მსოფლიომ ქართველები გამოარჩია: 12 ყველაზე პერსპექტიულ ძიუდოისტთა შორის სამი ჩვენებურია

ძიუდოს საერთაშორისო ფედერაციამ დაასახელა ყველაზე უფრო პერსპექტიული 12 ახალგაზრდა ძიუდოისტი, რომლებსაც ყველაზე მეტად უწინასწარმეტყველებენ უახლოეს მომავალში წარმატებებს.

თუმცა ამ „ამომავალ ვარსკვლავთა“ შორის რამდენიმე უკვე ნამდვილად „ამოსული“ და მოკაშკაშე ვარსკვლავია. მაგალითად, უკრაინელი დარია ბილოდიდი (48) და იაპონელი უტა აბე (52) უფროსებში მსოფლიოს მოქმედი ჩემპიონები არიან, ხოლო ფრანგი რომანე დიკო (+78) ასევე უფროსებში ევროპის შარშანდელი ჩემპიონი და თბილისის „დიდი პრიზის“ გამარჯვებულია. თუმცა ტიტულები არც სხვებს აკლიათ.

შეგახსენებთ, რომ შარშან სექტემბერში ბაქოში გამართულ მსოფლიოს ჩემპიონატზე ბილოდიდმა ისტორია გადაწერა, რადგან 17 წლის ასაკში მსოფლიოს ძიუდოს ისტორიაში ყველაზე ახალგაზრდა ჩემპიონი გახდა. ისტორიას ხელწერა არც აბემ დააკლო - მართალია, ის ბაქოში ზეობისას 18 წლის იყო, მაგრამ ის და მისი ძმა, ჰიფუმი აბე (66) ერთ დღეს გახდნენ მსოფლიოს ჩემპიონები, და-ძმის ერთად გაჩემპიონება კი ასევე პირველი შემთხვევა აღმოჩნდა.

გეტყვით იმასაც, რომ აბეები ძიუდოში ერთადერთი სამგზის ოლიმპიური ჩემპიონის, ტადაჰირო ნომურას (60) დის შვილები არიან, ხოლო ბილოდიდი ახლო წარსულში ევროპის ჩემპიონ გენადი ბილოდიდის (73) შვილია და მას დედა, ასევე ყოფილი ძიუდოისტი ავარჯიშებს.

ჩვენდა სასიხარულოდ, ამ 12-ეულში წარმომადგენელთა რაოდენობით საქართველო მეორე ადგილზეა 3 ძიუდოისტით,  პირველ ადგილზე კი 4 ათლეტით, რაღა თქმა უნდა,  ძიუდოს სამშობლო იაპონიაა. ჩვენთვის კიდევ უფრო სასიხარულო ისაა, რომ რჩეულთა შორის არა მარტო ბიჭები, არამედ გოგონაც გვყავს. ესენი არიან ახალგაზრდებში მსოფლიოს ჩემპიონი ლაშა ბექაური (90), ამავე ასაკში ევროპისა და მსოფლიოს ჩემპიონი გელა ზაალიშვილი (+100) და უფროსებში თბილისის „დიდი მუზარადის“ ბრინჯაოს მედალოსანი მარიამ ჭანტურია (70). ამ სიაში ჩვენი ბიჭების მოხვედრა გასაკვირი სულაც არაა, აი, ჭანტურიას გამოჩენა კი ფრიად სასიამოვნოა მისი მართლაც დიდი ტალანტის მიუხედავად. თუმცა ამ სიამ ცოტა გაკვირვება მაინც გამოიწვია, რადგან ქართველ გოგონებზე საუბრისას რატომ გამორჩათ ეთერ ლიპარტელიანი (57)?

თუმცა ჩვენებთან მიმართებაში ორგანიზატორთა პროგნოზები ბიჭების შემთხვევაშიც გვაკვირვებს. მათი გადმოცემით, ეს პერსპექტიულები 2020 წლის ოლიმპიადის პერსპექტივის გათვალისწინებით შეარჩიეს, ჩვენ კი ორივე წონაში ისეთი ხალხი გვყავს, მათგან ტოკიოში სულაც ჩემპიონობას ველოდებით. თავად განსაჯეთ: 90 კილოგრამში გამოდიან ევროპის სამგზის და მსოფლიოს ჩემპიონი ავთანდილ ჭრიკიშვილი, ევროპის მედალოსანი უშანგი მარგიანი და ევროპის ბრინჯაოს მედალოსანი ბექა ღვინიაშვილი, ხოლო მძიმე წონაში ევროპისა და მსოფლიოს ჩემპიონი გურამ თუშიშვილი ჭიდაობს (სხვებზე რომ არაფერი ვთქვათ).

