მოფარიკავეთა ევროპის ჩემპიონატი დამთავრდა - ისევ მერვე ადგილზე

სერბულ ნოვი სადში გუშინ დამთავრდა მოფარიკავეთა ევროპის ჩემპიონატი. ასპარეზობის ბოლო დღეს საფარიკაო ბილიკებზე ერთმანეთს დაუპირისპირდნენ მოხმალავე ვაჟთა გუნდები.

მედლებისთვის 13 ნაკრები იბრძოდა. ქართველები (სანდრო და ბექა ბაზაძეები, მიხეილ მარდალეიშვილი, ნიკა შენგელია) სტარტზე ბელარუსებს შეხვდნენ. პირველსავე ორთაბრძოლაში მარდალეიშვილმა სიარჰეი კისელს 5:3 სძლია და თავისი გუნდი დააწინაურა. აქედან მოყოლებული ჩვენებს უპირატესობა ხელიდან არ გაუშვიათ და საბოლოოდ 45:36 გაიმარჯვეს.

მეოთხედფინალში საქართველოს ნაკრები მეტოქეობას უწევდა იტალიას, რომელიც პირველ წრეში ისვენებდა. თავიდან აპენინელები გავიდნენ წინ - 5:2, მაგრამ ევროპის ჩემპიონატების უკვე ორგზის ბრინჯაოს პრიზიორმა სანდრო ბაზაძემ ლუიჯი სამელეს 8:4 მოუგო და ინიციატივას ქართველები დაეუფლნენ, თუმცა მცირე ხნით.

მერე სანდრომ კიდევ ერთხელ გაიბრწყინა, როცა ენრიკო ბერეს 9:5 სძლია, მაგრამ ჩვენებმა მატჩში გარდატეხა ვერ შეიტანეს და ოთხი ქულით დამარცხდნენ - 41:45. ეტყობა, ამ წაგებამ ჩვენს გუნდზე უარყოფითად იმოქმედა, რადგან ჯერ საფრანგეთთან (42:45), ბოლო ორთაბრძოლა კი უკრაინასთან დათმო (40:45) და, როგორც შარშან თბილისში, მერვე ადგილს დასჯერდა.

ნახევარფინალში უნგრეთმა მეოთხედფინალში რუსეთის მძლეველი რუმინეთი დაჯაბნა - 45:37, ხოლო იტალიამ გერმანიას ერთი ჩხვლეტის უპირატესობით მოუგო - 45:44. გადამწყვეტი პაექრობა კი ასე დამთავრდა: იტალია-უნგრეთი 33:45

ქართველი მოფარიკავეები სამშობლოში დაბრუნების შემდეგ მსოფლიოს ჩემპიონატისთვის მოემზადებიან, რომელსაც ერთ თვეში ჩინეთი უმასპინძლებს.

ყოველდღიური სპორტული გაზეთი "ლელო"
626
მკითხველის კომენტარები / 0 /
მსგავსი ამბები
რუბრიკის სხვა სიახლეები
;