მსოფლიოს თასის მერე მილტონ ჰეიგი საქართველოს ნაკრებიდან წავა

საქართველოს ნაკრების ახალზელანდიელი მწვრთნელი მილტონ ჰეიგი ოჯახთან ერთად სამშობლოში იმყოფება.

იქაურ ჟურნალისტებს "ბორჯღალოსნების" თავკაცის "სტუმრობა" არ გამოჰპარვიათ. "ნიუ ზელანდ ჰერალდმა" მასზე წერილი გამოაქვეყნა, სადაც ჰეიგი საქართველოს ნაკრებსა და მის მომავალ გეგმებზე საუბრობს. გთავაზობთ ამონარიდს ამ პუბლიკაციიდან.

მილტონ ჰეიგი რაგბის პროფესიონალი მწვრთნელია, რომელმაც სახელი აქედან ძალიან შორს მდებარე ქვეყანაში მუშაობით დაიგდო. ახლა, საშობაო არდადეგებზე, მილტონი ოჯახთან ერთად მცირე ხნით სამშობლოს ეწვია და, ცხადია, მასთან საუბრის შანსი ხელიდან არ გავუშვით.

ჰეიგი VS ჰაკა

2015 წლის მსოფლიოს თასზე იყო ერთი მომენტი, რომელიც მუდამ დარჩება მის მეხსიერებაში - ეს საქართველოსა და ახალი ზელანდიის ჰიმნების მოსმენა და "ოლ ბლექსის" მიერ შესრულებული ჰაკაა.

"თამაშამდე ერთი კვირით ადრეც კი, არ გვჯეროდა, რომ კარდიფში, "მილენიუმზე" ჩემი ბიჭები "ოლ ბლექსის" წინ უნდა მდგარიყვნენ, როცა ისინი ჰაკას შეასრულებდნენ." - თქვა ჰეიგმა.

ამ მატჩის შემდეგ საქართველოს ნაკრების მორაგბეები და მწვრთნელები "ოლ ბლექსის" გასახდელში მიიპატიჟეს.

"ეს დღე ჩემთვის და ჩემი ოჯახის წევრებისთვის განსაკუთრებული იყო. ქართველი მორაგბეებისთვის კი, კარიერის პიკი გახლდათ. ამ მატჩამდე ორი წლით ადრე მსოფლიოს თასის საკვალიფიკაციო ეტაპში ვასპარეზობდით.

ნაკრების მორაგბეებს ვუთხარი, რომ მათ ორი არჩევანი ჰქონდათ: პირველი, ებრძოლათ ბოლომდე, მოეგოთ ყველა თამაში და "ოლ ბლექსთან" ჯგუფში მოხვედრილიყვნენ და მეორე, წყნარად, მშვიდად მეორე ადგილზე გასვლა და ირლანდიასა და საფრანგეთთან ჯგუფში მოხვედრა.

მათ პირველი ვარიანტი აირჩიეს. ბიჭებს უნდოდათ, ჯგუფში ახალი ზელანდიის ნაკრებთან ყოფილიყვნენ და მსოფლიოს საუკეთესო გუნდის წინააღმდეგ ეთამაშათ. ისინი უაღრესად მოტივირებულები იყვნენ."

პოპულარულობა საქართველოში

მსოფლიოს თასის გათამაშების დაწყებამდე, ჰეიგს თბილისის ქუჩებში კანტიკუნტად თუ ვინმე ესალმებოდა. თუმცა, მსოფლიოს თასის შემდეგ, ეს რადიკალურად შეიცვალა.

"მთელ ქალაქში ვერ ნახავდით ადგილს, სადაც ხალხი არ მოვიდოდა და არ მოგვილოცავდა მსოფლიოს თასზე წარმატებულ გამოსვლას. ეს არ იყო შემთხვევითი. ასე ხდებოდა, ყველგან, რომელ ქალაქშიც უნდა ჩავსულიყავით. შედეგად, რაგბის პოპულარობა ქვეყანაში კიდევ უფრო გაიზარდა" - თქვა ჰეიგმა.

მილტონი თავის ოჯახთან ერთად საქართველოში ჩავიდა, რაგბი ამ ქვეყანაში საკმაოდ პოპულარული იყო. თუმცა, ახლა, ის ყველაზე პოპულარული თამაშია. მას ძალიან დიდი მხარდაჭერა აქვს ქვეყნის მთავრობისგან.

"ქართველებმა რაგბის ფასეულობები გაითავისეს. დიდ პატივს სცემენ მორაგბეებს. ისინი დიდი ადამიანები არიან, რომლებიც მოედანზე თავდაუზოგავად იბრძვიან. მოედნის მიღმა კი, ჩვეულებრივად საუბრობენ, მეგობრობენ. ადრე მსგავსი არაფერი მინახავს".

ჰეიგს მოსწონს ის გარემო, რომელშიც მუშაობა უწევს. ასევე აფასებს იმ მხარდაჭერას, რომელსაც რაგბის კავშირის ხელმძღვანელებისგან გრძნობს. ეროვნული ნაკრების დაახლოებით სამოცი პროცენტი საფრანგეთის პროფესიულ კლუბებში თამაშობს, რამდენიმე მორაგბე ბრიტანული კლუბების ღირსებას იცავს.

