მსოფლიოს ახალგაზრდული ჩემპიონატი: მძიმე წონებში დამძიმდნენ

* საქართველოს ნაკრებმა ევროპის ჩემპიონატზე სულ სამი მედალი მოიპოვა - 1 ოქრო და 2 ბრინჯაო.
* გუნდურ ჩემპიონატში საქართველოს ნაკრები I წრეშივე გავარდა.

უცნაურად დასრულდა ზაგრებში მიმდინარე ახალგაზრდა ძიუდოისტთა მსოფლიოს ჩემპიონატი: ჩვენი ვაჟთა ნაკრები პირად პირველობაში მჩატე წონებში რამდენადაც წარმატებით გამოვიდა, იმდენად წარუმატებლად იასპარეზა ზედა ოთხ წონაში და პირველივე ეტაპებიდან დაემშვიდობა შეჯიბრებას.

მსუბუქ წონებში თუ ჩვენებმა "იფრინეს", მძიმეებში აშკარად დამძიმდნენ და კვარცხლბეკზე ვერ ავიდნენ.

პარასკევსა და შაბათს ჩვენმა ბიჭებმა ოთხ წონაში იასპარეზეს, ხორვატულ ტატამზე კი ექვსი ქართველი გავიდა. იმათგან ორი პირველივე წრეში დამარცხდა: იმედა გოგოლაძე (81) და ონისე სანებლიძე (100). სამმა ფალავანმა - ტრისტან მოსახლიშვილმა (81), გიორგი ჩიქოვანმა (90) და გელა ზაალიშვილმა (+100) თითო შეხვედრა მოიგეს, ხოლო ლუკა მაისურაძე (81) ორი მოგების შემდეგ დამარცხდა. მთლიანობაში, ამ ექვსეულიდან ერთიც ვერ გადავიდა სანუგეშო წრეში.

ბიჭებზე შედარებით უკეთ გოგონები გამოვიდნენ. მართალია, იმათაც უმედლოდ დაასრულეს გამოსვლა, მაგრამ მძიმეწონოსანი სოფიო სომხიშვილი სანუგეშოში მაინც გადავიდა.

ამდენად, ზაგრებში გამოსვლა საქართველოს ნაკრებმა 3 მედლით - 1 ოქროთი და 2 ბრინჯაოთი დაასრულა. სამივე ჯილდო ბიჭების ნაკრების წილად მოდის: ლაშა გუჯეჯიანის შეგირდებიდან მსოფლიოს ჩემპიონი კასპელი ჯაბა პაპინაშვილი (55) გახდა, მესამეზე კი დმანისელი ბაგრატ ნინიაშვილი (66) და ხაშურელი ტატო გრიგალაშვილი (73) გავიდნენ.

სხვა მონაწილეებიდან ჩასათვლელი ქულა მხოლოდ ნინიაშვილის უფროსმა ძმამ, ვანო ნინიაშვილმა და სომხიშვილმა მიიღეს, რომლებიც, შესაბამისად, მეხუთე და მეშვიდე ადგილებზე გავიდნენ.

საერთო-უნდურ ჩათვლაში ჩვენი ნაკრები მეშვიდე ადგილზე გავიდა, ბიჭებში კი - მეოთხეზე.

* * *

ევროპის წლევანდელი ფინალისტი, თბილისელი მაისურაძე პირველ წრეში კუბელ იასელ ბაეზა დიასს ხვდებოდა და ვაზარით მოუგო, მომდევნო შეხვედრაში კი ტაჯიკი ჯახონგირ მაჯიდოვი დააიპონა. სამაგიეროდ, მესამე პაექრობა ბელგიელთა მომავალ ჩემპიონ მათიას კასესთან გაფრთხილებებით წააგო.

თელაველი მოსახლიშვილი ევროპის ჩემპიონატზე გუნდურში, აქ კი პირადში გამოიყვანეს, თუმცა დიდად წარმატებით ვერ იჭიდავა: ლიბანელი ანდრეას მეჩლები კი დააიპონა, ბრიტანელ სტიუარტ მაკქუვეიტსაც აუღო ვაზარი, მაგრამ საბოლოოდ იპონით წააგო და გამოვარდა.

90 კილოგრამში იმედა გოგოლაძემ მოულოდნელად ორი გდება გაუშვა უზბეკ მუხამადკარიმ კურამოვთან, თვითონ კი სანაცვლოდ ვერაფერი დაუპირისპირა და გამოვარდა. ჩხოროწყუელმა ჩიქოვანმა მხოლოდ ლიხტენშტეინელი რაფაელ შვენდინგერი დაჩაგრა - ორი ილეთის შემდეგ ბეჭებზე დააგდო, შემდეგ კი დომინიკანელთა მომავალ ფინალისტ რობერტ ფლორენტინოსთან თავად გაუშვა ილეთი და გამოვარდა.

