მსოფლიოს ახალგაზრდული ჩემპიონატი: უმცროსი პაპინაშვილის რევანში და ოქრო [VIDEO]

ჯაბა პაპინაშვილი (55 კგ) ახალგაზრდებში მსოფლიოს ჩემპიონია! ეროვნული ნაკრების ლიდერის, ამირან პაპინაშვილის უმცროსმა ძმამ ამ წარმატებას გუშინ მიაღწია ზაგრებში, სადაც ამ ასაკში მსოფლიოს პირად-გუნდური ჩემპიონატი დაიწყო, ჩვენმა ფალავანმა კი უმჩატეს წონაში ყველას აჯობა.

მას ევროპის ჩემპიონატზეც მხოლოდ ერთი მოგება დააკლდა მედლამდე, სადაც მეხუთე ადგილზე გავიდა, ახლა კი ბევრად უფრო ძლიერ შეჯიბრებას გაცილებით უკეთ მომზადებული შეხვდა და მაშინდელი დანაკლისი სრულად აინაზღაურა.

ზოგადად, გუშინდელი მონაცემებით, ჩვენი ნაკრები შეხვდა უკეთ მომზადებული ამ შეჯიბრებას და აკი ამ წონაში სულ ცოტა დაგვაკლდა მეორე მედლამდე - ივანე ნინიაშვილიც ნახევარფინალში გავიდა, მაგრამ საბოლოოდ მეხუთეზე დარჩა.

გუშინ ზაგრებში მხოლოს ეს ორი მონაწილე გვყავდა, რადგან 60-ში ნაკრების მთავარ მწვრთნელ ლაშა გუჯეჯიანს არავინ წაუყვანია. თუმცა 55-ში უამისოდაც ჩვენთვის საინტერესო ამბები დატრიალდა: ორივე ჩვენებური ნახევარფინალში გავიდა, სადაც ნინიაშვილი ქართველებისთვის უხერხულ მეტოქესთან, აზერბაიჯანელ ნატიგ გურბანლისთან დამარცხდა; სამაგიეროდ, გურბანლის პაპინაშვილმა მოუგო ფინალში, რითაც რევანშიც აუღო...

როგორც გითხარით, გურბანლი მეტად უხერხული მეტოქეა ჩვენებისთვის, განსაკუთღებით ცუდად კი სანკტ პეტერბურგში დაგვამახსოვრა თავი, სადაც მიყოლებით მოუგო სამ ქართველს - ნინიაშვილს, ნიკა ალხაზაშვილს და პაპინაშვილს, თუმცა ნინიაშვილმა წლევანდელ ევროპირველობაზე დამაჯერებელი რევანში აუღო. ახლა პაპინაშვილმაც "გაუსწორა ანგარიში" აზერბაიჯანელს.

პაპინაშვილმა ზაგრებში გამოსვლაც რევანშით დაიწყო. ამჯერად - ფრანგ ტეო ებრართან, ვისთანაც ევროპის ჩემპიონატზე მესამე ადგილისთვის პაექრობა წააგო. ამჯერად მასთან ვაზარით იმარჯვა, მომდევნო შეხვედრებში კი ბრაზილიელი ბრუნო ვატანაბე და მონღოლი უნუბოლდ ლხაგვაჯამცი დააიპონა, ოღონდ მონღოლს დამატებით კიდევ ორი გდებაც გაუკეთა. ჩვენებურმა ნახევარფინალური ბარიერიც იოლად გადალახა ყაზახ ბაიურჟან ნარბაევთან, ფინალში კი გურბანლი ორჯერ დააგდო ილეთზე.

პაპინაშვილმა ბოლო პერიოდში კიდევ ერთხელ დაამტკიცა, რომ თავის ძმაზე უკეთესი თუ არა, არანაკლები მონაცემები აქვს და თუ შრომას არ დაიზარებს, ეროვნულ ნაკრებში 60 კილოგრამში სულ მალე წარმატებით შეცვლის თავის ძმას.

გუშინ მეორე მედალი სწორედ ზემოხსენებულმა მონღოლმა - ლხაგვაჯამციმ დაგვაკარგინა, რადგან დამამშვიდებლის ფინალში ნინიაშვილი დაამარცხა. არადა, ჩვენებურმა პირველი შეხვედრა დიდი აღმავლობით ჩაატარა ამერიკელ მაქს ანტონიოუსთან და ვაზარის შემდეგ კიდეც დააიპონა მეტოქე. პორტუგალიელ ფელიპე კრუზთან ვაზარი კი დაკარგა, მაგრამ თავად ორი აართვა და მეოთხედფინალში გავიდა, სადაც უნგრელ ანდრეა მონორისაც იმავე ანგარიშით აჯობა, რითაც - ანტონიუს.

სამწუხარო ისაა, რომ ამის შემდეგ წარმატებას ვერ მიაღწია - ჯერ გურბანლისთან დამარცხდა, მერე კი მონღოლთანაც გაეპარა იპონი. ამის მიუხედავად, გუშინდელი დღე მაინც აქტივში გვეთვლება, რადგან, რაც მთავარია, ოქრო გვაქვს...

დღეს იჭიდავებენ

დღეს, 19 ოქტომბერს, ზაგრებში ბიჭებიდან 66-73, გოგონებიდან კი 52-57 კგ-მდე წონების წარმომადგენლები იჭიდავებენ.

66-ში ვანო ნინიაშვილის უმცროსი ძმა, ჭაბუკებში მსოფლიოს 2015 წლის ფინალისტი ბაგრატ ნინიაშვილი გამოვა. დმანისელი ფალავანი პირველ წრეში თავისუფალია, მეორეში კი მისი მეტოქე კოლუმბიელი ხორხე გონსალესი ან ამერიკელი კოულ ჩანდლერი იქნება.

73-ში ევროპის მესამე პრიზიორი, ხაშურელი საბა გრიგალაშვილი გამოდის, ვინც პირველ შეხვედრას შვეიცარიელ ნაიმ მატს ხვდება, მოგების შემთხვევაში კი უნგრელ გაბორ სარჰეგისა და პორტუგალიელ ჟოაო ალმეიდას შორის გამარჯვებულს შეხვდება. იმედია, თბილისის წლევანდელი გრან პრის მეხუთეადგილოსანი ამჯერადაც გაგვახარებს კარგი ჭიდაობით.

დღეს პირველი მონაწილე გვეყოლება გოგონებშიც - ჭაბუკებში ევროპის ჩემპიონი ეთერ ლიპარტელიანი (57). ის პირველ წრეში თავისუფალია, მეორეში კი ამერიკელ კატერინ ლაიბს შეხვდება.

ყოველდღიური სპორტული გაზეთი "ლელო"

3661
მკითხველის კომენტარები / 0 /
მსგავსი ამბები
რუბრიკის სხვა სიახლეები