მოჭადრაკეთა მსოფლიოს თასის გათამაშება - საქართველოდან მხოლოდ ჩეპარინოვია 

რუსულ ხანტი-მანსიისკში გუშინ დაიწყო მოჭადრაკეთა მსოფლიოს თასის გათამაშება, რომელიც სათავეს 2000 წლიდან იღებს. შეჯიბრებაში ნოკაუტსისტემით პლანეტის სხვადასხვა ქვეყნის 128 წარმომადგენელი მონაწილეობს.

მეტოქეები თითოეულ წრეში 2-2 კლასიკურ პარტიას (ფინალში - 4 პარტიას) ითამაშებენ. თანაბარი ანგარიშის შემთხვევაში დაინიშნება ტაიბრეიკი: ჯერ ორი 25-25-წუთიანი პარტია თითოეულ სვლაზე 10-10 წამის დამატებით, საჭიროების შემთხვევაში - ორი 10-10-წუთიანი პარტია 10-10 წამის და ორი ხუთ-ხუთწუთიანი პარტია 3-3 წამის დამატებით, ბოლოს კი „არმაგედონი“, სადაც თეთრებს 5, შავებს კი წუთით ნაკლები ეძლევათ. ყაიმის შემთხვევაში გამარჯვება შავებისაა.

მსოფლიოს თასის ფინალისტები გაისად გასამართავი პრეტენდენტთა ტურნირის საგზურებს დაიმსახურებენ. იქ გამარჯვებული კი ტიტულისთვის მსოფლიოს ჩემპიონ მაგნუს კარლსენს (ნორვეგია) დაუპირისპირდება. 

ხანტი-მანსიისკში საქართველოს სპორტის ღირსებას ნატურალიზებული ბულგარელი ივან ჩეპარინოვი (2670) იცავს. სტარტზე მისი მეტოქეა ეგვიპტელი აჰმედ ადლი (2636). ჩეპარინოვმა პირველ პარტიაში თეთრი ფიგურებით აფრიკელს 72-ე სვლაზე გააჩერებინა საათი და დაწინაურდა - 1:0. მეორე ეტეპზე გასასვლელად დღეს შავებით ყაიმიც ჰყოფნის. წარმატების შემთხვევაში მისი მომდევნო მეტოქე ილია ილიუშენოკსა (2540) და ვლადისლავ არტემიევს (2746, ორივე - რუსეთი) შორის გამარჯვებული იქნება. მათი პირველი პარტია ყაიმით დასრულდა.

ყოველდღიური სპორტული გაზეთი "ლელო"
170
მკითხველის კომენტარები / 0 /
მსგავსი ამბები
რუბრიკის სხვა სიახლეები
;