ონისე სანებლიძეს (100) პირველივე წრეში ძლიერი მეტოქე ერგო: ევროპის წლევანდელი ვიცე-ჩემპიონი და ამ ტურნირის ასევე მომავალი ფინალისტი, რუსი არმან ადამიანი. სამწუხაროდ, ჩვენებურმა სიურპრიზი ვერ შემოგვთავაზა და რუსს ვერაფერი დაუპირისპირა: გაფრთხილებებიც მიიღო და ბოლოს იპონითაც დამარცხდა.

ევროპის წლევანდელი მესამეპრიზიორი, თბილისელი გელა ზაალიშვილი გერმანელ ერიკ აბრამოვს იოლად, იპონით კი გაუსწორდა, მერე სლოვენიელ ენეი მარინიჩთანაც ვაზარით დაწინაურდა, მაგრამ იპონზე მოჰყვა და მანაც უმედლოდ დაასრულა გამოსვლა.

გოგოებიდან პარასკევს ევროპის ოლიმპიური ფესტივალის გამარჯვებული და ჭაბუკებში მსოფლიოს წლევანდელი ფინალისტი მარიამ ჭანტურია (63) გამოვიდა, სომხიშვილმა კი შაბათს იჭიდავა. ორივე ჯერ კიდევ ჭაბუკთა ნაკრების წევრია და იმ გუნდში ფრიად დატვირთული სეზონიც ჰქონდათ: თანატოლებში ევროპისა და მსოფლიოს ჩემპიონატები, ევროპის ახალგაზრდული ოლიმპიური ფესტივალი... ისინი ზაგრებში გუნდური შეჯიბრების გამო წაიყვანეს, ხოლო რაკი მიჰყავდათ, ბარემ პირადშიც დააყენეს, თორემ სომხიშვილი ჭაბუკებში +70-ში ჭიდაობს, აქ კი 8 კილოგრამით უფრო მძიმეებთან უწევდა პაექრობა.

ჭანტურიამ ზედა წონაში - 70-ში - გუნდურში იასპარეზა, თორემ პირადში თავის წონაში გამოვიდა (შერეულ გუნდში 70 კილოგრამი შედის და არა 63) და პირველ წრეში მონღოლი სარუულ ოტგონბაიარი შესანიშნავი ბრუნით დააიპონა. მეორე წრეში ასაკით ისედაც პატარა ქართველს ძლიერი კონკურენტი ერგო - ევროპის წლევანდელი ჰოლანდიელი ჩემპიონი სანე ვერმეერი. სამწუხაროდ, ჩვენებურმა სპორტული გმირობა ვერ ჩაიდინა და იპონით წააგო.

სომხიშვილი ტურნირში ძლიერად ჩაება: პირველ წრეში ბოსნიელი ბარნარა ჯიკიჩი ორი გდებით დაამარცხა, ჩილელი ხოსეფინა ფუენტეალბა კი პირდაპირ დააიპონა. აი, მეოთხედფინალში ყაზახ კამილა ბერლიკაშთან დასანანი მარცხი იწვნია - ერთი გაფრთხილებით წააგო. სამწუხაროდ, წარმატებას ვერც დამამშვიდებელ წრეში ვერ მიაღწია ბრაზილიელ ბეატრის სოუზასთან - სუფთად წააგო და მეშვიდე ადგილზე დარჩა.

* * *

კვირას ზაგრებში გუნდური ტურნირი ჩატარდა, რომელიც ახალგაზრდებში პირველად გაიმართა შერეული პრინციპით, ანუ გოგონები და ბიჭები ერთად ჭიდაობდნენ.

სამწუხაროდ, აქ თავიდანვე მიზერული შანსები გვქონდა - ამ ასაკის გოგონებში ჯერ ხომ ისედაც არ გვყავს მაღალი დონის სპორტსმენები, ახლა ძირითადად 17-წლამდელებით ვჭიდაობდით; თუმცა ესეც არაა ყველაფერი: როგორც ზემოთ გითხარით, ჭანტურია და სომხიშვილი გუნდურში მათთვის უჩვეულოდ მძიმე წონებში გამოდიოდნენ.

დაბოლოს: სწორედ გოგონების წონებში ერთი მონაწილე გვაკლდა - 48 კილოგრამში მწვრთნელმა გია თენაძემ საერთოდ არ წაიყვანა არავინ, რადგან არ ჰყავდა სათანადოდ მომზადებული კადრი.

ერთი სიტყვით, ჩვენი ნაკრები ყველა შეხვედრას ერთქულიანი ჩამორჩენით იწყებდა და გასაკვირიც არაა, ასეთ პირობებში ჩვენმა ნაკრებმა პირველივე შეხვედრა თუ დათმო. მით უფრო, რომ წილისყრამ მეტოქეც ძლიერი არგუნა - მომავალი ფინალისტი ჰოლანდია. ჩვენებმა ეს შეხვედრა 3:5 დათმეს და ტურნირსაც დაემშვიდობნენ.

ყოველდღიური სპორტული გაზეთი "ლელო"

1817
მკითხველის კომენტარები / 0 /
მსგავსი ამბები
რუბრიკის სხვა სიახლეები