მსოფლიოს თასი 2023 საფრანგეთისაა, ლონდონში კი ქართული რაგბი შეაქეს

* 2023 წლის მსოფლიოს თასს საფრანგეთი უმასპინძლებს.
* 2023 წელს მსოფლიოს თასი მეათედ გაიმართება.
* საფრანგეთმა არჩევნებში ფავორიტ სამხრეთ აფრიკასა და ირლანდიას აჯობა.
* მომდევნო მსოფლიოს თასს (2019) იაპონია მასპინძლობს.

ლონდონში "მსოფლიო რაგბის" მე-13 გენერალური ასამბლეა გაიმართა, რომლის მუშაობაშიც საქართველოდან რაგბის კავშირის პრეზიდენტმა გოჩა სვანიძემ, "მსოფლიო რაგბის" საბჭოს წევრმა გიორგი ნიჟარაძემ და რაგბის კავშირის სპორტული და მაღალი მიღწევების დირექტორმა ლაშა ხურციძემ მიიღეს მონაწილეობა.

ასამბლეაზე ყველაზე მნიშვნელოვანი ამბავი 2023 წლის მსოფლიოს თასის გათამაშების მასპინძლის გამოვლენა იყო. მიუხედავად იმისა, რომ "მსოფლიო რაგბიმ" რეკომენდაცია სამხრეთ აფრიკას მისცა, წილისყრის შედეგად გამარჯვება საფრანგეთს დარჩა.

წილისყრის პირველი ტურის შემდეგ, გამარჯვებული ვერ გამოვლინდა. საფრანგეთმა 18 ხმა მიიღო, სამხრეთ აფრიკამ - 13 და ირლანდიამ - 11. პირველივე ტურში გამარჯვებისთვის კი რომელიმე კანდიდატს 20 ხმა უნდა დაეგროვებინა. მეორე ტური, ცხადია, საფრანგეთსა და სამხრეთ აფრიკას შორის ჩატარდა. ფრანგებმა 24 ხმით 15-ის წინააღმდეგ 2023 წლის მსოფლიოს თასის ორგანიზების უფლება მოიპოვეს.

ასამბლეაზე სხვა ბევრი საინტერესოც მოხდა. "მსოფლიო რაგბის" მაღალი მიღწევების პროგრამების ჯგუფურ განხილვაში საქართველოს წარმომადგენელი პირველად მიიწვიეს. ჯგუფის მუშაობაში მონაწილეობა ლაშა ხურციძემ მიიღო.

"ჯგუფის სამუშაო პროცესში ვისაუბრეთ იმ შედეგებზე, რაც "მსოფლიო რაგბის" მაღალი მიღწევების პროექტების შედეგად მივიღეთ და შეხვედრის მონაწილეებს საკუთარი გამოცდილება გავუზიარეთ. მას შემდეგ, რაც სტრატეგიული ინვესტირების პროგრამაში მოვხვდით, საქართველო ზედმიწევნით ზუსტად ასრულებდა მსოფლიო რაგბის მითითებებსა და რეკომენდაციებს.

ხშირად გვსტუმრობდნენ "მსოფლიო რაგბის" ექსპერტები, რომლებიც გვეხმარებოდნენ მაღალი მიღწევების პროგრამის დახვეწაში და ასეთმა მიდგომამ ეროვნული ნაკრებისა და 20-წლამდელების წარმატება განაპირობა.

ფოტოზე: ქართველები ლონდონში

სიტყვით გამოსვლისას აღვნიშნე კერძო სექტორის და კონკრეტულად საქველმოქმედო ფონდ "ქართუს" დიდი ინვესტიცია, რომელიც დაგვეხმარა ინფრასტრუქტურული პროექტების განხორციელებაში, რის გარეშეც წარმოუდგენელი იქნებოდა მსგავსი წარმატების მიღწევა. აუცილებელია, რომ მიღწეულზე არ შევჩერდეთ და ყველა მიმართულებით მუშაობა განვაგრძოთ.

შეხვედრის მონაწილეები განსაკუთრებით საქართველოში გამართული მსოფლიო რაგბის 20-წლამდელთა ჩემპიონატით დაინტერესდნენ და კიდევ ერთხელ აღინიშნა, რომ მიუხედავად დიდი გამოწვევებისა, ჩვენმა ქვეყანამ დასახულ ამოცანას კარგად გაართვა თავი და აქამდე ჩატარებულ ჩემპიონატებს შორის, საქართველომ ყველაზე მაღალი შეფასება მიიღო.

ჩემპიონატი წარმატებული იყო არა მხოლოდ სპორტული თვალსაზრისით, არამედ სხვა მიმართულებითაც. საქართველოზე, როგორც სარაგბო ქვეყანაზე, მსოფლიოს დაახლოებით მილიარდმა ადამიანმა გაიგო და ეს იყო ამ ტურნირის მასპინძლობის უაღრესად პოზიტიური შედეგი.

ცალკე აღინიშნა სპორტული შედეგი, რომლის შედეგადაც "უმცროსი ბორჯღალოსნები" ზედიზედ მესამედ ითამაშებენ მსოფლიო რაგბის 12-გუნდა ელიტაში. ხაზი გაესვა იმ ფაქტს, რომ ამ გუნდის მწვრთნელები ქართველები არიან, რომლებმაც კვალიფიკაცია სწორედ "მსოფლიო რაგბის" მაღალი მიღწევების პროგრამის შედეგად აიმაღლეს" - თქვა ლაშა ხურციძემ.

ყოველდღიური სპორტული გაზეთი "ლელო"
2416
მკითხველის კომენტარები / 0 /
მსგავსი ამბები
რუბრიკის სხვა სიახლეები
;