მოჭადრაკე ქალთა ევროპის ჩემპიონატი: ორი დასანანი მარცხი

მონაკოში დაიწყო მოჭადრაკე ქალთა ევროპის ჩემპიონატი რაპიდსა და ბლიცში. ორი დღე სწრაფ ჭადრაკს დაეთმო, რომელშიც სხვადასხვა ქვეყნის 91 წარმომადგენელი მონაწილეობს, მათ შორის - ქართველი დიდოსტატი, კლასიკურ ჭადრაკში ევროპის 2017 წლის ჩემპიონი ნანა ძაგნიძე.

ტურნირში ძაგნიძის გარდა კიდევ ოთხი ჩვენებური ჩაება, თუმცა სხვა ქვეყნის სახელით: ქეთევან არახამია-გრანტი - შოტლანდია, ანა გვანცელაძე - რუსეთი, ნინო მაისურაძე - საფრანგეთი, ნინო კორძაძე - ავსტრია.

მედლებისთვის იბრძოდნენ ისეთი სახელოვანი მოჭადრაკეები, როგორებიც არიან მსოფლიოს და ევროპის ექსჩემპიონი ალექსანდრა კოსტენიუკი (რუსეთი), მსოფლიოს ვიცე ჩემპიონი ანა მუზიჩუკი (უკრაინა), ევროპის ორ-ორგზის ჩემპიონები - ვალენტინა გუნინა, კატერინა ლაგნო (ორივე-რუსეთი), ევროპის ექსჩემპიონი ელმირა სკრიპჩენკო (საფრანგეთი).

ასპარეზობის პირველ დღეს ხუთი ტურის შემდეგ უდანაკარგოდ გუნინა დაწინაურდა, ძაგნიძე მას ნახევარი ქულით ჩამორჩებოდა - მხოლოდ ინა გაპონენკოს (უკრაინა) დაუზავდა.

გუშინ მე-6 ტურში ქართველი და რუსი დიდოსტატები დაუპირისპირდნენ ერთმანეთს. მათი დუელი ყაიმით დასრულდა.

მეშვიდე-მერვე ტურებში ძაგნიძე, სამწუხაროდ, ნატალია პოგონინასა (რუსეთი) და მონიკა სოჩკოსთან (პოლონეთი) დამარცხდა. ძაგნიძემ 7 ქულით მე-15 ადგილი დაიკავა.

ყოველდღიური სპორტული გაზეთი "ლელო"

1238
მკითხველის კომენტარები / 0 /
მსგავსი ამბები
რუბრიკის სხვა სიახლეები
;