ორივე ზემოდასახელებული ახალგაზრდა რომ ძალიან ნიჭიერია, ამაზე არ ვკამათობთ; არც იმაზე ვიდავებთ, ისინი საოლიმპიადოდ ფიცხელ ბრძოლას რომ გაუმართავენ ფავორიტებს და ლიცენზიაზეც გაიწევენ, მაგრამ ნუთუ საერთაშორისო ფედერაციაში მოელიან, რომ ისინი ოლიმპიადისთვის ასეთ ტიტულოვან და მრისხანე ლიდერებს ამოაგდებენ ნაკრებიდან? ჰა-ჰა, 90 კილოგრამში დღეს რასაც ვუყურებთ (ვიმეორებთ - მხოლოდ დღევანდელზე ვლაპარაკობთ და არა სამომავლოზე), ხოლო ბექაურმა ახალგაზრდების მსოფლიოზე ისეთი დონე გამოავლინა, ამ წონაში მსგავსი ცვლილების ალბათობა კიდევ დასაშვებია, მაგრამ ნუთუ მოელიან, რომ მძიმე წონაში ზაალიშვილი ჩაანაცვლებს თუშიშვილს? როგორც ჩანს, ამას მოელიან, რადგან საერთაშორისო ფედერაციის საიტზეც წერია, რომ მათ კარგად იციან თუშიშვილის ფაქტორი და მსოფლიოს რეიტინგში მისი პირველობა (შეგახსენებთ - მას ვაჟებში აბსოლუტური რეკორდი აქვს ანუ შვიდივე წონაში ყველაზე მეტი ქულა დააგროვა), ხოლო ზაალიშვილს აქამდე არ განიხილავდნენ, მაგრამ ბოლო დროს მან შეახსენა საკუთარი თავი, როგორც ლიდერის კონკურენტმა. ერთი კი ფაქტია: ზაალიშვილმა თუ ასე გააგრძელა, საოლიმპიადოდ ამ წონაში ტედი რინერის ღირსეული კონკურენტი ერთი კი არა, ორი ფალავანი გვეყოლება.

დასახელებულ 12-ეულში აბსოლუტური უმეტესობა 18 წლისაა, მხოლოდ ზაალიშვილი და დიკო არიან 19 წლისები, თუმცა ერთი გამონაკლისია - იაპონელი ტაცურუ საიტო, ორგზის ოლიმპიურ ჩემპიონ ჰიტოში საიტოს ვაჟი ჯერ მხოლოდ 16 წლისაა. შეგახსენებთ, რომ ამ ლამის 2-მეტრიან და 155-კილოგრამიან გოლიათს ზაალიშვილმა მსოფლიოს ახალგაზრდულ ჩემპიონატზე ორჯერ მოუგო - პირადი პირველობის ფინალსა და გუნდურში. არადა, მას იაპონელები რინერის წამქცევად მიიჩნევენ და დიდ რეკლამასაც უკეთებენ. ამავე სიაში კიდევ ერთი იაპონელია, ვინც ახალგაზრდული მსოფლიოს ფინალში ქართველმა დაამარცხა - ბექაურმა სანშირო მურაოს მოუგო. სამაგიეროდ, მურაომ ოსაკას „დიდ მუზარადზე“ აგვიღო რევანში, როცა მარგიანი დაგვიმარცხა. 

დასასრულ, გეტყვით იმასაც, რომ სიაში აბსოლუტური უმრავლესობა გოგონაა - 8 ნომინანტი, ბიჭი კი მხოლოდ 4-ია, ხოლო მათ რიგითობაზე ყურადღება არც საერთაშორისო ფედერაციას გაუმახვილებია, უბრალოდ, შემოგვთავაზეს ეს 12 ახალგაზრდა. ამიტომ ნუმერაციას ნურც თქვენ მიაქცევთ ყურადღებას.

  1. დარია ბილოდიდი (48; უკრაინა) - მსოფლიოს ჩემპიონი უფროსებში
  2. უტა აბე (52; იაპონია) - მსოფლიოს ჩემპიონი უფროსებში
  3. ჯისუ კიმი (57 კგ; კორეა) - პარიზის „დიდი მუზარადისა“ და მსოფლიოს გუნდური პირველობის მესამე პრიზიორი
  4. აკირა სონე (+78; იაპონია) - ტოკიოს „დიდი მუზარადის“ 2016 წლის ფინალისტი
  5. ლაშა ბექაური (90; საქართველო) - ახალგაზრდებში მსოფლიოს ჩემპიონი
  6. სანშირო მურაო (90; იაპონია) - ახალგაზრდებში მსოფლიოს ფინალისტი და ოსაკას „დიდი მუზარადის“ მესამე პრიზიორი
  7. მარიამ ჭანტურია (70; საქართველო) - თბილისის „დიდი პრიზის“ მესამე პრიზიორი
  8. კაია კაიზერი (57; სლოვენია) - ტაშკენტის „დიდი პრიზის“ მესამე პრიზიორი
  9. გელა ზაალიშვილი (+100; საქართველო) - ახალგაზრდებში ევროპისა და მსოფლიოს ჩემპიონი
  10. ტაცურუ საიტო (+100; იაპონია) - ახალგაზრდებში მსოფლიოს ფინალისტი, ოსაკას „დიდი მუზარადის“ გამარჯვებული
  11. რომანე დიკო (+78; საფრანგეთი) - ევროპის ჩემპიონი უფროსებში, თბილისის „დიდი პრიზის“ გამარჯვებული
  12. გეფენ პრიმო (52; ისრაელი) - ევროპის მესამე პრიზიორი უფროსებში
ყოველდღიური სპორტული გაზეთი "ლელო"
952
მკითხველის კომენტარები / 0 /
მსგავსი ამბები
რუბრიკის სხვა სიახლეები
;