მსოფლიოს ახალგაზრდული ჩემპიონატი: ბრინჯაოს გაგრძელება

საქართველოს ახალგაზრდა ძიუდოისტთა ნაკრებმა კიდევ ორი ბრინჯაო მოიპოვა ზაგრებში მიმდინარე თანატოლთა მსოფლიოს ჩემპიონატში. გუშინ, 19 ოქტომბერს, ხორვატულ ტატამზე ბიჭების ტურნირში ორი ქართველი გავიდა და საბოლოოდ ორივე კვარცხლბეკზე დადგა: დმანისელი ბაგრატ ნინიაშვილი (66) და ხაშურელი საბა გრიგალაშვილი (73).

შეგახსენებთ, რომ გუშინწინ მსოფლიოს ჩემპიონი კასპელი ჯაბა პაპინაშვილი (55) გახდა.

მსოფლიოს ახალგაზრდული ჩემპიონატი: უმცროსი პაპინაშვილის რევანში და ოქრო [VIDEO]

ნინიაშვილმა წინასწარ ეტაპზე სამი შეხვედრა მოიგო ვაზარით: კოლუმბიელ ხორხე გონსალესთან, ყაზახ სუნქატ ჟუბატკანთან და ესპანელ სალვადორ კასეს როხასთან. ნახევარფინალში ჩვენებური გაფრთხილებებით დამარცხდა ბრაზილიელ დანიელ კარგნინთან. სამაგიეროდ, დამამშვიდებლის ფინალში თვითონაც გაფრთხილებებით მოახსნევინა ჭაბუკებში იტალიელთა ევროპის ჩემპიონი მანუელ ლომბარდო და ახალგაზრდებში პირველი ჯილდო მოიპოვა.

ევროპის წლევანდელი მესამე პრიზიორი გრიგალაშვილი ნახევარფინალში მართლაც უძლიერეს კონკურენტთან, უფროსებში აზერბაიჯანელთა ევროპის მოქმედ ჩემპიონ ჰიდაიატ ჰეიდაროვთან დამარცხდა ვაზარით, მანამდე კი მშვენივრად იასპარეზა. მან ნინიაშვილის ნაცვლად ორმაგი რევანში აუღო ბრაზილიელებს, რადგან მათი ორი ფალავანი დაამარცხა: ჯგუფურ ეტაპზე ჯეფერსონ სანტოს ჟუნიორს ვაზარით მოუგო, დამამშვიდებლის ფინალში კი დავიდ ლიმასთან თვითონაც გაუშვა ილეთი, მაგრამ სანაცვლოდ ორი აუღო და სეზონში მეორედ დაეუფლა ბრინჯაოს.

ჩვენებურმა პირველ პაექრობაში ორი ვაზარით და იპონით ჩამოიშორა გზიდან შვეიცარიელი ნაიმ მატი, მერე კი პორტუგალიელ ჟოაო ალმეიდას ვაზარით აჯობა, ხოლო მოლდოველი იონ ნაკუ ბეჭებზე დააგდო.

გუშინ გოგონებშიც გვყავდა ერთი მონაწილე - ჭაბუკებში ევროპის ჩემპიონი ეთერ ლიპარტელიანი (57), ვინც უმედლოდ კი დარჩა, მაგრამ ურიგოდაც არ გამოსულა: ამ რანგის შეჯიბრებაზე პირველად მოჭიდავე პირველ წრეში ისვენებდა, მეორეში კი ამერიკელ კატერინ ლაიბს ვაზარით მოუგო, მაგრამ მერვედფინალში ასეთივე ანგარიშით წააგო სამხრეთკორეელ ჯისუ კიმთან.

ორი დღის შემდეგ ჩვენი ნაკრები საერთო გუნდურ ჩათვლაში მესამეა 3 მედლით - 1 ოქროთი და 2 ბრინჯაოთი.

დღეს იჭიდავებენ

დღეს ზაგრებში 5 მონაწილე გვეყოლება: ევროპის წლევანდელი ვიცე-ჩემპიონი ლუკა მაისურაძე, ტრისტან მოსახლიშვილი (ორივე - 81), მიხეილ ჩიქოვანი, იმედა გოგოლაძე (90) და ევროპული ფესტივალის გამარჯვებული, ჭაბუკებში მსოფლიოს მედალოსანი მარიამ ჭანტურია (63).

ხვალ იჭიდავებენ

ხვალ ხორვატულ ტატამზე სამი ქართველი მოსინჯავს ძალებს. 100 კილოგრამში ონისე სანებლიძე გვეყოლება.

მძიმე წონაში ევროპის წლევანდელ პრიზიორ ამირან წიქორიძის ტრავმის შემდეგ მხოლოდ ევროპის კიდევ ერთი ბრინჯაოს მედალოსანი გელა ზაალიშვილი დაგვრჩა.

გოგონებში მძიმე წონაში ჭაბუკებში ევროპისა და ევროპული ფესტივალის გამარჯვებული, მსოფლიოს ფინალისტი სოფიო სომხიშვილი იასპარეზებს.

კვირას ზაგრებში გუნდური შეჯიბრება გაიმართება, რომელიც შერეული პრინციპით ჩატარდება.

(იბეჭდება მცირე ცვლილებით)
ყოველდღიური სპორტული გაზეთი "ლელო"

847
მკითხველის კომენტარები / 0 /
მსგავსი ამბები
რუბრიკის სხვა სიახლეები