მოფარიკავეთა მსოფლიოს ჩემპიონატი - 64 საუკეთესოში ექვსი ქართველია 

უნგრეთის დედაქალაქ ბუდაპეშტში გრძელდება მოფარიკავეთა მსოფლიოს ჩემპიონატი, რომელშიც საქართველოს 10 წარმომადგენელი ჩაება. პირად პირველობაში 6 ჩვენებური მედლებისთვის ბრძოლას განაგრძობს. 

უკვე ვწერდით, რომ მოხმალავე ვაჟთა ტურნირში ჯგუფური ეტაპიდან 64 საუკეთესოში მოხვდა მიხეილ მარდალეიშვილი, ხოლო ევროპის სამგზის პრიზიორი სანდრო ბაზაძე პირველობაზე მე-11 ნომრად არის განთესილი და ჯგუფური ეტაპიდან თავისუფალი იყო. დღეს ორივე ქართველი მოხმალავე პაექრობას განაახლებს:

სანდრო ბაზაძე პირველ შეხვედრას აარონ ზი ლონგ ჰოსთან (ჰონკონგი) გამართავს, ხოლო მიხეილ მარდალეიშვილი სახელოვან უნგრელ მოფარიკავეს - ინდივიდუალურში 2017 წლის მსოფლიოს ჩემპიონს, გუნდურში მსოფლიოს ჩემპიონატების 2-2 ვერცხლისა და ბრინჯაოს, ევროპის პირველობებზე თითო ოქრო-ვერცხლისა და ორი ბრინჯაოს მფლობელ ანდრაშ სატმარს დაუპირისპირდება. ბადის იმ მხარეს, სადაც მარდალეიშვილია, უძლიერესმა შემადგენლობამ მოიყარა თავი. ესენი არიან მსოფლიოს კლასიფიკაციის ლიდერი ელი დერშვიცი (აშშ), კორეელი იუჰო კიმი, იტალიელი ალდო მონტანო, რუსი ვილიამინ რეშეტნიკოვი, რუმინელი იულიან ტეოდოსიუ, უნგრეში ტამაშ დეში... 

გუშინ მოხმალავე ვაჟთა მაგალითს ოთხმა ჩვენებურმა მიბაძა. რაპირით ფარიკაობაში ძალებს ცდიდნენ ლუკა ღაღანიძე და ლაშა გალუაშვილი. ლუკამ ჯგუფში ხუთივე მეტოქე დაამარცხა და პირდაპირ 64-ში მოხვდა, ხოლო ლაშამ საამისოდ პლეი ოფის ორი ეტაპი გადალახა, რადგან ჯგუფში ექვსიდან ოთხი შეხვედრა მოიგო და ორიც დათმო. ჩვენი რაპირისტები პაექრობას შაბათს - 20 ივლისს განაახლებენ. 

ლუკა ღაღანიძე: მარკუს მეპსტიდი (დიდი ბრიტანეთი, 5:1), მარტინო მინუტო (თურქეთი, 5:1), მან კიტ ჰოი (მაკაო, 5:2), ლუკას მოტიატი (ბელგია, 5:3), დონალდ ტრეანორი (ბერმუდის კუნძულები, 5:0). 

ლაშა გალუაშვილი: ტიმურ არსლანოვი (რუსეთი, 3:5), ჯერემი ფაფა კერიუელი (კოტ დივუარი, 3:5), პეტარ ფილესი (ხორვატია, 5:3), მატან ცუკერმანი (ისრაელი, 5:3), ანდრეი კრალიკი (სლოვაკეთი, 5:4), ვასილეიოს სტანტსიოსი (საბერძნეთი, 5:3). პლეი ოფი: ხუან სებასტიან უნდა (მექსიკა) 15:6, მოჰამედ სამანდი (ტუნისი) 15:12.

გუშინვე დღის მეორე ნახევარში საფარიკაო ბილიკებზე გავიდნენ მოხმალავე ქალები. საქართველოს სპორტის ღირსებას იცავდნენ 2017 წლის ევროპის ჩემპიონი თეოდორა კახიანი, ლიკა ჯიჯეიშვილი და დარია ანტონოვა. კახიანმა ჯგუფში ოთხ მეტოქეს აჯობა, ორთან კი ვერაფერს გახდა, სამაგიეროდ, პლეი ოფში ოლენა ვორონინას (უკრაინა) მოუგო 15:10 და 64 საუკეთესოში დაიბევა ადგილი, სადაც 20 ივლისს პირველ წრეში პალინა კასპიაროვიჩს (ბელარუსი) შეხვდება. თანაგუნდელს მხარი აუბა 20 წლის ლიკა ჯიჯეიშვილმა: ჯგუფში ოთხი მოგებისა და ერთი მარცხის შემდეგ პლეი ოფში ანხელინა მარია ბლანკო (კოლუმბია) ჩამოიშორა გზიდან (15:7) და 64-ის სტარტზე ქსიაოი ძიას (ჩინეთი) გაუწევს მეტოქეობას. 

თეოდორა კახიანი: სეონა ჰვანგი (სამ.კორეა, 1:5), ლაია ვილია (ესპანეთი, 5:1), დარია ანდრეევა (ბელარუსი, 5:1), ესტერ ბენტოლილა (პანამა, 5:4), ჯესიკა ონგი (სინგაპური, 4:5), არიუნზაია იუნდენდორია (მონგოლეთი, 5:1); პლეი ოფი: ოლენა ვორონინა (უკრაინა) 15:10. 

ლიკა ჯიჯეიშვილი: მარია ბელენ პერეს მორისი (არგენტინა, 5:1), ჩიკა აოკი (იაპონია, 5:0), სინ იანგ აუ (ჰონკონგი, 5:1), სევინჩ ისმაილოვა (უზბეკეთი, 2:5), კარ მუნ ლი (სინგაპური, 5:1); პლეი ოფი: ანხელინა მარია ბლანკო (კოლუმბია) 15:7. 

დარია ანტონოვა: დესპინა გეორგიადო (საბერძნეთი, 2:5), ეილინ გრინჩი (პანამა, 2:5), ალგერიმ სარიბეი (ყაზახეთი, 3:5), ოლგა ჰრამოვა (ბულგარეთი, 1:5), კიანა ბაგერზადეჰი (ირანი, 5:1), ტონხაუ პოკაიუ (ტაილანდი, 2:5). პლეი ოფში ვერ გავიდა და 126-ე ადგილს დასჯერდა. 

ყოველდღიური სპორტული გაზეთი "ლელო"
183
მკითხველის კომენტარები / 0 /
მსგავსი ამბები
რუბრიკის სხვა სიახლეები
;