15:11), ხოლო მერვედფინალში ფრანგი კოლინ სუზანი (15:14) ჩამოიშორა გზიდან. ფრანგი ახალგაზრდებს შორის პირადში ევროპის ჩემპიონატის მეხუთეადგილოსანი და გუნდურში ვერცხლის პრიზიორია.

ჯიჯეიშვილი საუკეთესო ოთხეულში შესასვლელად გერმანელ ლიზა გეტეს დაუპირისპირდა. ამ უკანასკნელმა, რომელიც 20-წლამდელებში ევროპის 2018 წლის ჩემპიონატის ბრინჯაოს მედალოსანია, მერვედფინალში იტალიელ ჯულია არპინოს სძლია 15:3. მეოთხედფინალში ჯიჯეიშვილსაც აჯობა - 15:11. ქართველ მოხმალავეს 152 მონაწილეს შორის მე-6 ადგილი ხვდა. კვარცხლბეკზე კი ადგილები ასე განაწილდა: 1. ლიზა პუშტაი (უნგრთი), 2. კატლინ მაქსველი (დიდი ბრიტანეთი), 3. ლიზა გეტე (გერმანია) და იოანა ილიევა (ბულგარეთი). 

ვაჟებშიც სხდასხვა ქვეყნის 152 წარმომადგენელი იბრძოდა საპრიზო ადგილებისთვის. ჯგუფში შესანიშნავად იასპარეზა უფროსებში შარშანდელი გუნდური მსოფლიოს ჩემპიონატის მეოთხეადგილოსანმა ვაჟა რეჭიამ - ექვსივე შეხვედრა მოიგო. სტარტზე ახალგაზრდებში მსოფლიოს ჩემპიონს, უნგრული ტურნირის მომავალ ფინალისტ  ვლადისლავ პოზდნიაკოვს (რუსეთი) სძლია დაძაბულ პაექრობაში 5:4, შემდეგ დაამარცხა ფრანცისკო არელანო (ესპანეთი, 5:0), ლუკა ფიორეტო (იტალია, 5:4), როლანდ პაპი (უნგრეთი, 5:1), კრისტიან ჰიგარტი (ირლანდია, 5:2), ტანგუ დესმო (საფრანგეთი, 5:3) და პირდაპირ 64 საუკეთესოში მოხვდა, ამიტომ პლეი ოფის პირველ წრეში თავისუფალი იყო. მეორეში ჯულიან რიჩარდსი (დიდი ბრიტანეთი) დაჯაბნა - 15:11, შემდეგ მის კვალს გაუყენა იტალიელი მატია რეა - 15:13 და 16 საუკეთესოში დაიბევა ადგილი. აქ კი დიდიბრიტანელი იან რენს სათანადო მეტოქეობა ვერ გაუწია - 8:15 დამარცხდა და მე-10 ადგილი დაიკავა.

23-წლამდელებში ევროპის 2018 წლის ჩემპიონატის ვერცხლის პრიზიორმა ნიკა შენგელიამ თანაგუნდელებს მხარი ვერ აუბა. მართალია, ნიკამ ჯგუფში ოთხ მეტოქეს აჯობა - უნგრელ მატიაშ ბააკენს (5:3), შვეიცარიელ ადრიენ ჰეროუდს (5:1), ესპანელ ნილ ვალჰონრატსა (5:0) და ბულგარელ ტოდორ სტოიჩევს (5:4), მაგრამ გერმანელ ლეონ შლაფერსა (4:5) და უკრაინელ ივან პისარენკოსთან (3:5) დათმო პაექრობები და 64-ში ვერ მოხვდა. იქ შესასვლელი ორთაბრძოლა კი ჯორჯე დრაგომირთან (რუმინეთი, 9:15) წააგო და 69-ე ადგილს დასჯერდა. პირველ-მესამე ადგილებზე გავიდნენ: მატეო ნერი (იტალია), 2. ვლადისლავ პოზდნიაკოვი (რუსეთი), 3. ლორენცო რომა (იტალია) და ჟულის ჟერაუდი (საფრანგეთი).

11-12 იანვარს პარიზში საფრანგეთის საერთაშორისო ჩელენჯტურნირი გაიმართება რაპირაში. აქ ლუკა ღაღანიძე და ლაშა გალუაშვილი იბრძოლებენ, რომლებმაც დეკემბრის მიწურულს წარმატებით იასპარეზეს მინსკის ღია პირველობაზე.

ამავე რიცხვებში კუბის დედაქალაქი ჰავანა დაშნით მოფარიკავეებს გაუღებს კარს La Copa del Mundo de Espada que se celebrarქ en La Habana-ს ტურნირზე. საქართველოს ნაკრების წევრებიდან აქ  თბილისელი მაია გუჩმაზოვა გამოვა.

ყოველდღიური სპორტული გაზეთი "ლელო"
693
მკითხველის კომენტარები / 0 /
მსგავსი ამბები
რუბრიკის სხვა სიახლეები
;