ამასთან ერთად, ახლახან ორმა ბორჯღალოსანმა ზე-რაგბის გუნდებთან გააფორმა კონტრაქტი და მათ ახალი ზელანდიის კლუბების წინააღმდეგ მოუწევთ თამაში. ეს არის ზუსტად ის მიზანი, რომლისკენაც მიდიოდა ჰეიგი მას შემდეგ, რაც საქართველოში ჩავიდა.

საქართველოში თუ ზელანდიაში

მილტონ ჰეიგი საქართველოს ეროვნული ნაკრების პირველი უცხოელი მწვრთნელია, რომელიც ამ ქვეყანაში დასახლდა. ის და მისი ოჯახი, უცხოები იყვნენ უცხო ქვეყანაში, მაგრამ ისინი მალე შეეგუვნენ ადგილობრივების ცხოვრების წესს. ექვსი წლის თავზე ქართული ენაც კარგად აქვთ ათვისებული.

უფროსი ქალიშვილი მოლი ყოველგვარი აქცენტის გარეშე ლაპარაკობს ქართულად

"უფროსი ქალიშვილი მოლი ყოველგვარი აქცენტის გარეშე ლაპარაკობს ქართულად. როცა ის ჩემს მოთამაშეებს ელაპარაკება, ისინი გაოცებულნი არიან. ეს ქართველიაო - ამბობენ.

ხალხი საქართველოში ძალიან სტუმართმოყვარეა. ამან საშუალება მოგვცა, გვემოგზაურა დანარჩენ ევროპასა და მთელ მსოფლიოში, მაგრამ როგორც კი, სამწვრთნელო კარიერას დავასრულებ აუცილებლად ახალ ზელანდიაში დავბრუნდები.

ყოველ ჯერზე, როცა სახლში ვბრუნდებით, ვგრძნობ, რამდენად ბედნიერია ის ხალხი, ვინც აქ, ახალ ზელანდიაში ცხოვრობს. მსოფლიოში თითქმის ყველგან ვიყავი, რა არ ვნახე. მეგონა, შინ დაბრუნებულს გაწბილება მელოდა, მაგრამ პირიქით მოხდა.

აქ ძალიან ლამაზია ყველაფერი, სუფთა ჰაერი, სუფთა ქალაქი, ბუნება, წყნარი ცხოვრება. ძალიან გაუმართლა იმათ, ვინც ახალ ზელანდიაში ცხოვრობენ." - დასძინა მილტონ ჰეიგმა.

უარი იაპონელებსა და  ინგლისელებს

მან საქართველოს ნაკრებთან ახალი, ორწლიანი კონტრაქტი ახლახან გააფორმა, რომელსაც ვადა 2019 წლის მსოფლიოს თასის დასრულებისთანავე გასდის. თუმცა, ეს არ ნიშნავს, რომ მას სხვა შეთავაზება არ ჰქონდა:

სანამ სამშობლოში არდადეგებზე ჩამოვიდოდა, ერთ-ერთმა იაპონურმა კლუბმა შესთავაზა მწვრთნელობა, მეორე წინადადება კი, ინგლისიდან მოუვიდა - მთავარ მწვრთნელობას "ნორსჰემპთონი" სთავაზობდა, მაგრამ ის ადგილიდან არ დაძრულა. ის საქართველოს ნაკრებისა და კონტრაქტის ერთგულია.

მისი სამუშაო საქართველოს ნაკრებთან არ ყოფილა იოლი - ეს გუნდი შედარებით ახალია რაგბის სამყაროში. ჰეიგის გეგმა იყო, ოთხი წლის განმავლობაში გუნდის პოტენციალის რეალიზაცია მოეხერხებინა, მერე კი, უკვე დიდ შედეგებზე ეფიქრა.

"რეალობა ასეთია, ერთი მსოფლიოს თასის გათამაშების შემდეგ ჩვენ თავიდან ვიწყებთ გარკვევას - რას ვაკეთებთ, მაგრამ როგორც კი დავასრულებთ მომდევნო ოთხწლიან ციკლს, ვფიქრობ, დადგება დრო, ვეძებო ახალი გამოწვევები. მოთამაშეებს დასჭირდებათ ახალი ხელმძღვანელი. მე კი, ალბათ, ახალი ასპარეზი", - ამბობს ჰეიგი.

ყოველდღიური სპორტული გაზეთი "ლელო"
5335
მკითხველის კომენტარები / 6 /
ნინი
1
ბატონმა ჰეიგმა ისეთი სიყვარული დაიმსქხურა კართველ ერში,რომ მისი საკართველოდან წასვლა დიდი დანაკლისი იკნება ჩვენთვის.მივცეთ მოკალაკეობა და როცა ისურვებს აკ იცხოვროს.დიდი მადლობა მას ესოდენ სიყვარულისთვის.ბატონო ჰეიგ,ნუ დატოვებთ საკართველოს,გევედრებით;
gio
2
ეეჰ, როგორც ცანს გაიაზრა რომ საქართველო უახლოეს წლებში ვერ გახდება 1-ლი დონის გუნდი და მსოფლიოს მერე აღარ სურს აქ დარჩენა. შემოთავაზებებიც ბევრი ექნება
მსგავსი ამბები
რუბრიკის სხვა სიახლეები
;