მსოფლიოს თასი 2019. მეტოქე: საქართველოს ძლიერი გუნდი უნდა დავახვედროთ

საქართველოს ნაკრებს მსოფლიოს თასის საკვალიფიკაციო ეტაპზე პირველი მატჩი გერმანიასთან (24 ნოემბერს) ელის. ბუნდესნაკრების მთავარმა მწვრთნელმა ჰენრიკ რიოდლმა basketball-bund.de-ზე გამოქვეყნებულ ინტერვიუში საკუთარ გუნდზეც ილაპარაკა და საქართველოსთან მომავალ მატჩზეც.

- ფიბამ საკვალიფიკაციო ფორმატი შეცვალა. ნაკრებები ყველა მატჩს ერთ თვეში აღარ ატარებენ - ექვსი თამაში მთელ წელიწადზეა განაწილებული. ეს მისასალმებელია. თუმცა ადაპტაცია სჭირდება.

ბატონმა რიოდლმა ევროლიგას გაჰკრა კბილი:

- ჯერაც უცნობია, ითამაშებენ თუ არა ევროლიგის კალათბურთელები მსოფლიოს თასის საკვალიფიკაციო ეტაპზე. ფიბას მიერ ფორმატის შეცვლას მივესალმები. ევროლიგის ხელმძღვანელთა გადაწყვეტილებას - არ გამოუშვას კალათბურთელები ნაკრებში, ნამდვილად არ ვეთანხმები. არ შეიძლება საკლუბო კალათბურთმა სანაკრებოს შეუშალოს ხელი.

აი, რა თქვა გერმანიის ნაკრებზე:

- ევრობასკეტი 2017-ზე (იგი მეორე მწვრთნელად მუშაობდა) ჩვენმა ნაკრებმა წარმატებულად ითამაშა. მეოთხედფინალში გავედით და სამშობლოში დიდი სიხარულით შეგვხვდნენ. ევროპის ჩემპიონატზე ახალგაზრდა გუნდი გვყავდა, ბირთვიც უნდა შევინარჩუნოთ და თამაში კიდევ უფრო გავაუმჯობესოთ, რომ მივაღწიოთ დასახულ მიზანს - მოვხვდეთ ტოკიოს 2020 წლის ოლიმპიადაზე. მანამდე ჯერ საკვალიფიკაციოა, შემდეგ მსოფლიოს თასი.

ბოლო შეკითხვა საქართველოს ნაკრებთან თამაშს ეხებოდა.

- ჩვენი მთავარი ამოცანაა გერმანიასა და ევროპის სხვადასხვა ქვეყნებში გაბნეული საუკეთესო კალათბურთელები შევკრიბოთ. იმედი გვაქვს, რომ ამერიკის ჯეი-ლიგიდან აიზია ჰარტენშტეინიც შემოგვიერთდება.

საქართველოს ნაკრები სერიოზული მეტოქეა და ჩვენც ძლიერი გუნდი უნდა დავახვედროთ, წინააღმდეგ შემთხვევაში, შედეგის მიღწევა გაგვიჭირდება. დიდი მნიშვნელობა ექნება პირველი მატჩის მოგებას და საკვალიფიკაციო ეტაპის წარმატებით დაწყებას.

ყოველდღიური სპორტული გაზეთი "ლელო"

1476
მკითხველის კომენტარები / 0 /
მსგავსი ამბები
რუბრიკის სხვა სიახლეები