მოჭიდავეების აქცია: ლადოს და გენოს წამოწყებას იაპონელები შეურთდნენ

გორის ნუგზარ სხირელის სახელობის ჭიდაობის სკოლაში უმცროსი ასაკის მოჭიდავეებისთვის სპორტული ეკიპირების აქცია გაიმართა.
ასეთ საჩუქარს პატარა გორელ მოჭიდავეებს უკვე მესამე წელიწადია უკეთებენ მათი მწვრთნელები და ტიტულოვანი თანადარბაზელები.

სამი წლის წინ ტრადიციას საფუძველი ლადო ხინჩეგაშვილმა და გენო პეტრიაშვილმა ჩაუყარეს, რომლებმაც თავისი სახსრებით შეუძინეს პატარა მეგობრებს სპორტულები. შარშან ამ ინიციატივას მწვრთნელები შეუერთდნენ. წლეულს კი ერთის მხრივ მოულოდნელად აქციაში იაპონელი ჟურნალისტებიც ჩაერთვნენ.

რატომ მოულოდნელად? ამაზე ნუგზარ სხირელი გვიყვება:

"იაპონიის ტელევიზიის ჟურნალისტები გორში 1 თვის წინ ჩამოვიდნენ და აქ რამდენიმე დღის განმავლობაში იღებდნენ კადრებს ფილმისათვის, რომელიც ჩვენს ტიტულოვან სპორტსმენებს ეხება. საახალწლოდ იაპონიაში დაბრუნებულები, ისინი ამ დღეებში ისევ ჩამოვიდნენ საქართველოში, თუმცა წასვლისას დარბაზში გარკვეული თანხა საჩუქრად დაგვიტოვეს. ჩვენ მაშინვე ვუთხარით მათ, რომ ამ ფულს ბავშვებისთვის სპორტული ეკიპირების შესაძენად გამოვიყენებდით. იაპონელებთან ერთად ცხადია ფინანსური წვლილი მწვრთნელებმაც ისევ გავიღეთ და შევიძინეთ სპორტული ეკიპირება 60 ბავშვისათვის".

6 იანვარს გორის ნუგზარ სხირელის სახელობის ჭიდაობის სკოლაში პატარებისთვის სპორტულების გადაცემის ცერემონია გაიმართა. ადგილობრივ მწვრთნელებთან და ტიტულოვან გორელ მოჭიდავეებთან ერთად აქ იყვნენ იაპონელი ჟურნალისტებიც, რომლებმაც სამშობლოდან ჩამოტანილი საახალწლო სუვენირებიც უსახსოვრეს გორელ მოჭიდავეებს.

ტრადიციად ქცეული წამახალისებელი აქცია სამომავლოდაც ჩატარდება. პატარა გორელი მოჭიდავეებისთვის ეს ერთის მხრივ სტიმულია საწვრთნელად და სავარჯიშოდ, მაგრამ ამასთან ერთად მნიშვნელოვან როლს თამაშობს უშუალოდ დარბაზში მეგობრული ატმოსფეროს შესაქმნელად.

1475
მკითხველის კომენტარები / 1 /
სოსო
0
ცემა ტყეპას,ეს არ სჯობია?დიდი მადლობა ბიჭებო.
მსგავსი ამბები
რუბრიკის სხვა სიახლეები
;