მსოფლიოს ანტისადოპინგო სააგენტოს ინფორმატორ როდჩენკოვს რუსეთში 10-წლიანი პატიმრობა ემუქრება

რუსეთის მთავრობამ ინტერპოლში გააგზავნა მოთხოვნა მსოფლიოს ანტისადოპინგო სააგენტოს ინფორმატორის - გრიგორი როდჩენკოვის დაკავებასა და ექსტრადირებაზე. მოსკოვის სასამარლოს გადაწყვეტილებით, რუსეთის ანტისადოპინგო სააგენტოს ყოფილ ხელმძღვანელს 10-წლიანი პატიმრობა ემუქრება.

"ინტერპოლში გაგზავნილია მოთხოვნა როდჩენკოვის დაკავებასა და ექსტრადირებაზე", - განაცხადა რუსეთის სამართალდამცავი ორგანიზაციების მაღალჩინოსანმა.

მისი თქმით, მოთხოვნა შეისწავლა ინტერპოლის გენერალურმა სამდივნომ, რის შემდეგაც, დამტკიცების შემთხვევაში, ძებნილის ბარათი გაიგზავნება ინტერპოლის წევრი ქვეყნების რეგიონალურ ბიუროებში. მანვე დაამატა, რომ სამდივნოს შეუძლია უარი თქვას ძებნაზე იმ შემთხვევაში, თუ მიიჩნევს, რომ სისხლის სამართლის დევნას პოლიტიკური ხასიათი აქვს.

2016 წლის მაისში როდჩენკოვმა გაზეთ New York Times-ს განუცხადა, რომ მინიმუმ 15 რუსი სპორტსმენი, რომლებმაც სოჭის 2014 წლის ოლიმპიადაზე მედლები მოიგეს, დოპინგ-პროგრამის მონაწილეები იყვნენ. თავად როდჩენკოვი კი რუსეთის ფედერაციის სპორტის სამინისტროს ბრძანებით, ამ პროგრამის აღსრულების ერთ-ერთი აქტიური მონაწილე იყო.

გუშინ, მოსკოვის საქალაქო სასამართლომ კანონიერად ცნო როდჩენკოვისთვის დაუსწრებლად სასჯელის გამოტანა - მას რუსეთში 10-წლიანი პატიმრობა ელოდება უფლებამოსილების ბოროტად გამოყენების გამო. კერძოდ, როდჩენკოვი დოპინგს ურიგებდა სპორტსმენებს, მათ კი არ იცოდნენ, რა პრეპარატებს იღებდნენ.

ყოველდღიური სპორტული გაზეთი "ლელო"

2019
მკითხველის კომენტარები / 0 /
რუბრიკის სხვა სიახლეები